ការគ្រប់គ្រងវិស័យសំណង់ធ្វើបានតែនៅលើក្រដាស
ការគ្រប់គ្រងវិស័យសំណង់ធ្វើបានតែនៅលើក្រដាស។ នេះគឺជាអះអាងរបស់ អនុរដ្ឋលេខាធិការក្រសួងដែនដី នគរូបនីយកម្ម និងសំណង់ លោក ទា ច័ន្ទលីដា នៅក្នុងលិខិតចុះថ្ងៃទី១៩ខែមេសា ផ្ញើជូនលោក ជា សុផារ៉ា រដ្ឋមន្ដ្រីក្រសួងដែនដី ដែលទើបតែចូលកាន់តំណែងថ្មី។ បើតាមលោក ទា ច័ន្ទលីដា មានចន្លោះប្រហោង៣ចំណុចក្នុងការគ្រប់គ្រងវិស័យសំណង់ ដែលគួរកែសម្រួលនិងបំពេញបន្ថែម។ ចន្លោះប្រហោងទាំង៣ចំណុចនោះមានជាអាថិ៍៖ ការគ្រប់គ្រងត្រួតពិនិត្យផ្នែកបច្ចេកទេសលើការងារអនុវត្តជាក់ស្ដែងនៅតាមការដ្ឋាន ការគ្រប់គ្រងអ្នកប្រកបវិជ្ជាជីវៈវិស័យសំណង់ និងភាពចន្លោះប្រហោងរបស់អាជ្ញាធរដែនដី និងសមត្ថកិច្ចជំនាញក្នុងការទប់ស្កាត់បទល្មើសសំណង់។
ចុះផ្សាយនៅថ្ងៃ៖
ស្តាប់ - ០២:១៦
បើតាមលោក ទា ច័ន្ទលីដា ភាពចន្លោះប្រហោងទាំង៣ចំណុចនេះ គឺជាហានិភ័យក្នុងការគ្រប់គ្រងវិស័យសំណង់ ហើយវាកំពុងរីកកាន់តែធំឡើង នៅពេលដែលការសាងសង់កំពុងមានការរីកចម្រើនខ្លាំង។ បើតាមរបាយការណ៍របស់ក្រសួងដែនដី នគរូបនីយកម្ម និងសំណង់ វិស័យសំណង់និងអចលនទ្រព្យកាលពីឆ្នាំ២០១៥ មានការរីកចម្រើនខ្លាំង ដោយសារកំណើនសេដ្ឋកិច្ចដែលកម្ពុជាសម្រេចបានជាង៧ភាគរយជាច្រើនឆ្នាំមកនេះ។ ក្នុងឆ្នាំ២០១៥ មានគម្រោងសាងសង់ប្រមាណ ២ពាន់៣រយ គម្រោងត្រូវបានអនុម័ត។ គម្រោងនេះស្មើនឹងទំហំផ្ទៃក្រទ្បាសំណង់ចំនួន ៧,៧ លានម៉ែត្រការ៉េ ឬគិតជាយូនីតចំនួន ១៣៤២៣ យូនីត។ ក្នុងនោះ មានអគារប្រមាណ ៧០០ ដែលបានបញ្ចប់ការសាងសង់ និងកំពុងបន្តដំណើរការសាងសង់នៅកម្ពុជា។
យ៉ាងណាក៏ដោយ វិស័យសំណង់ទាំងអស់នេះ មិនទាន់ត្រូវបានគ្រប់គ្រងឲ្យបានពេញលេញ និងត្រឹមត្រូវនៅឡើយទេ។ លោក ទា ច័ន្ទលីដា លើកឡើងថា ការគ្រប់គ្រងវិស័យសំណង់ធ្វើបានតែនៅលើក្រដាសតែប៉ុណ្ណោះ ដោយភាគច្រើនធ្វើបានត្រឹមតែការពិនិត្យគម្រោងប្លង់ និងលិខិតស្នាមពាក់ព័ន្ធដើម្បីចេញលិខិតអនុញ្ញាតសាងសង់ ជួសជុល បើកការដ្ឋាន ឬបិទការដ្ឋានដែលសាងសង់រួចតែប៉ុណ្ណោះ ។ ចំណែក ការគ្រប់គ្រងអ្នកប្រកបវិជ្ជាជីវៈវិស័យសំណង់ ក៏នៅមានចំណុចខ្វះខាតច្រើនផងដែរ។ លើសពីនោះ ចំពោះបទល្មើសក្នុងការសាងសង់ ដូចជាករណីសាងសង់គ្មានលិខិតអនុញ្ញាត សាងសង់ខុសពីប្លង់និងលក្ខខណ្ឌដែលបានអនុញ្ញាត កន្លងមកក្រសួងបានត្រឹមតែចេញក្រដាសស្នាមឃាត់ផ្អាកបទល្មើស ឬបទបញ្ជាណែនាំឲ្យកែតម្រូវប៉ុណ្ណោះ។
បើតាមលោក ទា ច័ន្ទលីដា ចំណុចចន្លោះប្រហោងទាំងអស់នេះ កើតឡើងដោយសារតែទម្លាប់និងរបៀបធ្វើការរបស់មន្ដ្រីដែលមិនទទួលខុសត្រូវលើការងារ ក៏ដូចជាកង្វះលិខិតបទដ្ឋានគតិយុត្ត និងបទដ្ឋានបច្ចេកទេសវិស័យសំណង់ សម្រាប់ការអនុវត្តជាទូទៅ។ អនុរដ្ឋលេខាធិការនៃក្រសួងដែនដីរូបនេះ ស្នើឲ្យមានការពន្លឿនការងាររៀបចំ លិខិតបទដ្ឋានគតិយុត្ត និងបទដ្ឋានបច្ចេកទេសវិស័យសំណង់ ទាំងផ្នែករៀបចំដែនដី នគរូបនីយកម្ម និងសំណង់។ ក្រៅពីនេះ ការពិនិត្យ កែសម្រួលទម្លាប់ និងរបៀបធ្វើការងាររបស់មន្ដ្រី ក៏ជាកត្តាសំខាន់ ដែលអាចរួមចំណែកដោះស្រាយបញ្ហានេះបានផងដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ