ឆ្នាំ២០១៨៖ អតីតបក្សប្រឆាំងប្តេជ្ញាពង្រឹងការតស៊ូទល់នឹងរដ្ឋាភិបាលកម្ពុជា ខណៈបក្សកាន់អំណាចប្តេជ្ញាការពារសន្តិភាព
តាមរយៈសារជូនពរឆ្នាំសកល ឆ្នាំ២០១៨ នៅថ្ងៃទី១ ខែមករានេះ អតីតមេដឹកនាំបក្សប្រឆាំង លោក សម រង្ស៊ី បានប្តេជ្ញាពង្រីក និងពង្រឹងការតស៊ូរបស់ខ្លួន ទាំងនៅក្នុងស្រុក ទាំងនៅក្រៅប្រទេស ទល់នឹងរដ្ឋាភិបាលកម្ពុជា ដោយបានអំពាវនាវឲ្យប្រជាពលរដ្ឋខ្មែរចួលរួមក្នុងការផ្សះផ្សាជាតិ និងលើកស្ទូយប្រជាធិបតេយ្យ។ ចំណែកបក្សកាន់អំណាចវិញបានប្តេជ្ញាដែរថា នឹងបន្តការពារសន្តិភាព និងថែរក្សាស្ថេរភាពនយោបាយសង្គមអោយបានល្អ។
ចុះផ្សាយនៅថ្ងៃ៖
ស្តាប់ - ០២:៤៨
លោក សម រង្ស៊ី អតីតមេដឹកនាំគណបក្សប្រឆាំងបានថ្លែងសារក្នុងឱកាសឆ្នាំថ្មីថា រូបលោក និងសហការីក្នុងជួរអតីតគណបក្សសង្គ្រោះជាតិ នឹងខិតខំ ធ្វើខ្លួនយ៉ាងណាឲ្យប្រជារាស្ត្រខ្មែរ ចាប់ផ្តើមបានឃើញនូវពន្លឺប្រជាធិបតេយ្យ និងយុត្តិធម៌ យ៉ាងពិតប្រាកដក្នុងឆ្នាំថ្មី ២០១៨ នេះ។
លោក សម រង្ស៊ី បានសរសេរក្នុងទំព័រហ្វេសប៊ុករបស់លោកទៀតថា ក្នុងកិច្ចការចំពោះមុខ បក្ស នឹងពង្រីក និងពង្រឹងការតស៊ូរបស់ខ្លួន ទាំងនៅក្នុងស្រុក និងទាំងនៅក្រៅប្រទេស ដើម្បីធ្វើឲ្យនយោបាយគាបសង្កត់ និងបង្ក្រាបរបស់រដ្ឋាភិបាលសព្វថ្ងៃ ទទួលបរាជ័យ ហើយត្រូវវិលបកថយក្រោយវិញ។ អតីតមេដឹកនាំបក្សប្រឆាំងរូបនេះ បញ្ជាក់ថា គណបក្សសង្គ្រោះជាតិ នឹងដំណើរការឡើងវិញជាប្រក្រតី ហើយនឹងចូលរួមក្នុងការបោះឆ្នោតជាតិ នៅខែកក្កដា ឆ្នាំ២០១៨នេះ។
សូមជម្រាបជូនថា កាលពីថ្ងៃទី១៦ ខែវិច្ឆិកា ឆ្នាំ២០១៧ គណបក្សសង្រ្គោះជាតិ ត្រូវបានតុលាការកំពូលសម្រេចរំលាយចោល និងហាមមន្ត្រី១១៨រូបរបស់បក្សនេះ មិនឲ្យធ្វើនយោបាយរយៈពេល៥ឆ្នាំ។ ជាការរំលាយគណបក្សប្រឆាំង ដែលទទួលរងការរិះគន់យ៉ាងខ្លាំងពីសហគមន៍អន្តរជាតិ រហូតធ្វើឲ្យមានការកាត់ជំនួយឧបត្ថមសម្រាប់ការបោះឆ្នោតជ្រើសតាំងតំណាងរាស្ត្រក្នុង២០១៨ ផងដែរ។
ក្រៅពីលោក សម រង្ស៊ី, លោក កឹម សុខ ដែលកំពុងជាប់ឃុំខ្លួននៅក្នុងពន្ធនាគារឯណោះវិញ ក៏បានចេញសារលិខិត ជូនពរដល់ប្រជាពលរដ្ឋក្នុងឱកាសឆ្នាំថ្មីនេះដែរ។ តាមរយៈលិខិតកម្រាស់ពីរទំព័រ លោក កឹម សុខា បានលើកឡើងភាគច្រើនពីការអនុវត្តរបស់រដ្ឋាភិបាលកម្ពុជាក្នុងឆ្នាំចាស់កន្លងទៅ ថាបានបន្សល់ទុកនូវវិបត្តិនយោបាយដ៏ធ្ងន់ធ្ងរនាពេលបច្ចុប្បន្ន ដោយធ្វើឲ្យលំហប្រជាធិបតេយ្យ និងការអនុវត្តប្រជាធិបតេយ្យដើរថយក្រោយ បន្ទាប់ពីមានការរំលាយគណបក្សប្រឆាំង។
ប្រធានអតីតបក្សប្រឆាំងរូបនេះ ក៏បានឆ្លៀត អំពាវនាវជាថ្មីម្តងទៀត ដល់អ្នកនយោបាយខ្មែរគ្រប់និន្នាការ និងប្រជាពលរដ្ឋខ្មែរទាំងអស់ រួមគ្នាប្រកាន់យកគោលការណ៍អហិង្សា និងចូលរួមយ៉ាងសកម្ម ក្នុងការផ្សះផ្សាជាតិ លើកស្ទួយប្រជាធិបតេយ្យ និងការគោរពសិទ្ធិមនុស្សនៅកម្ពុជា។
ផ្ទុយពីការលើកឡើងខាងលើនេះ ប្រមុខរដ្ឋាភិបាលកម្ពុជាលោក ហ៊ុន សែន នៅព្រឹកថ្ងៃទី១ ខែមករា ឆ្នាំ២០១៨នេះវិញ បានសរសេរសារក្នុងឱកាសឆ្នាំថ្មីនេះ តាមរយៈបណ្តាញសង្គមរបស់លោកថា “សន្តិភាព”បានផ្តល់ឱកាសកាន់តែច្រើនឡើងដល់ពលរដ្ឋក្នុងការចូលរួមប្រារព្ឋពិធីបុណ្យជាតិ និងអន្តរជាតិនានា ទោះបីនៅពេលយប់ ឬពេលថ្ងៃ ដោយគ្មានការភ័យខ្លាចឡើយ។ លោកបញ្ជាក់ថា នឹងរួមគ្នាបន្តការពារសន្តិភាព និងថែរក្សាស្ថេរភាពនយោបាយសង្គមអោយបានល្អ ដើម្បីជំរុញការអភិវឌ្ឍប្រទេសអោយកាន់តែរីកចម្រើន។
ក្រៅពីសារនយោបាយក្នុងឱកាសឆ្នាំសកលថ្មី ២០១៨នេះ ទាំងលោកនាយករដ្ឋមន្ត្រី ហ៊ុន សែន ទាំងលោក សម រង្ស៊ី និងទាំងលោក កឹម សុខា បានជូនពរប្រជាពលរដ្ឋឲ្យមានសេចក្តីសុខសុភមង្គលក្នុងក្រុមគ្រួសារ សុខភាពល្អ និងមានលាភសំណាងល្អគ្រប់ៗគ្នា និងទទួលបានជោគជ័យ ក្នុងកិច្ចការ និងមុខរបរទាំងអស់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ