ឥទ្ធិពលកម្តៅនយោបាយ បានលុបលើថ្ងៃចន្ទពណ៌ខ្មៅ
រៀងរាល់ថ្ងៃចន្ទដើមសប្តាហ៍ គឺជាយុទ្ធនាការថ្ងៃចន្ទពណ៌ខ្មៅ ដែលអ្នកចូលរួមភាគច្រើនជាសង្គមស៊ីវិល និងសកម្មជនដីធ្លី បានប្រារព្ឋឡើង។ ប៉ុន្តែនៅសប្តាហ៍ទី៤នេះ យុទ្ធនាការដើម្បីទាមទារឱ្យមានការដោះលែងមន្ត្រីសិទ្ធិមនុស្សអាដហុក និងគ.ជ.ប ហាក់ដូចជាស្ងប់ស្ងាត់។ មន្ត្រីសង្គមស៊ីវិលមួយចំនួន បានអះអាងព្រឹត្តិការណ៍នេះ នៅតែបន្តប៉ុន្តែត្រូវលុបដោយកម្តៅនយោបាយ។
ចុះផ្សាយនៅថ្ងៃ៖
ស្តាប់ - ០២:០៤
កម្តៅនយោបាយតានតឹងខ្លាំងរវាងគណបក្សកាន់អំណាច និងគណបក្សប្រឆាំង កំពុងលុបលើព្រឹត្តិកាណ៍ថ្ងៃចន្ទពណ៌ខ្មៅ។ ថ្ងៃចន្ទពណ៌ខ្មៅ ដែលក្រុមសង្គមស៊ីវិលភាគច្រើន និងសកម្មជនដីធ្លីប្រារព្ឋចំនួន៣សប្តាហ៍កន្លងមក ដើម្បីឱ្យមានការដោះលែងមន្ត្រីសិទិ្ធមនុស្ស មន្ត្រីអាដហុកសរុបចំនួន៥រូប។ លោកមឿង នាយកប្រតិបត្តិមជ្ឈមណ្ឌលសម្ព័ន្ធភាពការងារ និងសិទ្ធិមនុស្ស បានអះអាងថាព្រឹត្តិកាណ៍កម្តៅនយោបាយនាពេលនេះ អាចលុបខ្លាំងលើព្រឹត្តិការណ៍ថ្ងៃចន្ទពណ៌ខ្មៅ ហើយអ្នកចូលរួមមួយចំនួនខ្លះអាចនឹងចូលរួមជាមួយយុទ្ធនាការរបស់គណបក្សប្រឆាំង។ ប៉ុន្តែទោះយ៉ាងណាវាគឺជាសិទ្ធរបស់ពលរដ្ឋ។
ស្រដៀងនេះ លោក អ៊ុំសំអាត មន្ត្រីជាន់ខ្ពស់របស់អង្គការលីកាដូ បានលើកឡើងដែរថា ព្រឹតិ្តការណ៍ថ្ងៃចន្ទ ដែលប្រារព្ឋចំនួន៣សប្តាហ៍មកហើយ នៅមិនទាន់ស្ងប់ទេ ប៉ុន្តែអាចច្របូកច្របល់ជាមួយនឹងព្រឹត្តការណ៍នយោបាយ ដែលកំពុងពុះកញ្ជ្រោល។ នៅថ្ងៃចន្ទសប្តាហ៍នេះ អ្នកធ្វើយុទ្ធនាការដើម្បីដោះលែងមន្ត្រីសិទ្ធិមនុស្ស មិនបានប្រមូលផ្តុំទ្រង់ទ្រាយធំ នៅតាមកន្លែងលើកបដា ឱ្យមានការដោះលែងដូចមុនទេ។ អ្នកខ្លះបានត្រឹមថតរូបស្លៀកពាក់ខ្មៅចែករំលែកក្នុងបណ្តាញសង្គម។ ប៉ុន្តែសហគមន៍ដីធ្លីថ្មគោលនៅព្រឹកនេះ ក៏ត្រូវអាជ្ញាធរបំបែកមិនឱ្យធ្វើយុទ្ធនាការផងដែរ។ ដោយឡែកអាជ្ញាធរវិញមិនបានដាក់ពង្រាយកម្លាំងត្រៀមស្ថានការណ៍ច្រើនទីតាំងដូចកាលពីមុនៗនោះដែរ។
សូមបញ្ជាក់ថាយុទ្ធនាការថ្ងៃចន្ទពណ៌ខ្មៅចាប់ផ្តើមថយកម្លាំងនៃការគាំទ្រធ្វើសកម្មភាពជាសាធារណៈដើម្បីស្នើឱ្យមានការដោះលែងសកម្មជន បន្ទាប់ពីត្រូវបានរដ្ឋអំណាចបង្ក្រាបដោយចាប់ខ្លួននិងឱ្យធ្វើកិច្ចសន្យា។
សូមរំលឹកបន្តិចថា យុទ្ធនាការថ្ងៃចន្ទពណ៌ខ្មៅបានចាប់ផ្តើមកាលពីថ្ងៃទី៩ ខែឧសភា ដើម្បីស្នើឱ្យមានការដោះលែងសកម្មជនសិទ្ធិមនុស្សចំនួន៤រូប និងមន្ត្រីជាន់ខ្ពស់គ.ជ.ប បន្ទាប់ពីត្រូវតុលាការឃុំខ្លួនពីបទសូកសាក្សី និងសមគំនិត ក្នុងសំណុំរឿងស្មុគស្មាញរបស់កញ្ញា ស្រីមុំ និងលោកកឹម សុខា។ យ៉ាងណាក៏ដោយសង្គមស៊ីវិល បានអះអាងថាយុទ្ធនាការថ្ងៃចន្ទពណ៌ខ្មៅនឹងនៅតែបន្តទៀត បើទោះបីជាពេលនេះ ឥទ្ធិពលកម្តៅនយោបាយកំពុងលុបក៏ដោយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ