គណៈមេធាវីកម្ពុជា ប្រកាសបង្កើតការិយាល័យមេធាវីនៅគ្រប់ខេត្តក្រុងទូទាំងប្រទេស ដើម្បីផ្តល់សេវាផ្លូវច្បាប់ដល់ជនក្រីក្រ
គណៈមេធាវីកម្ពុជា នៅថ្ងៃម្សិលមិញ បានប្រកាសថា នឹងរៀបចំដាក់ការិយាល័យមេធាវីនៅតាមខេត្តក្រុង ទូទាំងប្រទេស ដើម្បីផ្តល់សេវាផ្លូវច្បាប់ និងជួយការពារក្តីដល់ជនក្រីក្រ ដែលមិនមានលទ្ធភាពស្វែងរកមេធាវីក្នុងការតតាំងរឿងក្តីនៅក្នុងតុលាការ។ នេះបើតាមការលើកឡើងរបស់ប្រធានគណៈមេធាវីកម្ពុជា ក្នុងមហាសន្និបាតប្រចាំឆ្នាំលើកទី២២ របស់គណៈមេធាវីកម្ពុជា។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៤៣
លោក សួន វិសាល ប្រធានគណៈមេធាវីកម្ពុជា អះអាងថា យន្តការថ្មីរបស់គណៈមេធាវី ក្នុងការបង្កើតការិយាល័យមេធាវីទូទាំងប្រទេសនេះ នឹងផ្តើមអនុវត្តពីពេលនេះតទៅ។ លោក ថា គិតត្រឹមពេលនេះ មានមេធាវីចំនួន ២០០ នាក់ហើយ ដែលបានចុះបញ្ជីក្នុងការជួយការពារក្តីជនក្រីក្រទូទាំងប្រទេស។ ប្រធានគណៈមេធាវីរូបនេះ បន្តថា កន្លងមកការជួយការពារជនក្រីក្រ គឺបានធ្វើខ្លះរួចមកហើយ ក៏ប៉ុន្តែមិនមានសកម្មភាពនៅគ្រប់ខេត្តក្រុង ទូទាំងប្រទេសកម្ពុជានោះឡើយ។ ក្រៅពីនេះ គណៈមេធាវីកម្ពុជា ក៏បានធ្វើផែនការផ្តល់មេធាវីនៅតាមបណ្តាខេត្តដាច់ស្រយាល ដែលមិនមានមេធាវីចុះទៅដល់ និងបង្កើតឲ្យមានមេធាវីនៅគ្រប់បណ្តាខេត្តក្រុង ទាំងអស់នៅទូទាំងប្រទេស ដែលយ៉ាងហោចណាស់ក៏មានមេធាវី៥ នាក់ ក្នុងខេត្តនីមួយៗផងដែរ។
ថ្លែងក្នុងមហាសន្និបាតលើកទី២២របស់គណៈមេធាវីកម្ពុជា លោក សួន វិសាល រៀបរាប់ថា ការការពារក្តីជនក្រីក្រ នឹងផ្តោតទៅលើពាក្យបណ្តឹង ឬសំណុំរឿង ព្រហ្មទណ្ឌដែលមេធាវីបានជួយការក្តីពលរដ្ឋក្រីក្រ ហើយគណៈមេធាវី ក៏កំពុងតែពិចារណាបន្ថែមទៀតក្នុងពង្រីកជួយការពារក្តីដល់រឿងរដ្ឋប្បវេណី ដែលមានករណីមួយចំនួនប្រជាពលរដ្ឋជួបរឿងអយុត្តិធម៌ ឬការលំបាក ហើយគ្មានលទ្ធភាព ។
បើតាមរបាយការណ៍របស់គណៈមេធាវីកម្ពុជា គិតត្រឹមថ្ងៃទី ០១ ខែតុលា ឆ្នាំ២០១៧នេះ មានសំណុំរឿងជនក្រីក្រ ប្រមាណជាង ២០០០ ករណី ត្រូវបានគណៈមេធាវីកម្ពុជាដោះស្រាយ និងការពារក្តីតាមយន្តការការពារជនក្រីក្រ។ ហើយដើម្បីទ្រទ្រង់សកម្មភាពនេះ រដ្ឋាភិបាលកម្ពុជា បានសម្រេចផ្តល់ទឹកប្រាក់បន្ថែមរហូតដល់ ៩០០ លានរៀល ក្នុងឆ្នាំ២០១៨ ខាងមុខ សម្រាប់ការពារក្តីជនក្រីក្រ ដែលថវិកានេះ មានការកើនឡើងដល់ ៣០០ លានរៀល បើធៀបថវិកា នៅឆ្នាំ២០១៥និងឆ្នាំ២០១៦៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ