លោក ជាម យៀបថាសមាសភាព គជប អាចទុកដដែល បើចុះចូលគណបក្សប្រជាជន
មន្រ្តីជាន់ខ្ពស់គណបក្សកាន់អំណាចបានលើកឡើងថា សមាសភាព គជប មកពីគណបក្សប្រឆាំងនឹងត្រូវរលាយជាស្វ័យប្រវត្តិនៅពេលគណបក្សសង្រ្គោះជាតិត្រូវរំលាយ។ ប៉ុន្តែលោកថាប្រសិនបើពួកគេចុះចូលជាមួយគណបក្សកាន់អំណាច នោះថ្នាក់ដឹកនាំគណបក្សប្រជាជនអាចនឹងពិចារណា។ យ៉ាងណាក៏ដោយ គជប នៅមិនទាន់អាចបញ្ជាក់ជំហរយ៉ាងណាទេ ដោយថារង់ចាំមើលច្បាប់ដែលទើបអនុម័តនេះមកដល់ដៃសិន។
ចុះផ្សាយនៅថ្ងៃ៖
ស្តាប់ - ០១:៥៨
អត្ថបទដោយ៖ អ៊ឹង ប៊ុនថន
លោក ជាម យៀប តំណាងរាស្ត្រគណបក្សប្រជាជនកម្ពុជា បានលើកឡើងថា តាមការឯកភាពរបស់គណបក្សជាប់ឆ្នោតទាំងពីរឬកន្លងមក គឺសមាសភាព គណៈកម្មាធិការជាតិរៀបចំការបោះឆ្នោត គជប ទាំង៩រូប នឹងត្រូវរលាយជាស្វ័យប្រវត្តិ នៅពេលបក្សណាមួយត្រូវរំលាយ។ ទោះជាយ៉ាងណាលោកថា សមាសភាពគណបក្សសង្រ្គោះជាតិនៅគជប អាចរក្សានៅដដែល បើសិនជាអ្នកទាំងនោះចុះចូលជាមួយគណបក្សប្រជាជនកម្ពុជា។ នេះបើតាមការចុះផ្សាយរបស់ប្រព័ន្ធផ្សព្វផ្សាយក្នុងស្រុកមួយចំនួន។
ប៉ុន្តែវិទ្យុបារាំងRFIមិនអាចទាក់ទងសុំការបញ្ជាក់បន្ថែមពីលោក ជាម យៀប បានទេ។ ទោះជាយ៉ាងណា អ្នកនាំពាក្យគណបក្សប្រជាជនកម្ពុជា លោក សុខ ឥសាន មានប្រសាសន៍ក្នុងនាមបុគ្គលផ្ទាល់ខ្លួនថា បញ្ហាទាក់ទងគជប គឺមានច្បាប់មួយដោយឡែក ហើយថាសមាសភាព គជប ទាំងនោះបានលាលែងចេញពីសមាជិកគណបក្សរួចហើយមុនចូលកាន់តំណែង។ ដូចនេះលោកថា ទោះគណបក្សសង្រ្គោះជាតិត្រូវរំលាយក៏សមាសភាពគជបនៅរក្សាដដែល។
សម្រាប់អ្នកឃ្លាំមើលការបោះឆ្នោតនៃអង្គការនិចហ្វិច លោក សម គន្ធាមី មិនយល់ដូចនេះទេ។ លោក សម គន្ធាមី យល់ថា បើគេរំលាយគណបក្សសង្រ្គោះជាតិគឺសមាសភាព គជប ដែលជាកូត្តាគណបក្សនេះនឹងត្រូវរំលាយទៅតាមនោះដែរ។ ប៉ុន្តែលោកព្រមានថា បើសមាសភាព គជប ដែលមានការគាំទ្រពីសហគមន៍អន្តរជាតិផងនោះ ត្រូវបានរំលាយ លោកថាការបោះឆ្នោតនឹងអាចជួបបញ្ហា។
ចំណែក លោក ហង្ស ពុទ្ធា អ្នកនាំពាក្យគជប ដែលលោកថាមិនបានឭសំដីលោក ជាម យៀប ផ្ទាល់ លោកសូមមិនបង្ហាញជំហរតំណាងឲ្យសមាសភាពគជបទាំងអស់នោះទេ។ តែលោកថាត្រូវរង់ចាំពិនិត្យមើលច្បាប់ដែលបានអនុម័តនោះមកដល់ដៃសិន។
សូមជម្រាបថា តំណាងរាស្ត្រគណបក្សប្រជាជនកម្ពុជា បាននាំលើកដៃ អនុម័តសេចក្តីស្នើវិសោធនកម្មចំនួន៤ នៅសប្តាហ៍នេះ ដែលមានខ្លឹមសារបើកផ្លូវឲ្យយកអាសនៈរបស់គណបក្សដែលត្រូវរំលាយទៅចែកឲ្យគណបក្សដទៃទៀតដែលមិនបានជាប់ឆ្នោត។ ប៉ុន្តែការអនុម័តច្បាប់នេះ ត្រូវរងការរិះគន់ពីក្រសួងការបរទេសអាមេរិក សហភាពអឺរ៉ុប និងគណបក្សប្រឆាំងនៅកម្ពុជា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ