ទិវាអាស៊ានគ្រប់គ្រងគ្រោះមហន្តរាយ៖ កុមារគឺជាក្រុមមនុស្សងាយរងគ្រោះខ្លាំងជាងគេ
ក្រុមមនុស្សដែលបណ្តាប្រទេសជាសមាជិកអាស៊ានបានយកចិត្តទុកដាក់ខ្លាំង គឺកុមារ ដោយសារតែពួកគេទាំងនោះ គឺជាមនុស្សងាយរងគ្រោះពីគ្រោះមហន្តរាយនានា។ នេះបើតាមការបញ្ជាក់របស់ប្រធានគណៈកម្មាធិការគ្រប់គ្រងគ្រោះមហន្តរាយអាស៊ាននៅព្រឹកនេះ។ ក្នុងរយៈពេលជាង១០ឆ្នាំចុងក្រោយនេះ អាស៊ានបានជួបនឹងគ្រោះមហន្តរាយធំៗមួយចំនួន ដែលបានបណ្តាលឲ្យជីវិតមនុស្សរាប់ពាន់នាក់ស្លាប់ និងបាត់បង់ទឹកប្រាក់រាប់ពាន់លានដុល្លារអាមេរិក។
ចុះផ្សាយនៅថ្ងៃ៖
ស្តាប់ - ០២:២៥
លោក រស់ សុវណ្ណ អគ្គលេខាធិរងនៃគណៈកម្មធិការជាតិគ្រប់គ្រងគ្រោះមហន្តរាយ បានឲ្យដឹងថាការជ្រើសរើសប្រធានបទ ដើម្បីយកមកពិភាក្សានៅក្នុងទិវាអាស៊ានគ្រប់គ្រងគ្រោះមហន្តរាយ និងទិវាអន្តរជាតិកាត់បន្ថយគ្រោះមហន្តរាយ ឆ្នាំ២០១៥ គឺមាន៣ប្រធានបទសំខាន់ៗ ក្នុងនោសាលារៀនមានសុវត្ថិភាពគឺជាប្រធានបទមួយសំខាន់ជាងគេ។
លោកបានបញ្ជាក់ថាកុមារ គឺជាប្រភេទមនុស្ស ដែលងាយរងគ្រោះពីគ្រោះមហន្តរាយ ដោយសារតែការយល់ដឹង វ័យ និងសមត្ថភាពរបស់ពួកគាត់នៅមានកម្រិត។ ក្នុងកិច្ចពិភាក្សានោះ បានលើយកពីបញ្ហាថា តើគ្រឹះស្ថានសិក្សា ត្រូវបានសាងសង់ដោយរបៀបណា ហើយត្រូវឲ្យសិស្សដឹងពីវិធិសាស្ត្រគេចចេញពីគ្រោះមហន្តរាយជាដើម។
លោក Jan Jaap Kleinrenskin នាយកគ្រប់គ្រងអង្គការ Plan International ប្រចាំប្រទេសកម្ពុជា បានថ្លែងថា អង្គការរបស់លោកគឺជាអង្គការ ដែលបានផ្តោតសំខាន់លើសិទ្ធិរបស់កុមារ ម្យ៉ាងវិញទៀត គឺលោកចង់ឲ្យអាស៊ានមានការរៀបចំជាស្រេចចំពោះការយល់ដឹងរបស់កុមារទាំងអស់នោះ ពីគ្រោះមហន្តរាយ។ ការពិភាក្សាលើប្រធានបទនេះ នឹងជួយឲ្យស្ថាប័នពាក់ព័ន្ធទាំងអស់អាចស្វែងរកនូវដំណោះស្រាយដ៏មានប្រសិទ្ធភាពមួយ។ លោកបញ្ជាក់ទៀតថា ការពិភាក្សាក្នុងការស្វែងរកដំណោះស្រាយនេះ នឹងជួយកាត់បន្ថយចំនួនកុមារស្លាប់ដោយសារគ្រោះមហន្តរាយ។ សម្រាប់ឆ្នាំក្រោយៗទៀត ប្រធានបទពិភាក្សាមួយនេះ នឹងនៅតែសំខាន់ជានិច្ចសម្រាប់ទិវាអាស៊ានគ្រប់គ្រងគ្រោះមហន្តរាយ។
លោកស្រី Adelina Kamal ជាប្រធានផ្នែកគ្រប់គ្រងគ្រោះមហន្តរាយនៃសមាគមអាស៊ានបានឲ្យដឹងតាមរយៈការស្រាវជ្រាវនាពេលកន្លងមកថា សាលារៀននៅក្នុងតំបន់អាស៊ានទាំងមូលមិនមានភាពរឹងមាំ ហើយអាចបំផ្លាញ ដោយសារគ្រោះមហន្តរាយធម្មជាតិ និងបណ្តាលឲ្យប៉ះពាល់ដល់ជីវិតរបស់កុមារថែមទៀតផង។ លោកស្រីបន្ថែមថា ដូច្នេះគេត្រូវសាងសង់សាលារៀនឡើងវិញ ឲ្យមានភាពរឹងមាំ ដែលអាចធានាបាន ឬទប់ទល់នឹងគ្រោះធម្មជាតិ នោះនឹងអាចជួយកុមារជំនាន់ក្រោយៗទៀត។
សម្រាប់កម្ពុជាគ្រោះមហន្តរាយ ដែលបានបណ្តាលឲ្យជីវិតមនុស្សស្លាប់ច្រើនជាងគេ គឺគ្រោះទឹកជំនន់គិតចាប់តាំងពីឆ្នាំ១៩៩៦ រហូតមកដល់បច្ចុប្បន្ន។ នេះបើតាមទិន្នន័យរបស់គណៈកម្មធិការជាតិគ្រប់គ្រងគ្រោះមហន្តរាយ។
សូមបញ្ជាក់ថា ទិវាអាស៊ានគ្រប់គ្រងគ្រោះមហន្តរាយ ១៣ តុលា ប្រព្រឹត្តិទៅក្រោមពាក្យស្លោក “អាស៊ានគឺភាពធន់តែមួយ” ធ្វើឡើងនៅសាកលវិទ្យាល័យភូមិន្ទភ្នំពេញ នៅព្រឹកថ្ងៃទី៩ និងទី១០ តុលា ដោយមានអ្នកចូលរួមពីអង្គការសង្គមស៊ីវិ សិស្សនិស្សិតប្រមាណ៦០០នាក់។ ចំពោះប្រធានបទឆ្នាំនេះ គឺជាលើកទី១ហើយ ដែលអាស៊ាន បានសម្រេចយកប្រធានបទខ្លួនឯង ដោយកន្លងមកអាស៊ានបានរើសយកប្រធានបទក្រោមប្រធានបទធំរបស់អង្គការសហប្រជាជាតិ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ