កម្ពុជាស្នើឱ្យការបញ្ជូនពលរដ្ឋខ្មែរចេញពីទឹកដីអាមេរិក ធ្វើឡើងក្នុងគោលការណ៍ស្ម័គ្រចិត្ត
កម្ពុជា គ្រោងសើរើកិច្ចព្រមព្រៀងជាមួយអាមេរិក ដែលបានចុះហត្ថលេខា កាលពីឆ្នាំ ២០០២ ទាក់ទងទៅនឹងការបញ្ជូន និងទទួលយកពលរដ្ឋខ្មែរ ទៅរស់នៅទឹកដីអាមេរិក។ ជាការសើរើ និង ពិនិត្យឡើងវិញ ប្រសិនបើរកឃើញថា ការបញ្ជូនពលរដ្ឋខ្មែរត្រលប់មកវិញនោះ រងការបង្ខិតបង្ខំពីសំណាក់រដ្ឋាភិបាលអាមេរិក។ នេះបើតាមក្រសួងមហាផ្ទៃ។ ប្រភពដដែលនេះបានឱ្យដឹងថាគម្រោងសើរើនេះ បន្ទាប់ពីក្រសួងមហាផ្ទៃបានឱ្យដឹងថា ពលរដ្ឋខ្មែរ ៣៦នាក់និងត្រូវបញ្ជួនមកកម្ពុជាក្នុងពេលឆាប់ៗនេះ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៣៦
ក្រសួងមហាផ្ទៃ បានឱ្យដឹងថា អ្វីដែលកម្ពុជាចង់បាននៅក្នុងកិច្ចព្រមព្រៀងថ្មីនោះ គឺស្នើដល់អាមេរិកធ្វើការចាប់បញ្ជូន ដោយឈរលើគោលការណ៍ស្ម័គ្រចិត្ត គ្មានការបង្ខិតបង្ខំ។ ព្រោះកន្លងមកសហរដ្ឋអាមេរិកបានចាប់បង្ខំឱ្យពលរដ្ឋខ្មែរ ដែលមានរឿងរ៉ាវបន្តិចបន្តួចឱ្យត្រឡប់មកកម្ពុជាវិញ ជាហេតុធ្វើឱ្យពួកគេ បែកពីឱពុកម្តាយ ប្រពន្ធ កូន ។ ហើយមួយទៀត គឺពលរដ្ឋខ្មែរនៅសហរដ្ឋអាមេរិកមិនសប្បាយចិត្ត ថ្វីត្បិតតែពួកគេមិនមានសញ្ជាតិអាមេរិកមែន ប៉ុន្តែពួកគេមានប្រពន្ធមានកូន ផ្ទះ ដីធ្លី នៅទីនោះរួចទៅហើយ ។
យ៉ាងណាក៏ដោយ លោក ខៀវ សុភ័គ បានលើកឡើងថា ពលរដ្ឋខ្មែរទាំង ៣៦នាក់ដែលធ្វើនឹងធ្វើមាតុភូមិនិវត្តន៍មកកម្ពុជាក្នុងពេលឆាប់ៗនេះ គឺព្រមព្រៀងស្ម័គ្រចិត្តមករស់នៅកម្ពុជា ដោយមិនបានរងការបង្ខិតបង្ខំនោះទេ ។
លោកបញ្ចាក់ថា ពីដំបូងឡើយ ភាគីសហរដ្ឋអាមេរិក បានស្នើសុំបញ្ជូនពលរដ្ឋចំនួន ៤៦នាក់ ក៏ប៉ុន្តែក្រោយពីមន្ត្រីកម្ពុជា សម្រេចទទួលយកពលរដ្ឋ ៣៦នាក់ បន្ទាប់ពីការសាកសួរទៅកាន់មនុស្ស ១០នាក់ផ្សេងទៀតត្រូវបានរកឃើញថា ពួកគេមិនមែនជាជនជាតិខ្មែរពិតប្រាកដ។
ជំរាបជូនថា កិច្ចព្រមព្រៀងបញ្ជូន និងទទួលយកពលរដ្ឋខ្មែរនេះ ត្រូវបានចុះហត្ថលេខារវាងរដ្ឋាភិបាលសហរដ្ឋអាមេរិក និងកម្ពុជា កាលពីឆ្នាំ ២០០២។ ហើយគិតចាប់តាំងពីពេលនោះមក មានពលរដ្ឋខ្មែរ ប្រមាណជាង ៥០០នាក់ហើយ ដែលអាមេរិកបានបញ្ជូនមកកម្ពុជាវិញ។
ជាការកត់សម្គាល់ ការវិលត្រឡប់របស់ប្រជាពលរដ្ឋខ្មែរទាំង ៣៦នាក់មកកម្ពុជាវិញនាពេលនេះ ក៏ស្របពេលដែលរដ្ឋាភិបាលថ្មីរបស់ លោក ដូណាល់ត្រាំ កំពុងបន្តរឹតបន្តឹងការចេញចូលប្រជាពលរដ្ឋរបស់ប្រទេសមួយចំនួន ជាពិសេសប្រទេសដែលមានប្រជាពលរដ្ឋភាគច្រើនជាអ្នកកាន់សាសនាឥស្លាម ក្នុងន័យការពារផលប្រយោជន៍ និង សន្តិសុខ របស់អាមេរិក។
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ