ក្រុមប្រឹក្សាអភិវឌ្ឍន៍កម្ពុជា៖ រយៈពេល ៩ខែឆ្នាំ២០១៨ គម្រោងវិនិយោគថ្មីនៅកម្ពុជាកើនឡើង
ក្នុងរយៈពេល ៩ខែដើមឆ្នាំ២០១៨នេះ ក្រុមប្រឹក្សាអភិវឌ្ឍន៍កម្ពុជា(CDC) បានអនុញ្ញាតឲ្យក្រុមហ៊ុនធ្វើការវិនិយោគលើគម្រោងថ្មីចំនួន១៧០គម្រោង មានការកើនឡើងចំនួន២៨គម្រោង ប៉ុន្តែទុនវិនិយោគមានការថយចុះ ធៀបនឹង៩ខែឆ្នាំ២០១៧កន្លងទៅ។ នេះបើតាមរបាយការណ៍របស់ក្រុមប្រឹក្សាអភិវឌ្ឍន៍កម្ពុជា ដែលវិទ្យុបារាំងអន្តរជាតិទទួលបាន។
ចុះផ្សាយនៅថ្ងៃ៖
ស្តាប់ - ០១:៤៥
រយៈពេល៩ខែ ឆ្នាំ២០១៨ ការវិនិយោគលើគម្រោងថ្មីចំនួន១៧០គម្រោង មានទុនវិនិយោគសរុបចំនួនប្រមាណ ៤.៧១៩លានដុល្លារអាមេរិក មានការកើនឡើងចំនួន ២៨គម្រោង តែទុនវិនិយោគមានការថយចុះប្រមាណ១.៣៦២លានដុល្លារអាមេរិក ប្រៀបធៀបរយៈពេលដូចគ្នាកាលពីឆ្នាំមុន។
កាលពីខែមករា ដល់ខែកញ្ញា ឆ្នាំ២០១៧គន្លងទៅ មានគម្រោងវិនិយោគថ្មីត្រឹមតែ១៤២ប៉ុណ្ណោះ ដែលត្រូវបានអនុញ្ញាត តែមានទំហំទឹកប្រាក់ប្រមាណ៦.០៨១លានដុល្លារអាមេរិក។ នេះបើតាមរបាយការណ៍របស់ក្រុមប្រឹក្សាអភិវឌ្ឍន៍កម្ពុជា។
របាយការណ៍ដដែលឲ្យដឹងថា ក្នុងរយៈពេល៩ខែ ឆ្នាំ២០១៨ ការវិនិយោគនៅក្នុងតំបន់សេដ្ឋកិច្ចពិសេស គឺសុទ្ធសឹងជាគម្រោងស្ថិតក្នុងវិស័យឧស្សាហកម្ម និងកម្មន្តសាល មានការកើនឡើងចំនួន ២៣គម្រោង ខណៈដែលទុនវិនិយោគមានការកើនឡើង ប្រមាណ ២៤២លានដុល្លារអាមេរិក ស្មើនឹងប្រមាណ៦៦ភាគរយ ធៀបនឹងរយៈពេលដូចគ្នាកាលពីឆ្នាំមុន។
ចំណែកឯការវិនិយោគនៅក្រៅតំបន់សេដ្ឋកិច្ចពិសេសក្នុងរយៈពេល៩ខែ ឆ្នាំ២០១៨ មានការកើនឡើងចំនួន ៥គម្រោង ខណៈដែលទុនវិនិយោគមានការថយចុះ ប្រមាណ ១.៦០៤លានដុល្លារអាមេរិក ធៀបនឹងរយៈពេលដូចគ្នាកាលពីឆ្នាំមុន។
សូមជំរាបជូនថា ក្នុងរយៈពេល ៩ខែ ដើមឆ្នាំ២០១៨ តួលេខវិនិយោគមកពីប្រទេសចិនបានឈរនៅលំដាប់លេខរៀងទី១ ឬស្មើនឹង៦៧,៨៣ភាគរយ ហើយការវិនិយោគមកពីប្រទេសជប៉ុន ថៃ និងម៉ាឡេស៊ី បានឈរនៅលំដាប់លេខរៀងទី៣ ទី៤ និងទី៥ ជាបន្ទាប់។ របាយការណ៍បញ្ជាក់ថា តួលេខវិនិយោគក្នុងស្រុកបានឈរនៅលំដាប់លេខរៀងទី២ ឬស្មើនឹង២៦,៥៦ភាគរយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ