រដ្ឋសភាអនុម័តសេចក្តីព្រាងច្បាប់ស្តីពីការគ្រប់គ្រងលើការបរិច្ចាគសរីរាង្គមនុស្ស
រដ្ឋសភានៅព្រឹកថ្ងៃទី៣០ ខែមិថុនា នេះបានសម្រេចអនុម័តលើសេចក្តីព្រាងច្បាប់ស្តីពីការគ្រប់គ្រងលើការបរិច្ចាគ ការផ្សាំកោសិកា ជាលិកា និងសរីរាង្គមនុស្ស ដោយសំឡេង៦៥លើ៦៥។ ក្រៅពីនេះ សភាក៏បានអនុម័តច្បាប់ចំនួន៣ផ្សេងទៀត ដោយមិនមានវត្តមានតំណាងរាស្ត្រគណបក្សសង្រ្គោះជាតិនោះទេ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៤៨
សេចក្តីព្រាងច្បាប់ស្តីពីការគ្រប់គ្រងលើការបរិច្ចាគ ការផ្សាំកោសិកា ជាលិកា និងសរីរាង្គមនុស្ស គឺជាច្បាប់មួយ ដែលបង្កើតឡើង ក្នុងគោលបំណងឆ្លើយតបទៅនឹងតម្រូវការ ការព្យាបាល ដោយការផ្សាំតម្រងនោម(ក្រលៀន) របស់ពលរដ្ឋកម្ពុជាមានការកើនឡើង។ នៅព្រឹកនេះ សមាជិករដ្ឋសភាមកពីគណបក្សប្រជាជនកម្ពុជាទាំង៦៥រូបបានលើកដៃអនុម័ត ក្រោយពីច្បាប់នេះ ត្រូវបានគណៈរដ្ឋមន្ត្រីអនុម័ត កាលពីថ្ងៃទី២៧ ខែឧសភាកន្លងទៅ។
លោកម៉ម ប៊ុនហេង រដ្ឋមន្ត្រីក្រសួងសុខាភិបាលបានថ្លែងប្រាប់វិទ្យុបារាំងអន្តរជាតិថា ការបង្កើតច្បាប់ស្តីពីការគ្រប់គ្រងលើការបរិច្ចាគ ការផ្សាំកោសិកា ជាលិកា និងសរីរាង្គមនុស្សនឹងជួយការពារពលរដ្ឋកម្ពុជាពីការលក់សរីរាង្គមនុស្សខុសច្បាប់ ការពារផលប្រយោជន៍ប្រជាពលរដ្ឋ ហើយការជួញដូរសរីរាង្គនឹងត្រូវហាមឃាត់ទាំងស្រុង។ លោកបានបន្ថែមថាការបរិច្ចាគសរីរាង្គអាចធ្វើទៅបានលុះណាតែ មានការយល់ព្រមពីភាគីទាំងសងខាង។
បើតាមលោក ម៉ម ប៊ុនហេង ច្បាប់នេះ បានរៀបចំធ្វើឡើងដោយប្រើរយៈពេលប្រមាណ២ឆ្នាំ បើគិតរហូតមកដល់ថ្ងៃ ដែលសភាអនុម័តនេះ ហើយក្រសួងក៏បានរៀបចំសេចក្តីព្រាងជាមួយនឹងគណៈកម្មការទី៨របស់សភា និងអន្តរក្រសួងផងដែរ។
លោកស្រី កែ សុវណ្ណរតន៍ តំណាងរាស្ត្រគណបក្សសង្រ្គោះជាតិខេត្តសៀមរាប និងជាប្រធានគណៈកម្មការទី៨ ឬគណៈកម្មការសុខាភិបាល សង្គមកិច្ច បានថ្លែងប្រាប់វិទ្យុបារាំងថាគណៈកម្មការរបស់លោកស្រីមិនបានទទួលសេចក្តីព្រាងច្បាប់នេះ មុនពេលដែលសភាអនុម័ត។
ក្នុងសម័យប្រជុំរដ្ឋសភាលើកទី៦ នីតិកាលទី៥ នេះ បានប្រព្រឹត្តិទៅ ដោយគ្មានតំណាងរាស្ត្រគណបក្សប្រឆាំងចូលរួមទេ ក្រោយពេលដែលគណបក្សនេះ បានប្រកាសធ្វើពហិការមិនចូលប្រជុំសភា បន្ទាប់ពីមានការតាមចាប់ខ្លួនលោកកឹម សុខា កាលពីខែឧសភាកន្លងទៅ។
សូមបញ្ជាក់ថានៅថ្ងៃទី៣០ ខែមិថុនានេះ ច្បាប់ចំនួន ៣ផ្សេងទៀត ក៏ត្រូវបានសភាអនុម័ត ដោយសំឡេង៦៥លើ៦៥ផងដែរ នាសម័យប្រជុំលើកទី៦ នីតិកាលទី៥៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ