កម្ពុជា-ថៃ តភ្ជាប់ស្ពានព្រំដែនខេត្តបន្ទាយមានជ័យក្នុងគោលដៅជំរុញពាណិជ្ជកម្ម និងទេសចរណ៍
ប្រទេសកម្ពុជា និងថៃ នៅថ្ងៃចន្ទនេះ បានចាក់បេតុងតភ្ជាប់មុខតំណស្ពានមិត្តភាពកម្ពុជា-ថៃ (ស្ទឹងបត់-បានណងអៀន) ព្រំប្រទល់ខេត្តបន្ទាយមានជ័យ និងខេត្តស្រះកែវ។ ការតភ្ជាប់ស្ពានមិត្តភាពព្រំដែននៅពេលនេះ ត្រូវបានមេដឹកនាំនៃប្រទេសជិតខាងទាំងពីរ អត្ថាធិប្បាយថា ជាការជំរុញពាណិជ្ជកម្ម និងទេសចរណ៍ស្របតាមការគិតគូររបស់សហគមន៍អាស៊ាន។
ចុះផ្សាយនៅថ្ងៃ៖
ស្តាប់ - ០២:១៧
លោកនាយករដ្ឋមន្រ្តី ហ៊ុន សែន បានថ្លែងថា ការសាងសង់ស្ពានមិត្តភាព ស្ទឹងបត់-បានណងអៀន នៅពេលនេះបានផ្តល់អត្ថប្រយោជន៍ដល់ប្រជាជននៃប្រទេសទាំងពីរក៏ដូចជាប្រជាជនក្នុងមហាអនុតំបន់មេគង្គ ដើម្បីតភ្ជាប់ទីក្រុងបាងកក-ភ្នំពេញ និងហូជីមិញ។ ការតភ្ជាប់ស្ពានមិត្តភាពនេះ ត្រូវបានលោក ហ៊ុន សែន អត្ថាធិប្បាយថា ជាការជំរុញពាណិជ្ជកម្ម និងទេសចរណ៍ ស្របតាមការគិតគូររបស់សហគមន៍អាស៊ាន។
ជាមួយគ្នានោះ លោកប្រាយុទ្ធ ចាន់អូចា នាយករដ្ឋមន្រ្តីថៃ បានថ្លែងថា ក្រៅពីការជំរុញពាណិជ្ជកម្ម ការវិនិយោគ និងការដឹកជញ្ជួនរវាងប្រទេសទាំងពីរ លោកយល់ថា ស្ពាននេះ ជាការភ្ជាប់ភាពជិតស្និទ្ធរវាងប្រជាជនទាំងពីរស្របតាមសេចក្តីប្រកាសរបស់អាស៊ាន។ អាស៊ានដែលបានផ្តោតលើការតភ្ជាប់ប្រជាជនតាមរយៈការកសាងផ្លូវ ការដឹកជញ្ជួន និងការជំរុញកិច្ចសហការ វិស័យសេដ្ឋកិច្ច សង្គមវប្បធម៌ ការអប់រំ កសិកម្ម និងទេសចរណ៍ ឆ្ពោះទៅការអភិវឌ្ឍព្រមៗគ្នា។
គួរឲ្យដឹងថា ស្ពាន កម្ពុជា-ថៃ នេះគឺជាស្ពានធំទី២ បណ្តោយ ៦២០ម៉ែត្រ និងទទឹង ១៧ម៉ែត្រ កសាងដោយកងទ័ពភូមិន្ទថៃ ក្រោមជំនួយឥតសំណងជាង ១៩លានដុល្លារអាមេរិក ខណៈកម្ពុជា ចូលរួមថវិកាបដិភាគសម្រាប់ការដោះស្រាយផលប៉ះពាល់ ការបោសសម្អាតមីន យុទ្ធភ័ណ្ឌមិនទាន់ផ្ទុះ និងពន្ធអាករផ្សេងៗ។
ក្រៅពីនេះសមភាគីទាំងពីរបានចុះហត្ថលេខាលើកិច្ចព្រមព្រៀងប្រតិបត្តិការរួមគ្នាលើការដឹកជញ្ជូនផ្លូវដែកឆ្លងកាត់ព្រំដែន និងពិធីប្រគល់-ទទួលក្បាលរថភ្លើង (DMU)មកឲ្យកម្ពុជាផងដែរ។
លើសពីនេះទៀត កម្ពុជាក៏ទទួលបានហិរញ្ញប្បទានសម្បទានពីថៃប្រមាណ ២៦.៤២លានដុល្លារអាមេរិក សម្រាប់សាងសង់អគារច្រកទ្វារត្រួតពិនិត្យព្រំដែន និងផ្លូវតភ្ជាប់ សំណង់អគារអន្តេវាសិកដ្ឋាន ឃ្លាំង និងទីលានកុងតឺន័រ ការជួសជុលកែលម្អផ្លូវចាស់ និងសំណង់កាត់បន្ថយគ្រោះទឹកជំនន់។
នៅចុងបញ្ចប់នៃកម្មវិធី ប្រមុខរដ្ឋាភិបាលកម្ពុជា លោក ហ៊ុន សែន និងលោក ប្រាយុទ្ធ ចាន់អូចា ធ្វើដំណើររួមគ្នាតាមរថភ្លើងចេញពីស្ថានីយបានក្លងលឹករបស់ថៃ ឆ្ពោះមកកាន់ស្ថានីយរថភ្លើងរបស់កម្ពុជានៅក្នុងក្រុងប៉ោយប៉ែត ហើយមេដឹកនាំទាំងពីរធ្វើការពិសារអាហារពេលថ្ងៃត្រង់រួមគ្នា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ