នាយករដ្ឋមន្ត្រីបង់ក្លាដេស មកកម្ពុជានិយាយរឿងពាណិជ្ជកម្ម សេដ្ឋកិច្ច និងបច្ចេកទេស
ក្នុងដំណើរទស្សនកិច្ចរយៈពេល ២ថ្ងៃ របស់ប្រមុខដឹកនាំរដ្ឋាភិបាលបង់ក្លាដេស នៅកម្ពុជា ភាគីទាំង ២សម្រេចបាននូវការចុះហត្ថលេខាលើបញ្ជីឯកសារ ចំនួន ១១ ដែលក្នុងនោះភាគច្រើន គឺផ្តោតលើការពង្រឹងពាណិជ្ជកម្ម សេដ្ឋកិច្ច និងបច្ចេកទេស។ ក្នុងជំនួបជាមួយលោកនាយករដ្ឋមន្ត្រី ហ៊ុន សែន នៅវិមានសន្តិភាព រាជធានីភ្នំពេញ នាព្រឹកថ្ងៃទី ៤វិច្ឆិកានេះផងដែរ លោកស្រីនាយករដ្ឋមន្ត្រីបង់ក្លាដេស ក៏បានថ្លែងសរសើរថា កម្ពុជា គឺជាមិត្តជិតខាងដ៏ជិតស្និទ្ធ ហើយមានទស្សនៈរួមគ្នាកសាងសន្តិភាពនៅក្នុងតំបន់ និងពិភពលោក។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០៣:០៥
ឯកសារចំនួន ១១ ដែលត្រូវបានចុះហត្ថលេខា ក្នុងដំណើរទស្សនកិច្ចរបស់នាយករដ្ឋមន្ត្រីបង់ក្លាដេស លោកស្រី សេក្ខ ហាស៊ីណា (Sheikh Hasina) មកកម្ពុជានោះ រួមមានដូចជា អនុស្សារណៈនៃការយោគយល់គ្នាស្តីពីកិច្ចសហប្រតិបត្តិការ និងកិច្ចសហប្រតិបត្តិការលើបញ្ហាពាក់ព័ន្ធក្នុងការអនុវត្តគោលដៅអភិវឌ្ឍន៍ ដោយចីរភាពរហូតដល់ឆ្នាំ២០៣០។ កិច្ចសហប្រតិបត្តិការលើវិស័យការងារ និងបណ្តុះបណ្តាលវិជ្ជាជីវៈ។ កិច្ចសហប្រតិបត្តិការលើវិស័យទេសចរណ៍។ អនុស្សារៈការយោគយល់គ្នា ស្តីពីម៉ូឌែលសម្រាប់កិច្ចសហប្រតិបត្តិការរវាងស្ថាប័នចំណុះក្រុមប្រឹក្សាពាណិជ្ជកម្មចម្រុះ។ កិច្ចសហប្រតិបត្តិការស្ថាប័នលើកិច្ចការពាក់ព័ន្ធនឹងការជំរុញវិនិយោគរវាងក្រុមប្រឹក្សាអភិវឌ្ឍកម្ពុជា និងអាជ្ញាធរអភិវឌ្ឍន៍ការវិនិយោគបង់ក្លាដេស និងកិច្ចសហប្រតិបត្តិការលើវិស័យបច្ចេកវិទ្យាព័ត៌មាន និងគមនាគមន៍ជាដើម។
ក្រៅពីការចុះហត្ថលេខាលើឯកសារទាំង ១១នេះហើយ ប្រមុខរដ្ឋាភិបាលនៃប្រទេសទាំង ២ ក៏បានធ្វើសន្និសីទកាសែតរួមគ្នា ដោយលោកនាយករដ្ឋមន្ត្រីខ្មែរ បានសន្យាថា នឹងប្រឹងប្រែងជួយឲ្យបង់ក្លាដែសក្លាយជាដៃគូពិភាក្សាជាមួយប្រទេសឥណ្ឌា។ ក្រៅពីនោះ លោកហ៊ុន សែន ក៏ដាក់ក្តីរំពឹងថា បង់ក្លាដែស និងភូមា នឹងរកឃើញរូបមន្តមួយ ដើម្បីឲ្យប្រជាជនអាចធ្វើមាតុភូមិនិវត្តន៍។
លោកនាយករដ្ឋមន្រ្តី គូសបញ្ជាក់ទៀតថា កម្ពុជា នឹងបង្កើនទំនាក់ទំនង ព្រមទាំងបន្តសហការគ្នាជាមួយគ្នា ប្រទេសបង់ក្លាដែស ជាបន្តទៀត ដើម្បីជាផ្នែកមួយជម្រុញការអភិវឌ្ឍន៍នៃប្រទេសទាំងពីរ ក្នុងឋានៈជាប្រទេសកំពុងអភិវឌ្ឍន៍ដូចគ្នា។
ចំណែកខាងលោកស្រីនាយករដ្ឋមន្ត្រីបង់ក្លាដេសវិញ លោកស្រីក៏បានថ្លែងសរសើរពីចំណងមិត្តភាពរវាងប្រទេសទាំង ២ ដោយបញ្ជាក់ថា កម្ពុជា គឺជាមិត្តជិតខាងដ៏ជិតស្និទ្ធ ហើយមានទស្សនៈរួមគ្នាកសាងសន្តិភាពនៅក្នុងតំបន់ និងពិភពលោក ទោះបីជាប្រទេសទាំង២ ធ្លាប់ហែរឆ្លងនឹងអំពើប្រល័យពូជសាសន៍ដូចគ្នាក៏ដោយ។ លើសពីនោះ លោកស្រី បញ្ជាក់ថា ប្រទេសទាំងពីរ នឹងបើកកិច្ចប្រជុំគណៈកម្មការចម្រុះលើកទី១ នៅទីក្រុងដាកា ប្រទេសបង់ក្លាដែសនៅឆ្នាំក្រោយ។ ជាមួយគ្នានេះដែរ រដ្ឋាភិបាលបង់ក្លាដេស ក៏នឹងដាក់ព្រះនាម ព្រះបរមរតនកោដ្ឋ សម្តេចព្រះនរោត្តម សីហនុ នៅលើវិថីដ៏ល្បីមួយនៅទីក្រុងដាកា ប្រទេសបង់ក្លាដែស។
ក្រៅពីនេះ ប្រមុខរដ្ឋាភិបាលកម្ពុជា-បង់ក្លាដែស បានព្រមព្រៀងយកផ្លូវចំនួនពីរ ដែលស្ថិតនៅក្នុងរាជធានីភ្នំពេញ នៃប្រទេសកម្ពុជា និងផ្លូវក្នុងរដ្ឋធានីបង់ក្លាដែស ដាក់ព្រះនាម«បិតាជាតិ» រវាងប្រទេសទាំងពីរ ទៅវិញទៅមក។ បើតាម លោកនាយករដ្ឋមន្រ្តី កម្ពុជា នឹងយកផ្លូវមួយដាក់ឈ្មោះ«Sheikh Mujibur Rahman» ដែលជាបិតាឯករាជ្យរបស់ប្រទេសបង់ក្លាដែស ។ ចំណែកបង់ក្លាដែសវិញ ក៏នឹងយកផ្លូវដ៏ល្បីមួយក្នុងរដ្ឋធានីដាកា ដាក់ព្រះនាម«សម្ដេចនរោត្តម សីហនុ»ផងដែរ ដើម្បីជានិមិត្តរូប នៃការរំឮកពីសាមគ្គីភាពរបស់ប្រទេសទាំងពីរ។
សូមបញ្ជាក់ថា លោកស្រី សេក្ខ ហាស៊ីណា បានដឹកនាំគណៈប្រតិភូជាន់ខ្ពស់ មកដល់កម្ពុជា នៅថ្ងៃទី ៣ធ្នូ ដើម្បីបំពេញទស្សនកិច្ចរយៈពេល ២ថ្ងៃ ដោយក្នុងនោះរួមមានទាំងជំនួបជាមួយមេដឹកនាំកម្ពុជាសំខាន់ៗ ការចូលគាល់ព្រះមហាក្សត្រខ្មែរ ពិធីដាក់កម្រងផ្កាដើម្បីគោរពវិញ្ញាណក្ខន្ធព្រះមហាវីរក្សត្រព្រះបរមរតនកោដ្ឋ រួមនឹងការទស្សនាតាមរមណីយដ្ឋានប្រវត្តិសាស្ត្រនានា នៅទីក្រុងភ្នំពេញ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ