បន្ទាប់ពីស្ងាត់ស្ងៀមមួយរយៈធំ តុលាការកំពូលលើកយកសំណុំរឿង លោក អ៊ុំ សំអាន មកបើកសវនាការ
តុលាការកំពូលនៅព្រឹកថ្ងៃសុក្រនេះ បានបើកសវនាការជំនុំជម្រះលើសំណុំរឿងលោក អ៊ុំ សំអាន តំណាងរាស្ត្រនៃអតីតគណបក្សសង្គ្រោះជាតិ។ សវនាការនេះ គឺធ្វើឡើងដើម្បីឲ្យតុលាការកំពូលទម្លាក់ចោល បទចោទប្រកាន់របស់សាលាដំបូងរាជធានីភ្នំពេញ ដែលថា លោក អ៊ុំ សំអាន មានចេតនាបង្កភាពវឹកវរធ្ងន់ធ្ងរ ដល់សន្តិសុខសង្គម និងញុះញង់ឱ្យមានការរើសអើង ជាតិសាសន៍ តាមរយៈការសរសេរ និងអត្ថាធិប្បាយពាក់ព័ន្ធផែនទី សន្ធិសញ្ញាព្រំដែនកម្ពុជា វៀតណាម ។ ប៉ុន្តែមកដល់ម៉ោងនេះ តុលាការកំពូលនៅមិនទាន់សម្រេចបែបណានៅឡើយទេ។ ឆ្លៀតពេលនេះ អេង គីមហុង សូមរម្លឹកឡើងវិញបន្តិចដែលនាំឲ្យលោក អ៊ុំ សំអាន ជាប់ពន្ធនាគារ ។
ចុះផ្សាយនៅថ្ងៃ៖
ស្តាប់ - ០២:១៣
គេនៅចាំថា លោក អ៊ុំ សំអាន តំណាងរាស្ត្រនៃអតីតគណបក្សសង្គ្រោះជាតិបានបង្ហាញសកម្មភាពជាច្រើនទាក់ទងបញ្ហាព្រំដែន រហូតត្រូវបានសមត្ថកិច្ចចាប់ខ្លួនក្នុងខេត្តសៀមរាប កាលពីថ្ងៃទី១១ ខែមេសា ឆ្នាំ២០១៦ បន្ទាប់ពីលោកបានវិលត្រលប់មកពីសហរដ្ឋអាមេរិកវិញ។ ជុំវិញការថ្លែងរបស់លោក អ៊ុំ សំអាន ពាក់ព័ន្ធបញ្ហាព្រំដែននេះត្រូវបានចាត់ទុកជារឿងមិនត្រឹមត្រូវដែលមានចេតនាញុះញង់។ ហើយមន្ត្រីអភិបាលបានចាត់ទុកករណីនេះថា គឺជាបទល្មើសជាក់ស្តែង។ រំលងមួយថ្ងៃ ពោលគឺនៅថ្ងៃទី១២ មេសា គាត់ត្រូវបានព្រះរាជអាជ្ញាអមសាលាដំបូងរាជធានីភ្នំពេញចោទប្រកាន់ពីបទញុះញង់បង្កភាពវឹកវរធ្ងន់ធ្ងរដល់សន្តិសុខសង្គម តាមមាត្រា៤៩៥ និងបទញុះញង់ឲ្យមានការរើសអើង តាមមាត្រា៤៩៦ នៃក្រមព្រហ្មទណ្ឌកម្ពុជា និងបញ្ជូនទៅឃុំខ្លួននៅក្នុងពន្ធនាគារព្រៃសតែម្តង។
ក្រោយរងការចោទប្រកាន់ នឹងបញ្ចូនទៅឃុំខ្លួន មេធាវីលោក អ៊ុំ សំអាន បានដាក់ពាក្យបណ្ដឹងដើម្បីឲ្យលោក អ៊ុំ សំអាន បាននៅក្រៅឃុំជាបន្តបន្ទាប់។ តែសរុបទៅតុលាការគ្រប់ជាន់ថ្នាក់របស់ប្រទេសកម្ពុជាតាំងពីសាលាដំបូង រហូតដល់តុលាការកំពូល បានបដិសេធបណ្ដឹងសុំនៅក្រៅឃុំរបស់មេធាវីលោក អ៊ុំ សំអាន ឈានដល់ការបិទសំណុំរឿងនៅក្រៅឃុំនេះទៀតផង។ គិតមកដល់ខែកុម្ភៈឆ្នាំ២០១៨នេះ លោក អ៊ុំ សំអាន ត្រូវបានជាប់ឃុំនៅក្នុងពន្ធនាគារ១ឆ្នាំ១ខែហើយ។
គួរបញ្ជាក់ថា ទាំងសាលាដំបូងរាជធានីភ្នំពេញ និង សាលាឧទ្ធរណ៍ សម្រេចដូចគ្នាផ្តន្ទាទោស លោក អ៊ុំ សំអាន ដាក់ពន្ធនាគារ រយៈពេល ២ឆ្នាំ ៦ខែ និងពិន័យជាប្រាក់ ចំនួន ៤លាន រៀល ក្រោមការចោទប្រកាន់ ចំនួនពីរបទល្មើស ។
លោក អ៊ុំ សំអាន គឺជាមន្ត្រីជាន់ខ្ពស់នៃអតីតគណបក្សសង្គ្រោះជាតិមួយរូបក្នុងចំណោមមន្ត្រីជិត២០រូបផ្សេងទៀត កំពុងជាប់ឃុំឃាំងនៅក្នុងតុលាការប្រទេសកម្ពុជា។ ក្នុងចំណោមមន្ត្រីទាំងនោះ លោក ហុង សុខហួរ សមាជិកព្រឹទ្ធសភានៃគណបក្សសម រង្ស៊ី ប្ដូរមកភ្លើងទានត្រូវបានដោះលែងកាលពីថ្ងៃទី២៥តុលាឆ្នាំ២០១៧។ សំណុំរឿងលោក ហុង សុខហួរ ក៏មិនខុសគ្នាពីសំណុំរឿងលោក អ៊ុំ សំអាន ដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ