កម្ពុជានឹងចាយលុយជាង៣០លានដុល្លារ ដើម្បីធ្វើជាម្ចាស់ផ្ទះកីឡាស៊ីហ្គេមឆ្នាំ២០២៣
កម្ពុជានឹងធ្វើជាម្ចាស់ផ្ទះរៀបចំការប្រកួតកីឡាអាស៊ីអាគ្នេយ៍ ឬស៊ីហ្គេម (SEA Games) លើកទី៣២ នៅឆ្នាំ២០២៣ខាងមុខ ដោយមានប្រទេសចំនួន១១ចូលរួម។ បើទោះបីជាកញ្ចប់ថវិកា រៀបចំការប្រកួតកីឡាស៊ីហ្គេមលើកទី៣២ នៅមិនទាន់អនុម័តជាផ្លូវការក្តី ប៉ុន្តែអគ្គលេខាធិការគណៈកម្មាធិការជាតិអូឡាំពិកកម្ពុជា បានប៉ាន់ប្រមាណថា កម្ពុជាអាចនឹងចំណាយថវិកាប្រមាណ ៣០ លានដុល្លារសហរដ្ឋអាមេរិក ក្នុងការប្រកួតកីឡាចំនួន ៣០ ប្រភេទ។
ចុះផ្សាយនៅថ្ងៃ៖
ស្តាប់ - ០២:៥៦
បើទោះបីជាគម្រោងចំណាយលើការរៀបចំការប្រកួតកីឡាស៊ីហ្គេមលើកទី៣២ នៅមិនទាន់អនុម័តជាផ្លូវការក្តី ប៉ុន្តែតាមរយៈកិច្ចប្រជុំមួយ កាលពីថ្ងៃទី ២៦ មេសា អគ្គលេខាធិការគណៈកម្មាធិការជាតិអូឡាំពិកកម្ពុជា លោក វ៉ាត់ ចំរើន បានប៉ាន់ប្រមាណថា កម្ពុជាអាចនឹងចំណាយថវិកាប្រមាណ១លានដុល្លារសហរដ្ឋអាមេរិក ក្នុង១ប្រភេទកីឡា ដែលនោះ មានន័យថា កម្ពុជានឹងចំណាយថវិកាប្រមាណជា៣០លានដុល្លារអាមេរិក ខណៈដែលកម្ពុជានឹងដាក់៣០ប្រភេទកីឡា ដើម្បីប្រកួតប្រជែង។ ការចំណាយនេះ នៅមិនទាន់រាប់បញ្ចូលការចំណាយមុននិងក្រោយការប្រកួតនោះទេ ពោលគឺ គិតតែក្នុងអំឡុងពេលនៃការរៀបចំការប្រកួតប៉ុណ្ណោះ។
បើតាមការចុះផ្សាយរបស់សារព័ត៌មានក្នុងស្រុកបានស្រង់សំដីលោក វ៉ាត់ ចំរើន អគ្គលេខាធិការគណៈកម្មាធិការជាតិអូឡាំពិកកម្ពុជាថា បើតាមស្តង់ដារបស់ប្រទេសដែលធ្លាប់រៀបចំព្រឹត្តិការណ៍នេះ គេត្រូវចំណាយយ៉ាងតិច១លានដុល្លារ លើ១ប្រភេទកីឡា។ ដូច្នេះបើកម្ពុជាដាក់៣០ប្រភេទកីឡា ដើម្បីឲ្យអត្តពលិកទាំង១១ប្រទេសប្រកួតប្រជែងគ្នានោះ នោះកម្ពុជាត្រូវចំណាយថវិកាប្រមាណជាង៣០លានដុល្លារអាមេរិក។ តែយ៉ាងណាក៏ដោយ គណៈកម្មាធិការជាតិរៀបចំការប្រកួតកីឡាស៊ីហ្គេមឆ្នាំ២០២៣ នៅមិនទាន់កំណត់ពីគម្រោងចំណាយសរុបនៅឡើយទេ។ តាមរយៈកិច្ចប្រជុំកាលពីថ្ងៃទី ២៦ មេសា នោះ លោកឧបនាយករដ្ឋមន្រ្តី ទៀ បាញ់ រដ្ឋមន្រ្តីក្រសួងការពារជាតិ និងជាប្រធានគណៈកម្មាធិការជាតិរៀបចំការប្រកួតនេះ បានជំរុញឲ្យមន្ត្រីក្រោមឱវាទប្រើប្រាស់ថវិកាឲ្យបានត្រឹមត្រូវ មានភាពជាក់លាក់ និងស្របតាមផែនការហិរញ្ញវត្ថុ ដែលបានកំណត់ក្នុងផែនការមេរបស់គណៈកម្មាធិការជាតិរៀបចំការប្រកួតកីឡាស៊ីហ្គេម។
គួរជំរាបជូនថា កម្ពុជានឹងធ្វើជាម្ចាស់ផ្ទះរៀបចំការប្រកួតកីឡាស៊ីហ្គេមលើកទី៣២ នៅឆ្នាំ២០២៣ និងជាលើកដំបូង បន្ទាប់ពីកម្ពុជាបានធ្វើជាម្ចាស់ផ្ទះម្តង ក្នុងការរៀបចំការប្រកួតកីឡាអាស៊ីហ្គាណាហ្វូលើកទី១នៅឆ្នាំ១៩៦៦ ក្នុងសម័យសង្គមរាស្រ្តនិយម ដែលកាលណោះ ការប្រកួតរៀបចំធ្វើឡើងនៅឯពហុកីឡាដ្ឋានជាតិ។
សូមបញ្ជាក់ដែរថា ការប្រកួតកីឡាស៊ីហ្គេមលើកទី២៩ ដែលទើបតែបានបិទបញ្ចប់ទៅ កាលពីឆ្នាំ២០១៧ ត្រូវបានរៀបចំធ្វើឡើងនៅឯទីក្រុងកូឡាឡាំពួរប្រទេសម៉ាឡេស៊ី ដែលមានអត្តពលិកប្រមាណជា ៤៦៤៦ នាក់ចូលរួមលើ៣៨ប្រភេទកីឡា។ កាលណោះ កម្ពុជាបានឈ្នះមេដាយសរុបចំនួន១៧គ្រឿង ស្ថិតនៅចំណាត់ថ្នាក់ទី៨ ខណៈប្រទេសម៉ាឡេស៊ីស្ថិតក្នុងចំណាត់ថ្នាក់ទី១នៃតារាងមេដាយ ដោយប្រមូលបានមេដាយសរុប៣២៣គ្រឿង។ ដោយឡែក ការប្រកួតកីឡាស៊ីហ្គេមលើកទី៣០ នឹងធ្វើឡើងនៅក្នុងប្រទេសហ្វីលីពីននៅឆ្នាំ២០១៩ ខណៈដែលស៊ីហ្គេមលើកទី៣១រៀបចំធ្វើនៅក្នុងប្រទេសវៀតណាម ហើយស៊ីហ្គេមលើកទី៣២ នឹងរៀបចំធ្វើនៅទីក្រុងភ្នំពេញប្រទេសកម្ពុជា។ ក្នុងនោះ ពហុកីឡាដ្ឋានជាតិមរតកតេជោ ដែលជាជំនួយរបស់រដ្ឋាភិបាលចិន នឹងក្លាយជាទីកន្លែងបើកព្រឹត្តិការណ៍កីឡាស៊ីហ្គេម ដែលរៀបចំធ្វើរយៈពេល២ឆ្នាំម្តងនេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ