ទិវាកុមារអន្តរជាតិ១មិថុនា៖ សង្គមស៊ីវិលទទូចឲ្យរដ្ឋាភិបាលពង្រឹងការការពារកុមារបន្ថែមទៀត
ថ្ងៃទី១ មិថុនានេះ គឺជាខួបលើកទី៦៦ នៃទិវាកុមារអន្តរជាតិ។ នៅកម្ពុជា រដ្ឋាភិបាល និងក្រុមអង្គការសង្គមស៊ីវិលមួយចំនួនដែលធ្វើការផ្នែកកុមារ បានរៀបចំប្រារព្ធពិធីនេះផ្សេងៗគ្នា។ ឆ្លៀតឱកាសនេះ អង្គការសង្គមស៊ីវិល បានទទូចឲ្យរដ្ឋាភិបាលកម្ពុជាបន្តពង្រឹងការការពារកុមារទាំងផ្នែកសុខមាលភាព និង ផ្លូវច្បាប់បន្ថែមទៀត។ រដ្ឋាភិបាលកម្ពុជា បានបញ្ជាក់ថា ខ្លួនកំពុងបន្តធ្វើកិច្ចការទាំងនេះហើយ។
ចុះផ្សាយនៅថ្ងៃ៖
ស្តាប់ - ០២:៥៤
នៅថ្ងៃទី១ មិថុនានេះ រដ្ឋាភិបាលកម្ពុជា បានរៀបចំជារួមនូវការប្រារព្ធខួបលើកទី៦៦ ទិវាកុមារអន្តរជាតិ និងខួបទី១៤ ទិវាពិភពលោកប្រឆាំងពលកម្មកុមារ ១២ មិថុនា នៅឯមជ្ឈមណ្ឌលកោះពេជ្រ រាជធានីភ្នំពេញ។ ការប្រារព្ធខួបទិវាកុមារអន្តរជាតិនៅឆ្នាំនេះ ធ្វើឡើងក្រោមប្រធានបទ “លើកកម្ពស់អាហារូបត្ថម្ភប្រកបដោយគុណភាព ដើម្បីអភិវឌ្ឍកុមារ” និង ទិវាពិភពលោកប្រឆាំងពលកម្មកុមារ១២ មិថុនា ក្រោមប្រធានបទ “គ្មានពលកម្មកុមារ ផ្តល់ការអប់រំដែលមានគុណភាព”។
ក្រៅពីរដ្ឋាភិបាលកម្ពុជា អង្គការសង្គមស៊ីវិលមួយចំនួនដែលធ្វើការផ្នែកកុមារក៏បានប្រារព្ធពិធីរំលឹកខួបនេះផង ដែរ។ អង្គការ លីកាដូ បានសហការជាមួយបណ្តាញក្រុមការពារកុមារ (CPG) ប្រារព្ធពិធីរំលឹកខួបលើកទី៦៦ ទិវាកុមារអន្តរជាតិ១មិថុនានៅទីតាំងផ្សេងគ្នាទាំងនៅក្នុងទីក្រុងភ្នំពេញ និងបណ្តាខេត្តមួយចំនួនទៀត។ នៅតាមទីកន្លែងទាំងនោះ អង្គការ លីកាដូ បានរៀបចំវេទិកាសាធារណៈ និងការសម្តែងល្ខោនអប់រំ ស្តីពីសិទិ្ធកុមារ។ ជាងនេះទៀតសោត អង្គការ លីកាដូ ក៏បានសហការជាមួយការិយាល័យសិទិ្ធកុមារ (CRO) រៀបចំការលេងល្បែង និងចែកជូនសម្ភារៈនានាដល់យុវជន ស្ត្រីមានផ្ទៃពោះដែលជាប់ពន្ធនាគារ និងកូនៗរបស់ឆ្មាំពន្ធនាគារ នៅក្នុងមណ្ឌលអប់រំកែប្រែទី២ (ម២) នៅព្រៃស រាជធានីភ្នំពេញ និងពន្ធនាគារក្រុងតាខ្មៅ ខេត្តកណ្តាល។ ចំណែកនៅថ្ងៃនេះផងដែរ អង្គការសមាគមធាងត្នោត និងអង្គការភីពផលអ៊ីននីត ក៏បានរៀបចំប្រារព្ធខួបកុមារអន្តរជាតិ១មិថុនា ក្រោមប្រធានបទ “ ទីក្រុងសម្រាប់កុមារ” នៅក្នុងខណ្ឌឫស្សីកែវ រាជធានីភ្នំពេញ។
យ៉ាងណាក៏ដោយ ឆ្លៀតឱកាសនេះ អង្គការលីកាដូ បានអំពាវនាវដល់រដ្ឋាភិបាលកម្ពុជា ប្រឹងប្រែងឲ្យកាន់តែខ្លាំងក្នុងការលើកកំពស់ និងការពារសុខុមាលភាព សុភមង្គល និងការរីកចម្រើនលូតលាស់ជាទូទៅរបស់កុមារ។ រដ្ឋាភិបាលកម្ពុជា បានគូសបញ្ជាក់ថា ខ្លួនបានខិតខំលើកកម្ពស់អាហារូបត្ថម្ភដល់កុមារគ្រប់រូបតាមរយៈការអនុវត្តកម្មវិធីសុខភាពបន្តពូជមាតា ទារក កុមារ និងអាហារូបត្ថម្ភដែលជាផែនទីបង្ហាញផ្លូវសម្រាប់ពន្លឿនការកែលម្អអាហារូបត្ថម្ភឆ្នាំ២០១៤ដល់ឆ្នាំ២០២០។ បើតាមរដ្ឋាភិបាល កុមារកង្វះអាហារូបត្ថម្ភមានការថយចុះ ដោយកុមារមានទម្ងន់ខ្វះគីឡូអាយុពី០ទៅ៥ឆ្នាំត្រូវបានកាត់បន្ថយពី២៨%មកត្រឹម២៣% ហើយកុមារក្រិនមានការធ្លាក់ចុះពី៤០%មកនៅត្រឹម៣២%រវាងឆ្នាំ២០១០ និងឆ្នាំ២០១៤។
បន្ថែមលើនេះ អង្គការលីកាដូ ក៏បានទទូចឲ្យរដ្ឋាភិបាលកម្ពុជា បង្កើតនូវប្រព័ន្ធយុត្តិធម៌សម្រាប់អនីតិជនដាច់ដោយឡែកមួយ ដោយបញ្ចប់នូវសេចក្តីព្រាងច្បាប់ស្តីពី “កុមារទំនាស់នឹងច្បាប់” និងអនុវត្តច្បាប់នោះដោយមិនមានការពន្យាពេល។ រដ្ឋាភិបាលកម្ពុជានៅថ្ងៃទិវាកុមារអន្តរជាតិនេះ មិនបានលើកឡើងពីសេចក្តីព្រាងនេះទេ ក៏ប៉ុន្តែបានជំរុញឲ្យក្រសួងស្ថាប័នពាក់ព័ន្ធ ពង្រឹងការអនុវត្តច្បាប់ និងផ្សព្វផ្សាយឲ្យបានទូលាយអំពីលិខិតបទដ្ឋាន ផែនការជាតិ យុទ្ធសាសស្រ្តជាតិ អនុសញ្ញាស្តីពីសិទ្ធិកុមារនិងពិធីសារបន្ថែម និងលិខិតតុបករណ៍អន្តរជាតិស្តីពីការការពារកុមារ ការកាត់បន្ថយ និងការលុបបំបាត់ពលកម្មកុមារជាដើម៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ