កម្ពុជានឹងនាំចូលអំបិល៣ម៉ឺនតោនពីចិននៅចុងឆ្នាំនេះ
សហគមន៍អ្នកផលិតអំបិលកម្ពុជា នឹងធ្វើដំណើរទៅប្រទេសចិននៅថ្ងៃទី២៥តុលា ដើម្បីចុះកិច្ចព្រមព្រៀង ទិញអំបិល៣ម៉ឺនតោនពីប្រទេសចិន ដែលអំបិលនេះ នឹងដឹកមកដល់កម្ពុជានៅចុងឆ្នាំនេះ។ ជុំវិញគម្រោងចុះទៅទិញអំបិលពីប្រទេសចិន របស់សហគមន៍អ្នកផលិតអំបិលដូច្នេះ គឺធ្វើឡើងបន្ទាប់ពីទទួលបានការយល់ព្រមពីក្រសួងឧស្សាហកម្ម ខណៈគម្រោងទិញអំបិលនេះ ត្រូវបានគិតគូរតាំងពីពេល ដែលកម្ពុជាដឹងថា ការផលិតអំបិលជួបបញ្ហាតាំងពីដើមឆ្នាំ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥៧
លោក លី សេង សហប្រធាននៃសហគមន៍អ្នកផលិតអំបិលកែបនិងកំពត ថ្លែងប្រាប់វិទ្យុបារាំងអន្តរជាតិនៅថ្ងៃទី១៦តុលានេះថា អំបិលនាំចូលពីចិនធានាបានគុណភាពនិងតម្លៃសមរម្យ ព្រោះអំបិលផលិតនៅប្រទេសចិនទាញចេញពីប្រភពទឹកសមុទ្រដូចកម្ពុជាដែរ ដែលផ្ទុយពីប្រទេសជិតខាងកម្ពុជា អំបិលផលិតចេញពីរ៉ែទាញចេញពីក្នុងដី។ ការទិញអំបិលពីចិននេះ ប្រទេសចិនជាអ្នករ៉ាប់រង ក្នុងការដឹកជញ្ជូនមកឲ្យកម្ពុជា។
នេះជាលើកទី២ហើយដែលកម្ពុជា ទិញអំបិលពីប្រទេសចិន ខណៈលើកទី១កម្ពុជាបានចំណាយ២,២លានដុល្លារ ទិញអំបិល ២០ ០០០តោន ពីប្រទេសចិនក្នុងឆ្នាំ២០០៩។ នេះបើតាម លោក លី សេង។
កង្វះអំបិលក្នុងការប្រើប្រាស់សម្រាប់ឆ្នាំក្រោយ ត្រូវបាន សហប្រធាននៃសហគមន៍អ្នកផលិតអំបិលកម្ពុជា អះអាងជាថ្មីថា ១០ឆ្នាំម្ដងកម្ពុជាប្រឈម នឹងការខ្វះខាតអំបិល ដែលបណ្ដាមកពីកត្តាអាកាសធាតុ។ អាកាសធាតុដែលមានភ្លៀងធ្លាក់ជាប់មិនដាច់ចាប់តាំងពីខែមករា រហូតដល់ចុងខែមេសាដូច្នេះ គេមិនអាចប្រមូលផលអំបិលបានទេ ដោយសារមិនមានថ្ងៃហាល។
លោក លី សេង បានព្រមានថា បើសិនអាកាសធាតុបែបនេះ អូសបន្លាយដល់ឆ្នាំក្រោយ កម្ពុជានឹងប្រឈមការខ្វះអំបិលប្រើប្រាស់ទៀត ហើយកសិករអាចប្រឈមនឹងការបោះបង់អាជីពជាអ្នកធ្វើស្រែអំបិល។ នៅពេលសួរថា កម្ពុជាមានផែនការទប់ស្កាត់ជាមុន ចំពោះកង្វះអំបិលសម្រាប់ឆ្នាំក្រោយៗទេ? លោក សេង លី មិនទាន់មានចម្លើយព្រោះ ការផលិតអំបិលនៅកម្ពុជាមិនទាន់មានលក្ខណៈទំនើប ពោលគឺផលិតតាមបែបធម្មជាតិពឹងផ្អែកតែលើអាកាសធាតុ។
បច្ចុប្បន្នអំបិលក្នុងស្តុកនៅសល់ប្រហែល៨០០០តោនសម្រាប់ដំណើរការប្រើប្រាស់២ខែទៀតប៉ុណ្ណោះ ពីពេលនេះរហូតដល់ដំណាច់ឆ្នាំ២០១៨។ សូមបញ្ជាក់ថា កម្ពុជាមានស្រែអំបិលជាង៤ ៦០០ហិកតានៅក្នុងខេត្តកំពតនិងកែប ដោយមានកសិករធ្វើអំបិលជាង២០០គ្រួសារ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ