លោកឈុំ សុជាតិ៖ សិក្ខាកាមលោតឆត្រយោងម្នាក់ស្លាប់ ក្រោយពីឆត្រយោងមិនរលាស់
សិក្ខាកាមថ្នាក់នាយទាហានជើងគោកម្នាក់ស្លាប់ ក្រោយពីលោតឆត្រយោងមិនរលាស់នៅវិទ្យាស្ថានកងទ័ពជើងគោកថ្លុកតាសេក។ នេះបើតាមការបញ្ជាក់របស់នាយឧត្តមសេនីយ៍ឈុំ សុជាតិ អ្នកនាំពាក្យក្រសួងការពារជាតិ។ លោកបន្ថែមថាពេលនេះក្រុមការងារស៊ើបអង្កេតកំពុងតែបន្តតាមដានមើលលើករណីនេះរកកំហុសបច្ចេកទេសផ្សេងទៀត។
ចុះផ្សាយនៅថ្ងៃ៖
ស្តាប់ - ០១:១៩
អ្នកនាំពាក្យក្រសួងការពារជាតិលោកឈុំ សុជាតិ បានបញ្ជាក់ប្រាប់វិទ្យុបារាំងថា មូលហេតុបឋមដែលបណ្តាលឲ្យសិក្ខាកាមម្នាក់នេះស្លាប់ ដោយសារតែឆត្រយោងមិនរលាស់ពេល ដែលលោតចេញពីយន្តហោះ។ ពេលនេះសាកសពត្រូវបានប្រគល់ឲ្យក្រុមគ្រួសាររៀបចំធ្វើបុណ្យតាមប្រពៃណី ដោយមានការឧបត្ថមមួយចំនួនពីក្រសួងការពារជាតិតាមគោលការណ៍។ ប៉ុន្តែលោកឈុំ សុជាតិ មិនបានបញ្ជាក់ទេថាក្រសួងការពារជាតិឧបត្ថមអ្វីនោះ។
ហេតុការណ៍នេះបានកើតឡើងនៅម៉ោង៧ និង៥២នាទី ព្រឹកថ្ងៃទី៦ ខែមករានេះ នៅពេលដែលមានការហ្វឹកហាត់លោតឆត្រយោងក្នុងវិញ្ញាសារលោតឆត្រយោងពេលបញ្ចប់កម្មសិក្សា។
លោកឈុំ សុជាតិបញ្ជាក់ទៀតថា ក្រោយពីបញ្ជូនសាកសពទៅឲ្យក្រុមគ្រួសារ ក៏មានការស៊ើបអង្កេតបន្ត ដើម្បីស្វែងរកមូលហេតុផ្សេងទៀត ក្រៅពីមូលហេតុបឋម ដែលថាឆត្រមិនរលាស់។ លោកបន្ថែមថាគេស្គាល់អត្តសញ្ញាណជនរងគ្រោះហើយ ប៉ុន្តែលោកមិនអាចផ្តល់ព័ត៌មាននេះដល់សាធារណជនបានទេ។ លោកលើកឡើងថាកន្លងមកពេលលោតឆត្រគឺតែងតែមានឆត្រតូចប្រើជំនួស ឆត្រធំ នៅពេលដែលមានបញ្ហា ប៉ុន្តែលោកមិនទាន់ទទួលបានព័ត៌មានលំអិតពីការធ្វើកោសល្យវិច្ច័យ លើករណីនេះនៅឡើយទេ។
សាក្សីម្នាក់ដែលចូលរួមក្នុងវគ្គលោតឆត្រយោងនោះ បានបញ្ជាក់ថាជនរងគ្រោះគឺជាមនុស្សស្លូតត្រង់ ហើយនៅសល់តែរយៈពេល១ឆ្នាំទៀតប៉ុណ្ណោះ ជនរងគ្រោះនឹងត្រូវបញ្ចប់វគ្គសិក្សារយៈពេល៤ឆ្នាំ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ