កម្ពុជា បានបោះឆ្នោតមិនជ្រៀតជ្រែតរឿងជនភៀសខ្លួនរ៉ូហ៊ីងយ៉ារបស់ភូមា
ខុសពីប្រទេសចំនួន ១៣៥ទៀត កម្ពុជា គឺជាប្រទេសមួយដែរ ដែលបានបោះឆ្នោតមិនចូលជ្រៀតជ្រែក កិច្ចការផ្ទៃក្នុងរបស់ភូមា រឿងជនភៀសខ្លួនរ៉ូហ៊ីងយ៉ា។ នេះបើតាមប្រសាសន៍របស់លោកនាយករដ្ឋមន្ត្រីហ៊ុន សែន កាលពីសប្តាហ៍មុន។ កម្ពុជា ជាប្រទេសមួយ ក្នុងចំណោមប្រទេសចំនួន ១០ ដែលបានបោះឆ្នោតបដិសេធលើពង្រាងសេចក្តីសម្រេចរបស់អង្គការសហប្រជាជាតិ ដែលសូមចូលជួយកិច្ចការរបស់ភូមា ក្នុងហេតុផលដើម្បីរក្សាអធិបតេយ្យភាពនៃប្រទេសនីមួយៗ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១០
កម្ពុជា គឺជាប្រទេសមួយជាមួយប្រទេសចំនួន ៩ទៀត មានដូចជា រុស្ស៊ី ចិន ហ្វីលីពីន ឡាវ វៀតណាម ស៊ីរី ហ្ស៊ីមបាវេ បេឡារុស និងភូមា ដែលបានបោះឆ្នោតមិនគាំទ្រ លើពង្រាងសេចក្តីសម្រេចរបស់អង្គការសហប្រជាជាតិ កាលពីសប្តាហ៍មុន ពាក់ព័ន្ធទៅនឹងការសុំចូលខ្លួន ដោះស្រាយបញ្ហាជនភៀសខ្លួនរ៉ូហ៊ីងយ៉ា នៅភូមា។ ប្រការនេះ ត្រូវបានលោកនាយករដ្ឋមន្ត្រីហ៊ុន សែន បញ្ជាក់ថា កម្ពុជា មានគោលការណ៍ជាអាទិភាព គឺមិនជ្រៀតជ្រែកកិច្ចការផ្ទៃក្នុង ឬ អធិបតេយ្យភាពរបស់ប្រទេសណាមួយនោះឡើយ ព្រោះកម្ពុជា ជារដ្ឋឯករាជ្យ។ តែយ៉ាងណា ប្រមុខដឹកនាំកម្ពុជា បន្ថែមថា នឹងចូលរួមជួយគាំទ្រដល់សកម្មភាពសប្បុរសធម៌គ្រប់បែបយ៉ាង លើកលែងតែការលូកដៃក្នុងកិច្ចការរបស់ប្រទេសដទៃ។
យ៉ាងណាមិញ មានប្រទេសចំនួន ១៣៥ផ្សេងទៀត បានបោះឆ្នោតគាំទ្រ ឲ្យមានការចូលជួយដោះស្រាយបញ្ហាជនភៀសខ្លួនរ៉ូហ៊ីងយ៉ា របស់អង្គការសហប្រជាជាតិ ក្នុងហេតុផលការពារសិទ្ធិមនុស្ស។ ប៉ុន្តែក៏មានប្រទេសចំនួន ២៦ទៀត ដែលសូមមិនបញ្ចេញយោបល់អ្វីទាំងអស់។
អង្គការសហប្រជាជាតិ នៅតែបន្តជំរុញឲ្យភូមា បញ្ឈប់ការធ្វើទុក្ខបុកម្នេញ លើជនជាតិរ៉ូហ៊ីងយ៉ា ហើយអង្គការនេះ បានសម្រេចចេញពង្រាងសេចក្តីសម្រេចមួយ ដែលមានគោលបំណងឲ្យរដ្ឋាភិបាលភូមា អនុញ្ញាត ឲ្យប្រទេសជាសមាជិកអង្គការសហប្រជាជាតិ ផ្តល់បុគ្គលិកជំនួយ ជួយដល់ជនជាតិរ៉ូហ៊ីងយ៉ា ដើម្បីផ្តល់សិទ្ធិស្របច្បាប់ ដល់ជនជាតិភាគតិចទាំងនោះ អាចត្រលប់មកប្រទេសភូមាវិញ ហើយទទួលបានសិទ្ធិជាពលរដ្ឋរ៉ូហ៊ីងយ៉ាងស្របច្បាប់។
គួររម្លឹកជូនថា មានជនជាតិម៉ូស្លីមរ៉ូហ៊ីងយ៉ា ជាង ៦០ម៉ឺននាក់ បានរត់ភៀសខ្លួនទៅកាន់ប្រទេសជិតខាង ដូចជាបង់ក្លាដេសជាដើម តាំងពីយោធាភូមា បានប្រើអំពើហិង្សា លើតំបន់រ៉ាឃីន កាលពីខែសីហាកន្លងទៅ។ កងទ័ពភូមា ថែមទាំងទាត់ចោលនូវការចោទប្រកាន់របស់អង្គការសហប្រជាជាតិដែលវាយតម្លៃថា ប្រតិបត្តិការយោធាភូមាជាការបោសសម្អាតពូជសាសន៍។
យ៉ាងណាក៏ដោយ សម្រាប់កម្ពុជា នៅថ្ងៃទី ២០ ដល់ ២១ ខែវិច្ឆិកានេះផងដែរ លោកប្រាក់ សុខុន រដ្ឋមន្ត្រីក្រសួងការបរទេសកម្ពុជា បានដឹកនាំគណ:ប្រតិភូ ចូលរួមកិច្ចប្រជុំរដ្ឋមន្រ្ដីការបរទេសអាស៊ី-អឺរ៉ុប លើកទី១៣ នៅទីក្រុងណៃពិដោ ប្រទេសភូមា។ ហើយក្នុងឱកាសនេះ ប្រមុខការបរទេសកម្ពុជា ក៏នឹងជួបពិភាក្សាការងារទ្វេភាគីជាមួយ លោកស្រី អ៊ុង សានស៊ូជី ទីប្រឹក្សារដ្ឋ និងជារដ្ឋមន្រ្តីការបរទេសនៃប្រទេសភូមា និងលោកវ៉ាង យី រដ្ឋមន្រ្តីការបរទេសចិន។ ប៉ុន្តែគេនៅមិនទាន់ដឹងថា តើជំនួបប្រជុំនេះ នឹងពិភាក្សាពីបញ្ហាអ្វីនៅឡើយទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ