CCHR ស្នើឲ្យក្រសួងមហាផ្ទៃបញ្ជាក់ពីការអនុវត្តច្បាប់ NGO នៅថ្នាក់មូលដ្ឋាន
មជ្ឈមណ្ឌលសិទ្ធិមនុស្សកម្ពុជា ហៅកាត់ថា CCHR ស្នើឲ្យក្រសួងមហាផ្ទៃបញ្ជាក់ពីការអនុវត្តច្បាប់ NGO នៅថ្នាក់មូលដ្ឋាន និងក្រុមបណ្ដាញក្រៅផ្លូវការ។ សំណើនេះ ធ្វើឡើងបន្ទាប់ពី CCHR ពិនិត្យឃើញថា ការតវ៉ានៅសហគមន៍ក្នុងខេត្តក្រចេះត្រូវបានអាជ្ញាធររារាំង។ អាជ្ញាធរតម្រូវឲ្យសហគមន៍ទៅចុះបញ្ជីនៅ ក្រសួងមហាផ្ទៃជាមុនសិន មុននឹងធ្វើការតវ៉ា។ បើតាម CCHR សកម្មភាពរបស់អាជ្ញាធរដូច្នេះ ផ្ទុយពីការអះអាងរបស់រដ្ឋលេខាធិការក្រសួងមហាផ្ទៃដែលថា ច្បាប់ NGO នឹងមិនត្រូវអនុវត្តទៅ លើក្រុមសហគមន៍នៅថ្នាក់មូលដ្ឋាននោះទេ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១៥
មជ្ឈមណ្ឌលសិទ្ធិមនុស្សកម្ពុជា ហៅកាត់ថា CCHR សម្ដែងការព្រួយបារម្ភយ៉ាងខ្លាំងចំពោះការអនុវត្តច្បាប់ស្ដីពីសមាគមនិងអង្គការក្រៅរដ្ឋាភិបាល។ នៅក្នុងលិខិតចំហ ផ្ញើជូនរដ្ឋមន្ដ្រីក្រសួងមហាផ្ទៃ CCHR អះអាងថា ការសម្ដែងមតិរបស់ប្រជាពលរដ្ឋនៅក្នុងឃុំឃ្សឹម ស្រុកស្នួល ខេត្តក្រចេះ កាលពីខែមេសាថ្មីៗនេះ ទទួលរងការរារាំង និងគម្រាមកំហែងពីសំណាក់អាជ្ញាធរ។ បើតាម CCHR អាជ្ញាធរបានប្រាប់តំណាងសហគមន៍ឲ្យទៅចុះបញ្ជីនៅក្រសួងមហាផ្ទៃជាមុនសិន មុននឹងធ្វើការតវ៉ា។ និងថា សហគមន៍នឹងត្រូវប្រឈមមុខនឹងការដាក់ពិន័យ បើមិនគោរពតាម។
សកម្មភាពរបស់អាជ្ញាធរដូច្នេះ ផ្ទុយពីការអះអាងរបស់រដ្ឋលេខាធិការក្រសួងមហាផ្ទៃនាពេលកន្លងមក ដែលថា ច្បាប់ NGO នឹងមិនត្រូវអនុវត្តទៅ លើក្រុមសហគមន៍នៅថ្នាក់មូលដ្ឋាននោះទេ។ នេះបើតាម CCHR ។ អង្គការសង្គមស៊ីវិលនេះ បានស្រង់ប្រសាសន៍រដ្ឋលេខាធិការក្រសួងមហាផ្ទៃ លោក សក់ សេដ្ឋា ដែលថ្លែងនៅក្នុងសិក្ខាសាលាថ្នាក់ជាតិស្ដីពីច្បាប់ NGO ថា ច្បាប់នេះ នឹងមិនត្រូវអនុវត្តទៅលើក្រុមសហគមន៍នៅថ្នាក់មូលដ្ឋាន ដែលមានបំណងសម្ដែងពីក្ដីបារម្ភទៅលើបញ្ហានៅក្នុងមូលដ្ឋានរបស់ខ្លួនទេ។
បើតាម CCHR ប្រសិនបើច្បាប់សមាគម អង្គការ ត្រូវបានអនុវត្តចំពោះក្រុមអង្គការតូចៗនៅថ្នាក់មូលដ្ឋាន និងក្រុមបណ្ដាញមិនផ្លូវការ នោះជាការផ្ទុយទៅនឹងគោលបំណងរបស់រដ្ឋាភិបាល ហើយសិទ្ធិសេរីភាពខាងការបង្កើតសមាគមនៅកម្ពុជា ប្រាកដជាមិនអាចប្រព្រឹត្តទៅបាននោះទេ។ ជាងនេះទៅទៀត សកម្មភាពដូច្នេះ ទំនងជាប៉ះពាល់ដល់សិទ្ធិខាងជួបប្រជុំ សិទ្ធិសេរីភាពខាងការបញ្ចេញមតិ ក៏ដូចជាសិទ្ធិចូលរួមក្នុងជីវភាពនយោបាយ សង្គម និងសេដ្ឋកិច្ចរបស់ប្រទេសជាតិ។ នេះបើតាម CCHR។
CCHR ស្នើឲ្យរដ្ឋមន្ដ្រីក្រសួងមហាផ្ទៃ ចេញសេចក្ដីថ្លែងបញ្ជាក់អំពីការអនុវត្តច្បាប់សមាគមអង្គការឲ្យបានត្រឹមត្រូវ ដោយមិនបញ្ចូលក្រុមអង្គការនៅថ្នាក់មូលដ្ឋាន និងបណ្ដាញមិនផ្លូវការនៅក្នុងបញ្ជី។ CCHR អះអាងថា ខ្លួននឹងចូលរួមសហការការងារជាមួយរដ្ឋាភិបាល ដើម្បីធានាថា ច្បាប់នេះ នឹងត្រូវបានអនុវត្ត ឬធ្វើវិសោធនកម្មដោយគោរពទៅលើបទដ្ឋានសិទ្ធិមនុស្ស៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ