កម្ពុជា-ចិន ចុះកិច្ចព្រមព្រៀងស្តីកិច្ចសហប្រតិបត្តិការវាងកងទ័ពប្រទេសទាំងពីរ
រដ្ឋមន្ត្រីការពារជាតិកម្ពុជា និងរដ្ឋមន្ត្រីការពារជាតិចិន កាលពីថ្ងៃទី២០ ខែតុលា បានចុះកិច្ចព្រមព្រៀងស្តីកិច្ចសហប្រតិបត្តិការរវាងកងទ័ពប្រទេសទាំងពីរ នៅឯក្រុងប៉េកាំង ប្រទេសចិន។ ក្នុងឱកាសនោះ ចិនចាត់ទុកទំនាក់ទំនងកិច្ចសហប្រតិបត្តិការរវាងប្រទេសទាំងពីរស្ថិតនៅក្នុងកម្រិតខ្ពស់ជាងគេ ក្នុងប្រវត្តិសាស្រ្ត។
ចុះផ្សាយនៅថ្ងៃ៖ កែប្រែថ្ងៃទី៖
ការចុះកិច្ចព្រមពៀងរវាងក្រសួងការជាតិនៃប្រទេសទាំងពីរនេះធ្វើឡើងបន្ទាប់ពី លោក ទៀ បាញ់ រដ្ឋមន្ត្រីក្រសួងការពារជាតិចូលរួមពិធីបើកការប្រកួតកីឡាយោធាពិភពលោកលើកទី៧ នៅទីក្រុង អ៊ូហាន ប្រទេសចិន។ នេះបើតាមគេហទំព័ររបស់ក្រសួងការពារជាតិនៅថ្ងៃទី២១ ខែតុលានេះ។
ក្រសួងការពារជាតិកម្ពុជាបានដកស្រង់ការលើកឡើងរបស់ រដ្ឋមន្ត្រី្ហការពារជាតិចិន លោក វ៉េ ហ៊្វុងហឺ ថា ក្រោមការដឹកនាំរបស់ប្រធានាធិបតី ស៊ី ជីនពីង ក៏ដូចលោកនាយករដ្ឋមន្ត្រី ហ៊ុន សែន ទំនាក់ទំនងកិច្ចសហប្រតិបត្តិការរវាងប្រទេសទាំងពីរកាន់តែស៊ីជម្រៅហើយបច្ចុប្បន្ននេះ គឺស្ថិតនៅក្នុងកម្រិតខ្ពស់ជាងគេ ក្នុងប្រវត្តិសាស្រ្ត។ នេះជាការលើកឡើងរដ្ឋមន្ត្រីការពារជាតិចិន។
លោក វ៉េ ហ៊្វុងហឺ បានសង្កត់ធ្ងន់ថា កិច្ចសហប្រតិបត្តិការរវាងកងទ័ពទាំងពីរ ជិតស្និត និងទទួលបាននូវសមិទ្ធផលធំធេងជាច្រើន ហើយកិច្ចសហប្រតិបត្តិកា ររវាងកងទ័ពទាំងពីរ បានក្លាយទៅជាយន្តការមួយដែលបានជួយជំរុញដល់ការអភិវឌ្ឍទំនាក់ទំនង រវាងប្រទេសទាំងពីរកម្ពុជា និងចិន។
ក្នុងឱកាសចុះហត្ថលេខាលើកិច្ចព្រមពៀងនោះ លោក ទៀ បាញ់ បានវាយតំលៃខ្ពស់ និងមានជំនឿជឿជាក់ ជាមួយតួនាទីដ៏សំខាន់មិនអាចខ្វះបានរបស់ប្រទេសចិន ជាពិសេសតួនាទី របស់កងទ័ពរំដោះប្រជាជនចិន ដែលបានចូលរួមយ៉ាងស្វាហាប់ និងយ៉ាងមោះមុតក្នុងការកសាងនិង អភិវឌ្ឍ ចំពោះសន្តិភាព និងការអភិវឌ្ឍក្នុងតំបន់ ក៏ដូចជាក្នុងពិភពលោក។
វិទ្យុបារាំងអន្តរជាតិមិនអាចសុំការបំភ្លឺបន្ថែមពីអ្នកនាំពាក្យក្រសួងការពារជាតិបានទេ គិតត្រឹមរសៀលថ្ងៃទី២១ ខែតុលានេះ។
គួរកត់សម្គាល់ថា កាលពីខែកក្កដា កន្លងទៅ សារព័ត៌មានដ៏ល្បីរបស់អាមេរិកធ្លាប់បានចុះផ្សាយថា ប្រទេសចិនបានចុះហត្ថលេខាលើកិច្ចព្រមព្រៀងជាសម្ងាត់មួយជាមួយកម្ពុជា ដើម្បីអនុញ្ញាត ឲ្យកងទ័ពរបស់ចិនប្រើប្រាស់មូលដ្ឋានទ័ពជើងទឹករបស់កម្ពុជានៅសមុទ្រភាគខាងលិច។ ប៉ុន្តែប្រមុខរដ្ឋាភិបាលកម្ពុជា លោក ហ៊ុន សែន បានប្រតិកម្ម ដោយអះអាងថា «នេះជាព័ត៌មានប្រឌិតដ៏អាក្រក់បំផុតប្រឆាំងជាមួយកម្ពុជា»៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ