យុទ្ធនាការអាវខ្មៅ នៅតែបន្ត ប៉ុន្តែស្ងប់ស្ងាត់ ក្រោយចាប់ខ្លួន
នៅថ្ងៃចន្ទនេះយុទ្ធនាការថ្ងៃចន្ទពណ៌ខ្មៅ ដើម្បីស្នើឱ្យមានការដោះលែងមន្ត្រីអង្គការអាដហុក និងមន្ត្រីគ.ជ.បនៅតែបន្ត។ ប៉ុន្តែយុទ្ធនាការនេះមានសភាពស្ងប់ស្ងាត់ដោយអ្នកចូលរួមយុទ្ធនាការទាំងនេះធ្វើនៅទីតាំងរៀងខ្លួន ដោយមិនបានប្រមូលផ្តុំដូចកាលពីយុទ្ធនាការលើកទី១ និងទី២ ដែលត្រូវរដ្ឋាភិបាលចាប់ខ្លួននោះទេ។
ចុះផ្សាយនៅថ្ងៃ៖
ស្តាប់ - ០២:០៧
នៅថ្ងៃចន្ទនេះ ក្រុមសង្គមស៊ីវិល និងសហគមន៍ដីធ្លីមួយចំនួននៅតែបន្តស្លៀកពាក់ខ្មៅជាបន្តទៀតក្នុងយុទ្ធនាការ ដើម្បីឱ្យមានការដោះលែងមន្ត្រីសិទ្ធមនុស្ស និងមន្ត្រីគ.ជ.បសរុបចំនួន៥នាក់។ ប៉ុន្តែយុទ្ធនាការនៅសប្តាហ៍ទី៣នេះ ស្ងប់ស្ងាត់មិនប្រមូលផ្តុំដូចកាលពីលើកមុនៗទេក្រោយការបង្ក្រាបរបស់អាជ្ញាធរចំនួន២លើក។ ទន្ទឹមនឹងនេះ រដ្ឋាភិបាលក៏នៅតែបន្តពង្រាយកងកម្លាំងនៅតាមតំបន់ដៅទុកមួយចំនួនជាពិសេសក្នុងក្រុងភ្នំពេញ។
លោក មឿង តុលា នាយកប្រតិបត្តនៃមជ្ឈមណ្ឌលសម្ព័ន្ធការងារ និងសិទ្ធិមនុស្សនៅតែបន្តយុទ្ធនាការនេះបែបស្ងប់ស្ងាត់ ដោយយកថ្ងៃចន្ទដើមសប្តាហ៍ស្លៀកពាក់ខ្មៅ។ ដូចគ្នានេះដែរ អង្គការលីកាដូនៅតែបន្តយុទ្ធនាការនេះជាបន្តទៀត ដើម្បីឱ្យរដ្ឋាភិបាលដោះលែងមន្ត្រីអង្គការសិទ្ធមនុស្សអាដហុក និងមន្ត្រីជាន់ខ្ពស់របស់គ.ជ.បផងដែរ។ សម្រាប់លីកាដូអង្គការមិនបានតម្រូវបង្ខំឱ្យបុគ្គលិកស្លៀកខ្មៅទាំងអស់គ្នានោះទេ អ្នកខ្លះស្លៀកក៏បាន និងអ្នកមិនស្លៀកខ្មៅក៏បាន។ ក្រៅពីនេះ ស្ថាបនិកPolitic Café លោកអ៊ូ រិទ្ធី ក៏បានស្លៀកពាក់ខ្មៅនៅថ្ងៃចន្ទដើមសប្តាហ៍ដែរ ដើម្បីបង្ហាញពីការគាំទ្រផ្នែកស្មារតីទៅដល់អ្នកកំពុងជាប់ឃុំទាំង៥រូប។
សង្គមស៊ីវិល ដែលកំពុងធ្វើយុទ្ធនាការនៅតែបង្ហាញសុទ្ធិដ្ឋិនិយមចំពោះការដោះលែងរបស់តុលាការ បើទោះបីជាយុទ្ធនាការនេះនៅមិនទាន់ទទួលបានលទ្ធផល ឬសញ្ញាណវិជ្ជមានណាមួយពីរដ្ឋាភិបាលក៏ដោយ។ សម្រាប់សង្គមស៊ីវិលក្តីកង្វល់របស់ប្រជាពលរដ្ឋ ស្ថាប័នរដ្ឋទាំងឡាយត្រូវតែដោះស្រាយ ព្រោះថានេះជាករណីកិច្ច ដែលមានចែងក្នុងរដ្ឋធម្មនុញ្ញកម្ពុជា។ ទន្ទឹមនឹងនេះរដ្ឋអំណាចក៏នៅតែបន្តពង្រាយកងកម្លាំងនៅតាមតំបន់គោលដៅមួយចំនួនដូចដូចជាតំបន់បឹងកក់បូរីកីឡា និងសហគមន៍ដីធ្លីSOSជាដើម។
រហូតមកដល់ពេលនេះ គឺជាសប្តាហ៍ទី៣ នៃយុទ្ធនាការថ្ងៃចន្ទពណ៌ខ្មៅហើយ។ ពីរសប្តាហ៍កន្លងទៅរដ្ឋអំណាចបានប្រើកម្លាំងបង្ក្រាបចាប់អ្នកប្រមូលផ្តុំឱ្យធ្វើកិច្ចសន្យាបញ្ឈប់ការប្រមូលផ្តុំរួចហើយដោះលែងទៅវិញ។ រដ្ឋាភិបាលកម្ពុជាបានអះអាងបើទោះបីជាមិនបានប្រមូលផ្តុំនៅតាមទីសាធារណៈណាមួយ ប៉ុន្តែបើអ្នកធ្វើយុទ្ធនាការទាំងអស់បែរជាប្រកូកប្រកាសប្រមូលផ្តុំធ្វើយុទ្ធនាការតាមបណ្តាញសង្គមនោះ រដ្ឋអំណាចនឹងចាត់វិធានការតាមផ្លូវច្បាប់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ