ខ្ចីលុយដើម្បីបង្កើតលុយ ឬខ្ចីលុយដើម្បីបង្កើតបំណុល!
ចុះផ្សាយនៅថ្ងៃ៖
ស្តាប់ - ០៥:៣១
កម្ពុជាគឺជាប្រទេសកំពុងអភិវឌ្ឍន៍។ អញ្ចឹងហើយចំណេះដឹងរបស់ប្រជាជនក៏នៅមានកម្រិត។ បញ្ហាមួយនៅក្នុងប្រទេសនេះគឺ ចំណេះដឹងក្នុងការប្រើប្រាស់លុយកាក់របស់ប្រជាជន។ ជាក់ស្តែង ប្រជាជនកម្ពុជា បច្ចុប្បន្នហាក់កំពុងពេញនិយមខ្លាំងក្នុងការប្រើប្រាស់លុយខ្ចីពីអង្គការ គ្រឹះស្ថានមីក្រូហិរញ្ញវត្ថុ និងធនាគារជាដើម។ ប៉ុន្តែបញ្ហានៅត្រង់ថា មានប្រជាជនមិនច្រើននោះទេ ដែលយល់ដឹងច្បាស់ពីការប្រើប្រាស់លុយឲ្យបានត្រឹមត្រូវ និងមាន ប្រសិទ្ធភាព។ ការណ៍នេះបានធ្វើឲ្យលោកនាយករដ្ឋមន្ត្រីចេញមុខប្រកាសពីភាពខុសឆ្គង និងភាពធូររលុងក្នុងការផ្តល់ ប្រាក់កម្ចីដល់ប្រជាពលរដ្ឋក្រីក្រនៅតាមតំបន់ជនបទ ថាបានធ្វើឲ្យពួកគាត់កាន់តែមានជីវភាពយ៉ាប់យឺន និងខ្លះទៀតត្រូវបានរឹបអូសទ្រព្យសម្បត្តិ ដោយសារតែបានខ្ចីបុលពីស្ថាប័នដែលគិតតែពីប្រាក់ចំណេញ និងគ្មានអាជ្ញាបណ្ណស្របច្បាប់។
គ្រឹះស្ថានមីក្រូហិរញ្ញវត្ថុត្រូវបានបង្កើតឡើង ដើម្បីផ្តល់ភាពងាយស្រួលក្នុងការផ្តល់ប្រាក់កម្ចីដល់ប្រជាពលរដ្ឋដែលមាន កម្រិតជីវភាពមធ្យម និងក្រីក្រ ដែលគ្មានលទ្ធភាពនឹងទទួលបានប្រាក់កម្ចីពីធនាគារ។ ព្រោះថាប្រជាជនទាំងអស់នោះ គ្មានប្រវត្តិប្រាក់ចំណូលច្បាស់លាល់ គ្មានការងារអចិន្ត្រៃយ៍ ដែលមិនអាចបំពេញលក្ខខណ្ឌក្នុងការខ្ចីលុយពីធនាគារ ដែលមានអត្រាការប្រាក់មួយទាប។ ជាទូទៅគ្រឹះស្ថានមីក្រូហិរញ្ញវត្ថុនៅកម្ពុជា ផ្តល់ប្រាក់កម្ចីក្នុងអត្រាការប្រាក់មួយខ្ពស់ ជាងធនាគារ ហើយលក្ខខណ្ឌក្នុងការខ្ចីក៏មានលក្ខណៈងាយស្រួលជាងធនាគារផងដែរ។
យោងតាមសមាគមន៍មីក្រូហិរញ្ញវត្ថុកម្ពុជាCMA បានឲ្យដឹងថាក្នុងឆ្នាំ២០១៦នេះ ខ្លួនមានសមាជិក៦២ ក្នុងនោះមានគ្រឹះស្ថានមីក្រូហិរញ្ញវត្ថុMFI ចំនួន៨ ដែលមានអាជ្ញាបណ្ណទទួលបានប្រាក់បញ្ញើ និងផ្តល់ប្រាក់កម្ចី។ ដោយឡែក MFI ចំនួន៤៩ ទៀតផ្តល់តែសេវាកម្ចីតែប៉ុណ្ណោះ ខណៈដែលប្រតិករផ្សេងទៀតគ្មានអាជ្ញាបណ្ណ ប៉ុន្តែបានចុះបញ្ជីនៅធនាគារ ជាតិកម្ពុជាNBC សម្រាប់ការផ្តល់កម្ចី។ ក្រៅពីនេះក៏នៅមានអង្គការរាប់រយផ្សេងទៀត ដែលកំពុងតែប្រតិបត្តិការផ្តល់ ប្រាក់កម្ចីដល់ប្រជាពលរដ្ឋនៅតាមជនបទ គ្រប់ច្រកល្ហកទាំងអស់។ ហើយនៅក្នុងនោះក៏មានស្ថាប័នមួយចំនួនត្រូវ បានបង្កើតឡើងដើម្បីស្វែងរកប្រាក់ចំណេញសុទ្ធសាធ ប៉ុន្តែជ្រកក្រោមស្លាកអង្គការ។ ប៉ុន្តែវាបានបង្កលក្ខណៈងាយ ស្រួលដល់ប្រជាពលរដ្ឋនៅតាមទីជនបទក្នុងការ ទទួលបានប្រាក់កម្ចី ក្នុងអត្រាការប្រាក់មួយយ៉ាងខ្ពស់ទៅវិញ។
សូមកុំភ្លេចថា បើទោះបីជាអង្គការផ្តល់ប្រាក់កម្ចី គ្រឹះស្ថានមីក្រូហិរញ្ញវត្ថុ និងធនាគារជាដើម ត្រូវបានបង្កើតឡើងដើម្បី ជួយសម្រួលដល់កម្រិតជីវភាពរបស់ប្រជាជនខ្មែរក៏ដោយ ក៏ប៉ុន្តែពួកគេគឺជាស្ថាប័នដែលស្វែងរកប្រាក់ចំណេញ។ ជាក់ស្តែងដូចជាធនាគារ និងគ្រឹះស្ថានមីក្រូហិរញ្ញវត្ថុជាច្រើននៅកម្ពុជា បានប្រកាសពីប្រាក់ចំណេញរបស់ខ្លួនយ៉ាងច្រើន សម្បើមក្នុងមួយឆ្នាំៗ នៅប៉ុន្មានឆ្នាំចុងក្រោយនេះ ដោយគ្រាន់តែរកស៊ីក្នុងការបង្វិលប្រាក់ចុះឡើងៗ។ អញ្ចឹងហើយ ទាមទារឲ្យប្រជាពលរដ្ឋ ដែលមានចំណងចង់ប្រើប្រាស់លុយពីស្ថាប័នអស់ទាំងនេះ ត្រូវតែធ្វើការពិចារណា និងថ្លឹងថ្លែង ឲ្យបានហ្មត់ចត់បំផុត មុននឹងសម្រេចចិត្តទៅខ្ចីលុយយកមកបង្កើតអាជីវកម្ម ឬក៏ដោះស្រាយបញ្ហាណាមួយនៅក្នុងគ្រួ សារនោះ។ ត្រូវសួរថា តើនៅពេលដែលយកលុយនោះបានហើយ មានលទ្ធភាពនឹងសងតាមកាលកំណត់ ហើយអាច និងបង្កើតជាលុយតកូនតចៅដល់ខ្លួន ឬក៏កាន់តែធ្វើឲ្យខ្លួនមានបំណុលកាន់តែច្រើនជាងមុនទៅវិញ។
ចំណុចទាំងអស់នេះហើយ គឺជាចំណុចមួយដែលប្រជាពលរដ្ឋខ្មែរគួរតែធ្វើការពិចារណាឡើងវិញ មុននឹងសម្រេចចិត្ត ទៅខ្ចីលុយយកមកធ្វើអ្វីមួយ។ វាអាចជារឿងមួយល្អមួយផ្នែកដែរ ដែលប្រជាពលរដ្ឋខ្មែរមួយចំនួន អាចខ្ចីលុយយកមក ទិញសម្ភារៈប្រើប្រាស់ទំនើបៗ ទាន់សម័យតាមរយៈការបង់រំលោះ។ ហើយវាក៏បានក្លាយជារបត់មួយថ្មីផងដែរនៅក្នុង សង្គមខ្មែរ ដែលកាលពីមុន មុននឹងទិញរបស់អ្វីបានមួយនោះ គឺត្រូវមានសន្សំលុយយ៉ាងយូរ ដើម្បីមានលុយទាំងដុល ទៅទិញរបស់មួយនោះបានដោយខ្លួនឯង។ ប៉ុន្តែបច្ចុប្បន្ននេះមិនចាំបាច់ធ្វើអញ្ចឹងទៀតនោះទេ ព្រោះថាមានសេវាកម្ម បង់រំលោះជាច្រើនបានជួយសម្រួលដល់ប្រជាជន។ តក្តានេះបានធ្វើឲ្យប្រជាពលរដ្ឋបង្កើតបំណុលខ្លួនឯង ដោយមិន ដឹងខ្លួននោះទេ។
ប៉ុន្តែបញ្ហាគឺនៅត្រង់ថា ប្រជាពលរដ្ឋមួយចំនួនមិនបានយល់ថា តើប្រាក់ឬក៏លុយដែលពួកគាត់បានខ្ចីមកពីស្ថាប័នអស់ ទាំង នោះគឺយកមកបង្កើតជាលុយវិញ ដោយការបើកធ្វើជាអាជីវកម្មនានា ឬក៏ខ្ចីមកដើម្បីចាយវាយ និងដោះទាល់មួយ ពេលៗ នៅក្នុងក្រុមគ្រួសារ ដែលជាការយកលុយមកបង្កើតជាបំណុលទៅវិញនោះទេ។ កង្វះចំណេះដឹងក្នុងការ ប្រើប្រាស់ លុយកាក់វាពិតជាបញ្ហាមួយធំណាស់សម្រាប់ប្រជាពលរដ្ឋខ្មែរ ដែលភាគច្រើនជាប្រជាពលរដ្ឋក្រីក្រនោះ។
ដើម្បីរួមចំណែកក្នុងការទប់ស្កាត់ និងការពារកុំឲ្យបញ្ហានេះរីកកាន់តែធំឡើង គឺត្រូវបានការចូលរួមពីគ្រប់ភាគី ដែលរាប់តាំងពីរដ្ឋាភិបាល អ្នកពាក់ព័ន្ធនានា និងប្រជាពលរដ្ឋកម្ពុជាផ្ទាល់។ ទី១៖ រដ្ឋាភិបាលគួរតែពង្រឹង និងចាត់វិធានការឲ្យ បានតឹងរឹងចំពោះស្ថាប័នមីក្រូហិរញ្ញវត្ថុណា ដែលធ្វើការគ្មានវិជ្ជាជីវៈ ដោយបង្កើតឡើងមកគ្រាន់តែចង់ទទួល បានប្រាក់ ចំណេញតែមួយមុខ ដោយមិនបានគិតគូរពីផលលំបាកទៅថ្ងៃមុខរបស់ប្រជាពលរដ្ឋ។ រដ្ឋាភិបាល គួរតែផ្សព្វផ្សាយពី បញ្ហានេះទៅកាន់ថ្នាក់ក្រោមជាតិ ដែលមានដូចជាអាជ្ញាធរនៅតាមភូមិស្រុកនានា និងជាពិសេស គឺមេភូមិនីមួយៗ ឲ្យមានការប្រុងប្រយ័ត្នខ្ពស់ ក្នុងការជួយស៊ីញ៉េ គាំទ្រឲ្យប្រជាពលរដ្ឋខ្ចីលុយបាន។ មុននឹងស៊ីញ៉េ ត្រូវតែពិនិត្យ និងសិក្សាមើលពីលទ្ធភាពរបស់ប្រជាជននៅក្នុងភូមិរបស់គាត់ឲ្យបានច្បាស់លាស់។
ទី២៖ ស្ថាប័នមីក្រូហិរញ្ញវត្ថុខ្លួនឯងផ្ទាល់ត្រូវតែដឹងច្បាស់ថា ខ្លួនបង្កើតឡើងដើម្បីរកប្រាក់ចំណេញតែមួយមុខ គឺក៏ចង់ ចូលរួមចំណែកលើកកម្ពស់ជីវភាពប្រជាពលរដ្ឋ។ ស្ថាប័នផ្ទាល់ត្រូវតែប្រកាន់នូវគោលការណ៍ធ្វើអាជីវកម្មប្រកបដោយ គុណធម៌ និងមានវិជ្ជាជីវៈ ទើបអាចរស់បានយូរ និងបង្កើតកេរ្តិ៍ឈ្មោះនៅក្នុងសង្គម។ ជាងនេះទៅទៀត ស្ថាប័នមីក្រូហិរញ្ញវត្ថុនានាក៏អាចបង្កើតជាយុទ្ធនាការផ្សេងៗ ដែលបង្ហាញពីទំនួលខុសត្រូវក្នុងសង្គមតាមរយៈការជួយបណ្តុះ បណ្តាលប្រជាពលរដ្ឋឲ្យយល់ដឹងកាន់តែច្បាស់ពីបញ្ហាអ្វីមួយនៅក្នុងសង្គម។ ព្រោះថាវាក៏ជាផ្នែកមួយ ក្នុងការជួយ លើកកម្ពស់កេរ្តិ៍ឈ្មោះ និងម៉ាកយីហោរបស់ខ្លួនផងដែរ។
និងទី៣៖ គឺប្រជាពលរដ្ឋផ្ទាល់តែម្តង ត្រូវស្គាល់ឲ្យបានច្បាស់ពីស្ថាប័នដែលខ្លួនចង់ទទួលបានប្រាក់កម្ចី ដោយមិនត្រូវគិតតែពីលក្ខខណ្ឌក្នុងការទទួលបានប្រាក់កម្ចីនោះទេ ប៉ុន្តែក៏ត្រូវគិតពីកេរ្តិ៍ឈ្មោះរបស់ស្ថាប័ន និងអត្រាការប្រាក់ផងដែរ ។ ហើយត្រូវដឹងថាខ្លួនឯងអាចមានលទ្ធភាពសងប្រាក់នោះដោយគ្មានបញ្ហាដែរឬទេ។ ហើយប្រសិនបើមិនយល់ច្បាស់ ពីលំហូរសាច់ប្រាក់ប្រចាំថ្ងៃរបស់ខ្លួន អាចពិភាក្សាជាមួយនឹងមន្ត្រីជំនាញរបស់ស្ថាប័នមីក្រូហិរញ្ញវត្ថុទាំងអស់នោះ ដើម្បីជួយសិក្សា និងវាយតម្លៃថាតើ ខ្លួនអាចមានលទ្ធភាពខ្ចី ហើយសងវិញតាមកាលកំណត់ដែរឬទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ