កម្ពុជា-វៀតណាមនឹងពន្លឿនដំណោះស្រាយបញ្ហាព្រំដែនជាមួយច្បាប់អន្តរជាតិ
ភាគីទាំងពីរបានពិភាក្សាគ្នាអំពីវិធានការនានា ដើម្បីពន្លឿនការគូសបន្ទាត់ព្រំដែន ដែលនៅសល់ ជាមួយច្បាប់អន្តរជាតិ និងភាពជាក់ស្តែង។ នេះបើតាមលទ្ធផលនៃកិច្ចប្រជុំ ដែលធ្វើឡើងកាលពីថ្ងៃទី១៨ ដល់ថ្ងៃទី២០ ខែតុលា ក្នុងប្រទេសវៀតណាម ដោយគណៈកម្មាធិការព្រំដែនប្រទេសទាំងពីរ។ ប្រភពព័ត៌មានវៀតណាមឲ្យដឹងប្រទេសទាំងពីរក៏គ្រោងនឹងដោះដូរដី តាមខេត្តជាប់ព្រំដែនផងដែរ។
ចុះផ្សាយនៅថ្ងៃ៖
ស្តាប់ - ០២:២៣
បើតាមគេហទំព័រព័ត៌មានវៀតណាម ភាគីទាំងពីរបានពិភាក្សាគ្នាអំពីវិធានការនានា ដើម្បីពន្លឿនលើការកំណត់គំនូសបន្ទាត់ព្រំដែន ដែលនៅសល់តាមច្បាប់អន្តរជាតិ និងភាពជាក់ស្តែង។ ក្រៅពីនេះតាមរយៈកិច្ចប្រជុំនោះ ក្រុមការងារព្រំដែនប្រទេសទាំងពីរបានយល់ព្រមអញ្ជើញភាគីអន្តរជាតិ ដើម្បីជួយលើការងារកំណត់ព្រំដែនដែលសេសសល់។ ក៏មានដែរការជជែកគ្នាពីការដោះដូរដីក្នុងតំបន់មួយចំនួនរវាងប្រទេសកម្ពុជា និងប្រទេសវៀតណាមនៅតាមខេត្តជាប់ព្រំដែន។
ភាគីកម្ពុជាដែលបានចូលរួមក្នុងកិច្ចប្រជុំនោះ ដឹកនាំដោយលោកវ៉ា គឹមហុង ប្រធានគណៈកម្មាធិការកិច្ចការព្រំដែនកម្ពុជា ចំណែកភាគីវៀតណាមដឹកនាំដោយអនុរដ្ឋមន្រ្តីការបរទេស និងជាប្រធានគណៈកម្មាធិការព្រំដែនជាតិវៀតណាមលោកលេ ហ៊យ ជុង(Lê Hoài Trung)។
ក្រុមការងារព្រំដែនកម្ពុជា-វៀតណាម នឹងជួបគ្នានៅដើមខែវិច្ឆកាខាងមុខនេះ ដើម្បីកំណត់ទីតាំងបង្គោលព្រំដែនចំនួន៤ស្ថិតក្នុងខេត្តមណ្ឌលគីរី និងខេត្តដាកឡាក់(Đắk Lắk) រួមទាំងខេត្តស្វាយរៀង និងខេត្តតៃនិញ(Tây Ninh)។ នេះបើតាមការចុះផ្សាយរបស់គេហទំព័រព័ត៌មានវៀតណាម(VietNamNews) កាលពីថ្ងៃទី២១ ខែតុលា ក្រោយពីក្រុមការងារព្រំដែនកម្ពុជា-វៀតណាមបានជួបគ្នាកាលពីថ្ងៃទី១៨ ដល់ថ្ងៃទី២០ ខែតុលា ក្នុងទីក្រុងហូជីមិញ ប្រទេសវៀតណាម។
នៅថ្ងៃទី២៣ ខែតុលានេះ វិទ្យុបារាំងអន្តរជាតិមិនអាចទាក់ទងសុំការបំភ្លឺបន្ថែមពីលោកវ៉ា គឹមហុងប្រធានគណៈកម្មាធិការកិច្ចការព្រំដែនកម្ពុជា បានទេ ដោយលោកបានបញ្ជាក់ថាលោកកំពុងជាប់ប្រជុំ។ ចំណែកលោកស្រី កុយ ពិសី អនុប្រធានគណៈកម្មាធិការទទួលបន្ទុកកិច្ចការព្រំដែនរបស់រដ្ឋាភិបាលកម្ពុជា បានបដិសេធក្នុងការអធិប្បាយលើលទ្ធផលនៃជំនួបរវាងភាគីទាំងពីរ។
បើតាមគេហទំព័រព័ត៌មានវៀតណាមដដែលបានឲ្យដឹងទៀតថាភាគីទាំងពីរបានតាំងចិត្ត ក្នុងការបញ្ចប់ការបោះបង្គោលព្រំដែន ដែលនៅសល់១៧ភាគរយទៀត។ ការបោះបង្គោលពំ្រដែននេះ គឺអនុលោមតាមសន្ធិសញ្ញានៃការកំណត់ព្រំដែនឆ្នាំ១៩៨៥ និងសន្ធិសញ្ញាបំពេញបន្ថែមឆ្នាំ២០០៥។
សូមបញ្ជាក់ថាកាលពីថ្ងៃទី២៩ និង៣០ ខែសីហាកន្លងទៅក្រុមការងារព្រំដែននៃប្រទេសទាំងពីរបានជួបគ្នានៅទីក្រុងភ្នំពេញ ក្រោយពីកម្ពុជាបានផ្ញើកំណត់ទូតចំនួន២៣ និងលិខិតចំនួន១ទៅកាន់វៀតណាម ដើម្បីតវ៉ាអំពីការរំលោភបំពានតាមបន្ទាត់ព្រំដែនកម្ពុជា-វៀតណាមដែលមាននៅក្នុងខេត្តរតនៈគីរី មណ្ឌលគីរី ស្វាយរៀង កណ្តាល និងខេត្តតាកែវជាដើម។ កិច្ចប្រជុំចុងក្រោយរវាងក្រុមការងារព្រំដែនប្រទេសទាំងពីរក្នុងទីក្រុងភ្នំពេញមិនអាចចេញ សេចក្តីថ្លែងការណ៍រួមគ្នាបានទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ