សហគមន៍បុរីកីឡាពីរក្រុម ណាត់គ្នាប្រារព្ធខួប៥ឆ្នាំនៃការបណ្តេញចេញ
ដូចការគ្រោងទុក ពលរដ្ឋសហគមន៍បុរីកីឡាពីរក្រុម ដែលត្រូវបានបណ្តេញចេញ កាលពីប្រាំឆ្នាំមុន បានមកជួបជុំគ្នា នៅបុរីកីឡា នាថ្ងៃអង្គារនេះ ដើម្បី ប្រារព្ធខួប នៃការបណ្តេញចេញ និងទាមទាសំណងបន្ថែម។ អ្នកនាំពាក្យសាលារាជធានីភ្នំពេញ បញ្ជាក់ថា ការស្នើសុំសំណងបន្ថែម របស់សហគមន៍បុរីកីឡា រស់នៅឃុំភ្នំបាត ជារឿងមិនអាចទៅរួចទេ ចំណែកពលរដ្ឋ ១៥គ្រួសារ ដែលនៅសេសសល់ រងចាំសំណងនៅ បុរីកីឡា នឹងត្រូវទទួលបាន ត្រឹមគោលនយោបាយផ្ទះនៅ សហគមន៍អណ្តូង ឬប្រាក់ បីពាន់ដុល្លារ ដែលជាដំណោះស្រាយចុងក្រោយ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៥៣
សហគមន៍ពលរដ្ឋរងគ្រោះដោយសារការបណ្តេញចេញ នៅក្នុងរាជធានីភ្នំពេញ សរុបប្រមាណ ១០០នាក់ នាព្រឹកថ្ងៃអង្គារនេះ បានមកជួបជុំគ្នានៅ ដីបុរីកីឡា ដើម្បីប្រារព្ធខួប ៥ឆ្នាំ នៃការបណ្តេញចេញពីបុរីកីឡា។ អ្នកភូមិបុរីកីឡាដែលមិនទាន់ទទួលសំណងពីរដ្ឋាភិបាលបាននិមន្តព្រះសង្ឃ ៥អង្គ មកសូត្រមន្ត បង្សុកូល រាប់បាត នៅបរិវេណបុរីកីឡាដោយមានការចងប៉េងប៉ោង ទង់សាសនា ទង់ជាតិប្រទេសកម្ពុជា បដាតវ៉ា និងភ្ញៀវជិតខាងមកពី សហគមន៍បឹងកក់ ផ្លូវរទេះភ្លើង ឃុំភ្នំបាតចូលរួម។ អំឡុងរៀបចំពិធី មានការប្រឈមមុខដាក់គ្នាមួយប្រ៉ាវ រវាងសហគមន៍ឃុំភ្នំបាត និងសន្តិសុខខណ្ឌ ៧មករា ដែលរារាំងការប៉ុនប៉ងចូលតាំងទីលំនៅឡើងវិញ របស់អ្នកឃុំភ្នំបាត។
លោកស្រី ស ស៊ន អ្នករស់នៅបុរីកីឡា ដែលកំពុងរងចាំទទួលសំណងពីការបណ្តេញចេញ កាលពីឆ្នាំ២០១២ បាន ថ្លែងប្រាប់វិទ្យុបារាំងអន្តរជាតិ ថា ការរំលឹកខួប ប្រាំឆ្នាំនេះ គឺ ដើម្បីបង្ហាញពី ការអភិវឌ្ឍរបស់រដ្ឋាភិបាលកម្ពុជា ជាមួយក្រុមហ៊ុន ផានអ៊ីម៉ិច (Phan Imex)នាំទុក្ខឲ្យរាស្ត្ររស់នៅវេទនា អត់ទីជម្រក។
ស្ត្រីមេមាយ បាត់បង់ប្តីទាហាន ក្នុងបុព្វហេតុការពារជាតិ រូបនេះ បន្ថែមថា អ្នកស្រី ក៏ជាពលរដ្ឋទាំង ១៧គ្រួសារ កំពុងរស់នៅលើគំនរសម្រាម ក្នុងបុរីកីឡា ចង់បានការអភិវឌ្ឍនៅនឹងកន្លែង ដោយមិនអាចទទួលយកបានទេ ជម្រើសផ្ទះ នៅសហគមន៍អណ្តូង ដែលគ្មាន អគ្គិសនី ទឹក សាលារៀន ផ្សារ ឬប្រាក់ ៣ពាន់ដុល្លារ ដែលសាលារាជធានីភ្នំពេញផ្តល់ឲ្យ។
បើតាម អ្នកស្រី ស ស៊ន សហគមន៍ឃុំភ្នំបាត ប្រមាណ ១០គ្រួសារ ក្នុងចំណោម ៧០គ្រួសារ ក៏បានវិលត្រឡប់មករស់នៅ លើអគារបុរីកីឡាវិញហើយ ព្រមទាំងបានប្រកាសទាមទាសំណងបន្ថែមទៀត ផងដែរ។ ត្បិតសហគមន៍ឃុំភ្នំបាត ស្ថិតចម្ងាយប្រហែល ៤០គីឡូម៉ែត្រ ពីរាជធានី ដែលពួកគេរស់នៅ គ្មានអគ្គិសនី ទឹក សាលារៀន ផ្សារ ពិបាកប្រកបរបរទទួលទាន ទើបពួកគេដាច់ចិត្តត្រឡប់មក ដើររើសអេតចាយ ដើម្បីរស់នៅទីក្រុងភ្នំពេញវិញ។
លោក ម៉ាន ចាន់យ៉ាដា អ្នកនាំពាក្យសាលារាជធានីភ្នំពេញ បានបញ្ជាក់ថា សាលាក្រុង នឹងកោះប្រជុំជាមួយ ក្រុមគ្រួសារ ដែលមិនព្រមទទួលយកសំណង ទាំង ១៥គ្រួសារ នៅបុរីកីឡា ដើម្បីជម្រាបពី កាលបរិច្ឆេទច្បាស់លាស់ ទទួលយកដំណោះស្រាយ ឬបោះបង់សិទ្ធិទទួលដំណោះស្រាយ។ ដំណោះស្រាយ របស់សាលារាជធានី គឺ សហគមន៍ត្រូវបានចែកជា បីប្រភេទ ក្នុងនោះប្រភេទទីមួយ គឺជា គ្រួសារមានឯកសារកាន់កាប់ គ្រប់គ្រាន់ នឹងត្រូវបានទទួលផ្ទះនៅបុរីកីឡា ចំណែកប្រភេទទីពីរ គឺទទួលបានផ្ទះនៅសហគមន៍អណ្តូង និងប្រភេទចុងក្រោយ ឥតមានឯកសារសោះ នឹង ទទួលបានថវិកា បីពាន់ដុល្លារ។ លោក ម៉ាន ចាន់យ៉ាដា បញ្ជាក់ថា អ្នកដែលនៅសល់ ទាំង ១៥គ្រួសារនោះ គឺស្ថិតក្នុងប្រភេទ អាចទទួលបានត្រឹមសំណង ផ្ទះនៅសហគមន៍អណ្តូង ឬប្រាក់ ៣ពាន់ដុល្លារ។
គួររំលឹកថា កាលពីថ្ងៃទី៣ ខែមករា ឆ្នាំ២០១២ កងកម្លាំងរដ្ឋាភិបាល បានចូលទៅរុះរើ ផ្ទះ និងបណ្តេញអ្នកភូមិជាង ២០០នាក់ ចេញ សហគមន៍បុរីកីឡា ដែលស្ថិតក្រោមគម្រោងអភិវឌ្ឍន៍របស់ ក្រុមហ៊ុន ផានអ៊ីម៉ិច (Phan Imex)ជា ក្រុមហ៊ុនរបស់លោកស្រី ស៊ុយ សុផាន អ្នកជំនួញដ៏មានឥទ្ធិពលនៅកម្ពុជា។ លោកស្រី ស៊ុយ សុផាន ត្រូវបានរដ្ឋាភិបាល ផ្តល់ដីឲ្យ ក្នុងទំហំ ២,៦ហិកតា ជាថ្នូរនឹង កិច្ចសន្យាសាងសង់អគារចំនួន ១០សម្រាប់ អ្នកភូមិ ១.៧៧៦គ្រួសារ ដែលត្រូវបានបណ្តេញចេញ។ នៅពេលសាងសង់ បាន៨ អគារ ក្រុមហ៊ុន ផានអ៊ីម៉ិច ក៏ប្រកាស ក្ស័យធន ដោយបន្សល់ ទុកឲ្យអ្នកភូមិជាង ៣០០ គ្រួសារ ស្វែងរកផ្ទះនៅកន្លែងផ្សេង ឬរងចាំទទួលសំណងតាមគោលការណ៍របស់រដ្ឋាភិបាល៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ