អាជ្ញាធរទុកពេលឲ្យម្ចាស់សំណង់ខុសច្បាប់១សប្តាហ៍ទៀត រុះរើដោយស្ម័គ្រចិត្តចេញពីតំបន់អង្គរ
រដ្ឋបាលខេត្តសៀមរាប និងអាជ្ញាធរជាតិអប្សរានៅថ្ងៃទី០១ខែសីហា បានផ្តល់ឱកាសជាថ្មីម្តងទៀតដល់ប្រជាពលរដ្ឋដែលបាននាំគ្នាទៅសាងសង់សំណង់ខុសច្បាប់នៅតំបន់អង្គរកាលពីពេលកន្លងទៅ ឲ្យ រុះរើចេញដោយខ្លួនឯងមុននឹងចំណាត់ការចុងក្រោយដោយអាជ្ញាធរនៅថ្ងៃទី៩ខែសីហាខាងមុខ។ ការជូនដំណឹងនេះ បានធ្វើឡើងបន្ទាប់ពីប្រជាពលរដ្ឋ មិនទាន់បានរុះរើសំណង់ខុសច្បាប់របស់ពួកគេដោយស្ម័គ្រចិត្តតាមការអំពាវនាវរបស់អាជ្ញាធរចំនួន២លើក កាលពីខែកក្កដាកន្លងទៅ។
ចុះផ្សាយនៅថ្ងៃ៖
ស្តាប់ - ០២:៣៣
នៅក្នុងសេចក្តីប្រកាសចុងក្រោយរួមគ្នារវាងរដ្ឋបាលសាលាខេត្តសៀមរាប និងអាជ្ញាធរជាតិអប្សរា រដ្ឋបាលទីក្រុងទេសចរណ៍មួយនេះ បានទុកពេលឲ្យម្ចាស់សំណង់ខុសច្បាប់ ដែលបានសាងសង់អំឡុងពេលយុទ្ធនាការឃោសនាបោះឆ្នោតក្រុមប្រឹក្សាឃុំ-សង្កាត់ឆ្នាំ២០១៧ និងសំណង់ខុសច្បាប់ថ្មីៗបាននិងកំពុងសាងសង់ ឲ្យធ្វើការរុះរើពីតំបន់១និងតំបន់២ ក្នុងរយៈពេល៧ថ្ងៃទៀតដោយស្ម័គ្រចិត្ត។
តាមរយៈខ្លឹមសារនេះ ចាត់ទុកថាជាការជូនដំណឹងចុងក្រោយ ដែលអាជ្ញាធរខេត្តសៀមរាបនិងអាជ្ញាធរអប្សរាសម្រេចចាត់វិធានការរុះរើសំណង់ទាំងនេះនៅថ្ងៃទី១០សីហា ដោយមិនទទួលខុសត្រូវក្នុងការបាត់បង់ឬខូចខាតទ្រព្យសម្បត្តិអ្វីឡើយ ប្រសិនបើម្ចាស់សំណង់ខុសច្បាប់មិនព្រមរុះរើដោយខ្លួនឯង។
ទាក់ទងទៅនឹងសំណង់ខុសច្បាប់នេះ អាជ្ញាធរជាតិអប្សរាក៏ដូចជា រដ្ឋបាលសាលាខេត្តសៀមរាបធ្លាប់បានព្រមានចំនួន២លើកមកហើយតាមរយៈលិខិតជូនដំណឹង និងតាមរយៈសន្និសីទកាសែតជាសាធារណៈ ដើម្បីឲ្យប្រជាពលរដ្ឋដែលបានចូលទៅសង់សំណង់នៅតំបន់ហាមឃាត់ទាំង៣តំបន់នោះរុះរើដោយស្ម័គ្រចិត្ត។ ក៏ប៉ុន្តែមិនមានអ្វីប្រែប្រួលទេ ហាក់ដូចជាកំពង់រង់ចាំមើលគ្នា និងរង់ចាំមើលថាតើអាជ្ញាធរ ពិតជាមានចំណាត់ការមែនទែនឬយ៉ាងណា។
ជាមួយគ្នានេះ លោក លី សំរិត អភិបាលរងខេត្តសៀមរាប បញ្ជាក់ប្រាប់វិទ្យុបារាំងនៅថ្ងៃនេះថាចំនួនសំណង់ជាង៥០០សំណង់ ក្នុងនោះពី៨០ទៅ៩០ភាគរយ ជាសំណង់មិនរឹងមាំ នៅមិនមានសំណង់ណាមួយត្រូវបានរុះរើទេ។ សំណង់ទាំងនេះត្រូវបានសង់ចោល ដោយមិនមានមនុស្សរស់នៅ។ ទោះយ៉ាងណាអាជ្ញាធររង់ចាំតែថ្ងៃកំណត់ប៉ុណ្ណោះ ប្រសិនបើម្ចាស់សំណង់មិនចេញមុខមករុះរើដោយខ្លួនឯង។ នេះបើតាមលោកលី សំរិត។
សូមបញ្ជាក់ថា វាបានក្លាយជាទំលាប់ទៅហើយសម្រាប់ប្រជាពលរដ្ឋនៅតំបន់នោះ ដែលបានឆ្មក់ចូលទៅវាតយកដីសាងសង់សំណង់នៅក្នុងតំបន់អង្គរ នៅពេលដែលមានការបោះឆ្នោតម្តង។ បញ្ហានេះត្រូវបានដាក់ការសង្ស័យដែរថា អាចជាការចូលដៃពីអាជ្ញាធរដែនដី ឬការបណ្តោយឲ្យធ្វើបែបនេះ ខណៈដែលមិនមានការរវីរវល់ណាមួយ នៅក្នុងអំឡុងពេលមានការបោះឆ្នោត។ ក៏ប៉ុន្តែទាំងអាជ្ញាធរជាតិអប្សរា និងអាជ្ញាធរខេត្តសៀមរាបតែងធ្វើការបដិសេធ ដោយចាត់ទុកថានៅតំបន់រមនីយដ្ឋានអង្គរ មិនដែលមានការអនុញ្ញាតណាមួយឲ្យមានការសាងសង់សំណង់អាណាធិបតេយ្យដូច្នោះទេ ព្រោះវាប៉ះពាល់ដល់រូបភាពនិងតម្លៃបេតិកភណ្ឌអង្គរវត្តដែលជាសម្បត្តិរបស់មនុស្សលោក៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ