រដ្ឋាភិបាលខ្មែរ សង្ឃឹមចិនឲ្យប្រាក់ខ្ចីទៀត ដើម្បីចែកចាយអគ្គិសនីដែលផលិតបាន
ប្រមុខរដ្ឋាភិបាលកម្ពុជា លោកនាយករដ្ឋមន្ត្រីហ៊ុន សែន សង្ឃឹមថា រដ្ឋាភិបាលចិន នឹងបន្តឲ្យប្រាក់កម្ពុជាខ្ចីទៀត ដើម្បីអាចមានលទ្ធភាពតបណ្តាញអគ្គិសនី ដែលផលិតបាន យកទៅចែកចាយតាមបណ្តាភូមិ ឃុំ នៅទូទាំងប្រទេស។ នេះជាការលើកឡើង ក្នុងឱកាសដែលលោកបានចូលរួម ក្នុងពិធីសម្ពោធឲ្យប្រើប្រាស់ជាផ្លូវការ នូវទំនប់វារីអគ្គិសនីស្ទឹងតាតៃ ក្នុងខេត្តកោះកុង។ ទំនប់វារីអគ្គិសនីស្ទឹងតាតៃ ដែលអាចផលិតថាមពលអគ្គិសនីបាន ២៤៦មេហ្កាវ៉ាត់។
ចុះផ្សាយនៅថ្ងៃ៖
ស្តាប់ - ០២:១៨
ខណៈដែលក្តីរំពឹងពីការផលិតថាមពលវារីអគ្គិសនីស្ទឹងតាតៃ មានដល់ទៅ ២៤៦មេហ្កាវ៉ាត់ លោកនាយករដ្ឋមន្ត្រីហ៊ុន សែន បានថ្លែងចង់បានប្រាក់កម្ចីពីរដ្ឋាភិបាលចិនជាបន្តទៀត ដើម្បីអាចពង្រឹងការតបណ្តាញអគ្គិសនី ឬចែកចាយប្រភពធនធានរដ្ឋ ទៅកាន់ដៃពលរដ្ឋ ទូទាំងប្រទេសកម្ពុជា។ លោកនាយករដ្ឋមន្ត្រី បានឲ្យដឹងថា ពីមុនចិន បានផ្តល់ប្រាក់កម្ចី ដើម្បីសាងសង់ ហើយពេលនេះ រដ្ឋាភិបាលកម្ពុជា ក៏សង្ឃឹមចង់ឲ្យចិន ផ្តល់ប្រាក់កម្ចីបន្ថែម ដើម្បីតភ្ជាប់បណ្តាញជាតិ និងដើម្បីសម្រាលជីវភាពពលរដ្ឋខ្មែរ។
ថ្លែងក្នុងសុន្ទកថា លោកនាយករដ្ឋមន្ត្រី ហាក់មានមោទនភាពច្រើន ជាមួយនឹងទំនប់វារីអគ្គិសនីនេះ ដោយលោក អះអាងថា ប្រសិនបើកម្ពុជា មានប្រភពអគ្គិសនីខ្លួនឯង នោះកម្ពុជា អាចមានជម្រើសមិនប្រើភ្លើងឯកជន របស់ប្រទេសដទៃ។ លោកហ៊ុន សែន ចង់ឲ្យមានការពង្រឹងបណ្តាញជាតិ ព្រមទាំងត្រូវដាក់កម្មវិធីអនុវត្តឲ្យបានត្រឹមត្រូវ សម្រាប់ការបញ្ចុះតំលៃភ្លើងជាបន្តបន្ទាប់។
កន្លងមក អគ្គិសនីកម្ពុជា បានផ្តើមគោលការណ៍អនុគ្រោះតំលៃភ្លើង ដែលប្រើក្រោម ៥០គីឡូវ៉ាត់ម៉ោង ក្នុងមួយខែ ដល់កម្មករ កម្មការនី សិស្ស និស្សិត ក្នុងទីក្រុងភ្នំពេញ ក្នុងតំលៃត្រឹម ៦១០រៀល ក្នុងមួយគីឡូវ៉ាត់ម៉ោង។ ហើយគម្រោងនេះ សម្រេចបានដល់បន្ទប់ជួលរបស់កម្មករ សិស្ស និស្សិត ប្រមាណជាង ១សែន៩ម៉ឺន២ពាន់បន្ទប់ហើយ។
គិតមកដល់ពេលនេះ តំបន់មួយចំនួនដែលអគ្គិសនីរបស់រដ្ឋ គ្របដណ្តប់ មានប្រមាណជា ៥៥ភាគរយ ឬ ត្រូវជាង ១លាន ៧សែនកន្លែង។
គួរជម្រាបជូនថា ទំនប់វារីអគ្គិសនីស្ទឹងតាតៃ មានទីតាំងស្ថិត នៅក្នុងស្រុកថ្មបាំង ខេត្តកោះកុង។ ទំនប់វារីអគ្គិសនីនេះ បានបើកការដ្ឋានសាងសង់ កាលពីថ្ងៃទី ២៩មីនា ឆ្នាំ ២០១០ ក្នុងទំហំទឹកប្រាក់សរុចំនួន ៥៤០លានដុល្លារអាមេរិក ដែលជាការវិនិយោគរបស់ក្រុមហ៊ុន ខេមបូឌា តាតៃ ហ៊ីដ្រូផៅវ័រ របស់ចិន។ ទំបន់វារីអគ្គិសនីស្ទឹងតាតៃ ក្នុងខេត្តកោះកុងនេះ ត្រូវបានសម្ពោធ ក្រោយពីមានការសម្ពោធនូវទំនប់វារីអគ្គិសនីឬស្សីជ្រុំ កាលពីខែមករា ឆ្នាំ ២០១៥កន្លងទៅ។
រហូតមកដល់ពេលនេះ ប្រទេសកម្ពុជា មានកិច្ចព្រមព្រៀងសាងសង់ទំនប់វារីអគ្គិសនី ចំនួន ១១ រួចមកហើយ ដែលមានអនុភាព ផ្គត់ផ្គង់សរុប ចំនួន ២ពាន់១២៣ មេហ្គាវ៉ាត់។ ក្នុងចំណោមប្រភពអគ្គិសនីទាំង ១១នោះ មានប្រភពអគ្គិសនី ចំនួន ៨ ត្រូវបានដាក់ឲ្យដំណើរការរួចរាល់ហើយ ដែលអនុភាពផ្គត់ផ្គង់អគ្គិសនី សរុប ១ពាន់០៧២ មេហ្គាវ៉ាត់។ ប៉ុន្តែ កម្ពុជា ក៏បាននាំចូលអគ្គិសនី ពីប្រទេសវៀតណាម តាមច្រក ភ្នំដិន ខេត្តតាកែវ ចំនួន ១៧០ មេហ្គាវ៉ាត់ ព្រមទាំងការនាំចូលពីប្រទេសថៃ ចំនួន ១២០ មេហ្គាវ៉ាត់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ