ថ្នាក់ដឹកនាំសង្ឃកំពុងតាមដានករណីព្រះសង្ឃប៊ុត ប៊ុនតិញ
អ្នកនាំពាក្យក្រសួងធម្មការ និងសាសនាបានគូសបញ្ជាក់នៅថ្ងៃនេះថា ថ្នាក់ដឹកនាំសង្ឃកំពុងតាមដានករណីព្រះសង្ឃប៊ុត ប៊ុនតិញ ក្រោយក្រសួងធម្មការយល់ថា ព្រះសង្ឃប៊ុត ប៊ុនតិញ ដែលគង់នៅក្រៅប្រទេសបានមាន សង្ឃដីកាប្រមាថព្រះមហាក្សត្រកម្ពុជា នៅក្នុងកិច្ចសម្ភាសជាមួយនឹងវិទ្យុអាស៊ីសេរីកាលពីពេលថ្មីៗនេះ។ តាមរយៈអាស៊ីសេរី ដដែលព្រះអង្គប៊ុត ប៊ុនតិញ បានការពារសង្ឃដីការបស់ព្រះអង្គថា មិនមែនជាការប្រមាថឡើយ។
ចុះផ្សាយនៅថ្ងៃ៖
ស្តាប់ - ០២:១០
អ្នកនាំពាក្យក្រសួងធម្មការ និងសាសនាលោក សេង សុមនី បានចាត់ទុកសង្ឃដីការបស់ព្រះអង្គប៊ុត ប៊ុនតិញ មិនសាកសមជាអ្នកបួសឡើយព្រោះថា លក្ខខណ្ឌនៃអ្នកបួសមិនគួរគិតអវិជ្ជមានចំពោះបុគ្គលណាម្នាក់ទេ។ តែផ្ទុយទៅវិញព្រះសង្ឃប៊ុត ប៊ុនតិញ បែរជាមានសង្ឃដីកាបំពាបំពានទៅលើព្រះមហាក្សត្រដោយសូម្បីតែព្រះអង្គមិនដែលធ្វើអ្វីប៉ះពាល់ដល់ប្រជារាស្ត្រ រាប់ទាំងព្រះសង្ឃប៊ុត ប៊ុនតិញ។ នេះបើតាមលោក សេង សុមនី។
បើតាមលោក សេង សុមនី ព្រះសង្ឃប៊ុត ប៊ុនតិញ នឹងទទួលរងពិន័យផ្នែកសង្ឃតាមរយៈការត្រួតពិនិត្យលើករណីប្រមាថព្រះមហាក្សត្ររបស់គណៈសង្ឃ ឬនិយាយដោយសាមញ្ញថា តុលាការសង្ឃ។ ទោះជាបែបនេះក្ដីព្រះសង្ឃប៊ុត ប៊ុនតិញ មានសង្ឃដីកាបកស្រាយក្នុងវិទ្យុអាស៊ីសេរីវិញថា ពាក្យថា ប្រមាថលុះណាតែនិយាយមើលងាយដល់គុណសម្បត្តិព្រះមហាក្សត្រ។ ប៉ុន្តែព្រះអង្គមិនបានមើលងាយទេគ្រាន់តែមានសង្ឃដីកាថា ព្រះមហាក្សត្រទ្រង់កំពុងរងគ្រោះតែប៉ុណ្ណោះ។
ចំណែកអ្នកនាំពាក្យក្រសួងមហាផ្ទៃថា សង្ឃដីការបស់ព្រះសង្ឃប៊ុត ប៊ុនតិញ គ្មានអ្វីគួរចាប់អារម្មណ៍ឡើយព្រោះលោកបានចាត់ទុកព្រះសង្ឃប៊ុត ប៊ុនតិញ គ្រាន់តែជាសង្ឃក្លែងក្លាយតែប៉ុណ្ណោះ។ នេះបើតាមលោក ខៀវ សុភ័គ។ តែយ៉ាងណាមិញលោក បានរម្លឹកថា អាជ្ញាធររងចាំតែអនុវត្តដីកាតុលាការចាប់ព្រះសង្ឃ ប៊ុត ប៊ុនតិញ ពេលចូលកម្ពុជាវិញលើសំណុំរឿងបាត់បច្ច័យបុណ្យលោក កែមឡី។
ជាការកត់សម្គាល់ សង្ឃដីកានៅក្នុងបទសម្ភាសជាមួយវិទ្យុអាស៊ីសេរីព្រះសង្ឃប៊ុត ប៊ុនតិញ ស្របពេលរដ្ឋសភា និងព្រឹទ្ធសភាបានអនុម័តមាត្រា៤៣៧ស្ទួនទៅក្នុងក្រមព្រហ្មទណ្ឌទាក់ទងនឹងការដាក់ទោសលើអ្នកប្រមាថព្រះមហាក្សត្រពី១ទៅ៥ឆ្នាំ។ ក៏ប៉ុន្តែគិតមកដល់ពេលបច្ចុប្បន្នច្បាប់នេះនៅមិនទាន់ត្រូវបានប្រកាសឲ្យប្រើប្រាស់នៅឡើយទេដោយនៅរងចាំព្រះមហាក្សត្រឡាយព្រះហស្តលេខាប្រកាសឲ្យប្រើ។ សម្រាប់ព្រះសង្ឃប៊ុត ប៊ុនតិញ ថា ពាក់ព័ន្ធបញ្ហាទោសអីនោះវាមិនមែនជារឿងថ្មីថ្មោងសម្រាប់ព្រះអង្គឡើយ។ ហើយចំពោះការលើកឡើងដែរថា ព្រះអង្គអាចទំនងជាបុគ្គលដំបូងទទួលទោសទាក់ទងការប្រមាថព្រះមហាក្សត្រនោះ ព្រះអង្គចាត់ទុកថា នេះគ្រាន់តែជារឿងធ្វើឲ្យគេចាប់អារម្មណ៍ប៉ុណ្ណោះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ