ព្រះសង្ឃក្នុងរាជធានីភ្នំពេញចេញវិធានការទប់ស្កាត់សកម្មភាពរៃអង្គាសថវិកានៅតាមទីសាធារណៈ
នៅក្នុងសន្និបាតមន្ត្រីសង្ឃទូទាំងរាជធានីភ្នំពេញ កាលពីថ្ងៃម្សិលមិញ ព្រះមេគណរាជធានីភ្នំពេញបានមានសង្ឃដីកាថា មន្ត្រីសង្ឃក្នុងរាជធានីភ្នំពេញ និងព្រះគ្រូអនុគណទាំង១២ខណ្ឌ នឹងរួមគ្នាទប់ស្កាត់សកម្មភាព រ៉ៃអង្គាសថវិកា ឬបិណ្ឌបាត្រក្លែងក្លាយ នៅក្នុងរាជធានីភ្នំពេញ។ ព្រះអង្គចាត់ទុកសកម្មភាព រៃអង្គាសខ្លះ បាន ធ្វើឲ្យប៉ះពាល់ដល់ព្រះពុទ្ធសាសនា និងសណ្តាប់ធ្នាប់សាធារណៈ។
ចុះផ្សាយនៅថ្ងៃ៖
ស្តាប់ - ០១:៥៨
នៅក្នុងសន្និបាតមន្ត្រីសង្ឃទូទាំងរាជធានីភ្នំពេញ ដើម្បីផ្សព្វផ្សាយខ្លឹមសារអនុសំវច្ឆរៈមហាសន្និបាតមន្ត្រីសង្ឃទូទាំងប្រទេសលើកទី២៥ កាលពីថ្ងៃទី២១ ខែកុម្ភៈ ព្រះមេគណរាជធានីភ្នំពេញ ភិក្ខុឃឹម សន បានមានសងដីកាថាព្រះគ្រូអនុគណទាំង១២ខណ្ឌ បានលើកឡើងពីបញ្ហាកង្វល់របស់ព្រះសង្ឃច្រើន ដែលមានដូចជាករណីបិណ្ឌបាត្រ បញ្ហារ៉ៃអង្គាសប្រាក់ក្នុងរាជធានីភ្នំពេញ។
ព្រះភិក្ខុឃឹម សន បានមានសង្ឃដីកាបន្ថែមថាកន្លងមកនេះ មានក្រុមបុគ្គលមួយចំនួនបានយកព្រះពុទ្ធរូបដាក់លើម៉ូតូកង់បីហែក្នុងទីកុ្រង ដើម្បីរៃអង្គាសថវិកា ដែលសកម្មភាពនេះ ធ្វើឲ្យប៉ះពាល់ដល់ព្រះពុទ្ធសាសនា និងសណ្តាប់ធ្នាប់សាធារណៈ។ ព្រះអង្គមិនអនុញ្ញាតឲ្យមានសកម្មភាពបែបនេះ ក្នុងទីក្រុងទេ ហើយបើមានព្រះសង្ឃ ឬពុទ្ធបរិសទ្យណា ចង់រៃអង្គាសលុះត្រាតែមានកន្លែងសមរម្យ។
ព្រះអង្គបន្ថែមថាសកម្មភាពបែបនេះ ក៏ធ្វើឲ្យមានជនខិលខូចមួយចំនួនឆ្លៀតឳកាស បន្លំខ្លួនធ្វើជាព្រះសង្ឃ ដើម្បីរកផលប្រយោជន៍ផ្ទាល់ខ្លួនដែរ។
ដើម្បីដោះស្រាយសកម្មភាពក្លែងបន្លំរបស់ជនខិលខូចនេះ សន្និបាតមន្ត្រីសង្ឃទូទាំងរាជធានីភ្នំពេញកាលពីថ្ងៃទី២១ ខែកុម្ភៈ ក៏បានសម្រេចធ្វើបណ្ណមួយសម្រាប់ព្រះសង្ឃ ដើម្បីឲ្យព្រះអង្គនិមន្តបិណ្ឌបាត្រក្នុងរាជធានីភ្នំពេញ។ បើតាមព្រះភិក្ខុឃឹម សន បណ្ណដែលមានហត្ថលេខា លេខសម្គាល់ លេខទូរស័ព្ទចៅអធិការវត្តនីមួយៗ និងរូបថតរបស់ព្រះសង្ឃ គឺមិនអាចក្លែងបន្លំបានទេ។
បញ្ហានៅក្នុងព្រះពុទ្ធសាសនាត្រូវបានសាធារណៈមតិមួយចំនួន ជាពិសេសគណបក្សសម្ព័ន្ធដើម្បីប្រជាធិបតេយ្យ តែធ្វើការរិះគន់ ជាបន្តបន្ទាប់ ក្រោយពីមានឯកសារជាវីដេអូ ឬរូបភាព ផ្សព្វផ្សាយពីរឿងអាស្រូវរបស់ព្រះសង្ឃអង្គខ្លះ តាមបណ្តាញសង្គម។
លោក សេង សុមុនី អ្នកនាំពាក្យក្រសួងធម្មការ និងសាសនាបានគាំទ្រចំពោះគោលការណ៍ចេញបណ្ណសម្រាប់ព្រះសង្ឃ ដើម្បីឲ្យព្រះសង្ឃនិមន្តបិណ្ឌបាត្រ។ លោកបញ្ជាក់ថាកន្លងមកនេះ ករណីរៃអង្គាសថវិកានេះ កាលពីមុនមានច្រើន ប៉ុន្តែបានថយចុះមកវិញក្រោយពីមានសង្ឃប្រកាស៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ