ជនជាតិចិនរាប់ពាន់នាក់សម្រុកចេញពីកម្ពុជា ក្រោយរដ្ឋាភិបាលបិទ Game Online តែមន្ត្រីថាមិនភ្ញាក់ផ្អើល
ជនជាតិចិនរាប់ពាន់នាក់បានសម្រុកចាកចេញពីខេត្តព្រះសីហនុព្រមៗគ្នា កាលពីរាត្រីថ្ងៃទី ៣១ សីហា ដោយមិនដឹងមូលហេតុ។ ប៉ុន្តែការចាកចេញនេះ ត្រូវបានគេដាក់ការសង្ស័យថា គឺធ្វើឡើងក្រោយពីប្រមុខរដ្ឋាភិបាលកម្ពុជា បានប្រកាសបិទអាជីវកម្ម ល្បែងតាមអនឡាញ (Game Online) ដែលជាវិធានការមួយដើម្បីពង្រឹងសន្តិសុខ និង ការពារកុំឲ្យឧក្រិដ្ឋជនប្រព្រឹត្តអំពើទុច្ចរិតក្រោមស្លាកអាជីវកម្ម Game Online នេះ។ យ៉ាងណាក្តី មន្ត្រីរដ្ឋាភិបាលកម្ពុជា មិនបង្ហាញការភ្ញាក់ផ្អើលឡើយ ចំពោះករណីនេះ ត្បិតចំនួនជនជាតិចិនដែលចូលមកកម្ពុជា ក៏មិនក្រោមខ្ទង់ពាន់ដែរ នៅក្នុងមួយថ្ងៃៗ។
ចុះផ្សាយនៅថ្ងៃ៖
ស្តាប់ - ០២:២១
អ្នកនាំពាក្យខេត្តព្រះសីហនុ លោក ឃាង ភារម្យ មិនភ្ញាក់ផ្អើលឡើយ ចំពោះការចាកចេញរបស់ជនជាតិចិន កាលពីរាត្រីថ្ងៃទី ៣១ សីហា ត្បិតវាជាចរន្តចេញចូលជាធម្មតានៅក្នុងខេត្តព្រះសីហនុរបស់លោក។ អ្នកនាំពាក្យរូបនេះ បានលើកឡើងថា ចំនួនភ្ញៀវទេសចរជនជាតិចិន ដែលចាកចេញពីកម្ពុជាកាលពីថ្ងៃទី ៣១ សីហា មានចំនួន៣០៩៥នាក់។ ប៉ុន្តែចំនួនចូលវិញ ក៏ មានច្រើនដែរ ពោលគឺ២៤៩៤នាក់។ លោក ភារម្យ បានដាក់ជាសំណួរថា តើហេតុអ្វី យើងចាប់អារម្មណ៍តែចំនួនអ្នកចាកចេញ តែមិនចាប់អារម្មណ៍ពីចំនួនអ្នកចូល។ បើតាមតួលេខខាងលើនេះ មានន័យថា ការចាកចេញនិងចូលនៃជនជាតិចិននៅក្នុងខេត្តព្រះសីហនុ គឺមានប្រហាក់ប្រហែលគ្នា។
ការលើកឡើងរបស់អ្នកនាំពាក្យខេត្តព្រះសីហនុនេះ បានធ្វើឡើងក្រោយពីបណ្តាញសង្គមហ្វេសបុកនៅក្នុងប្រទេសកម្ពុជាបានផ្សព្វផ្សាយថា ជនជាតិចិនរាប់ពាន់នាក់បានចាកចេញសម្រុកចាកចេញពីកម្ពុជាយ៉ាងគំហុក នាមួយរយៈពេលចុងក្រោយនេះ ដែលធ្វើឲ្យមានការកកស្ទះនៅព្រលានយន្តហោះកងកេងខេត្តព្រះសីហនុទៀតផង។ ការសម្រុកចាកចេញនេះ ត្រូវបានមហាជនដាក់ការសង្ស័យថា តើក្រុមជនជាតិចិនទាំងនោះ មានធុមក្លិនអ្វីមិនល្អ ឬមកពីរដ្ឋាភិបាលកម្ពុជា ទើបតែប្រកាសបិទអាជីវកម្ម Game Online កាលពីពេលថ្មីៗនេះ? ប៉ុន្តែលោក ឃាង ភារម្យ បានពន្យល់ថា វាជារឿងចៃដន្យតែប៉ុណ្ណោះ។ វាអាចមកពីភ្ញៀវទេសចរជនជាតិចិន ឬកម្មករចិន សម្រុកចាកចេញទៅព្រមៗគ្នា ក្នុងពេលតែមួយ។ ចំណែកលោក ជា អូន ជាអ្នកនាំពាក្យនិងជារដ្ឋលេខាធិការអាកាសចរណ៍ស៊ីវិល ដែលគ្រប់គ្រងលើការហោះហើរនៅក្នុងប្រទេសកម្ពុជា ក៏មិនភ្ញាក់ផ្អើលដែរ។ លោកថា ជួនកាលជាពេលវេលាមួយដែលកម្មករចិនដែលអស់កុងត្រាជាមួយក្រុមហ៊ុនណាមួយ ដែលត្រូវវិលត្រលប់ទៅវិញតែប៉ុណ្ណោះ។
គួរជំរាបជូនថា ផ្អែកតាមរបាយការណ៍របស់អាជ្ញាធរកម្ពុជា បានឲ្យដឹងនៅថ្ងៃទី ៣១ ខែសីហាថា ត្រឹមតែ១យប់ប៉ុណ្ណោះ ជនជាតិចិនប្រមាណជាជាង៣០០០នាក់ បានចាកចេញពីខេត្តព្រះសីហនុ តាមជើងហោះហើរ ត្រឡប់ទៅកាន់ប្រទេសពួកគេវិញ បន្ទាប់ពីរដ្ឋាភិបាលកម្ពុជាបានសម្រេចឈប់ផ្ដល់អាជ្ញាប័ណ្ណសម្រាប់អាជីវកម្មល្បែងភ្នាល់តាមម៉ាស៊ីនអេឡិចត្រូនិក និងតាមអ៊ីនធឺណែតទាំងក្នុងនិងក្រៅប្រទេស ចាប់ពីថ្ងៃទី ១៨ ខែសីហាមក។ សារាចរណែនាំដែលចុះហត្ថលេខាដោយប្រមុខរដ្ឋាភិបាល លោក ហ៊ុន សែន នោះ បានលើកឡើងថា ពួកឧក្រិដ្ឋជនបរទេសមួយចំនួន បានជ្រកក្រោមរូបភាពល្បែងភ្នាល់ប្រភេទនេះ ដើម្បីជំរិតទារប្រាក់ពីជនរងគ្រោះ ទាំងក្នុងនិងក្រៅប្រទេស ដែលធ្វើឲ្យប៉ះពាល់ដល់សន្តិសុខ សណ្ដាប់ធ្នាប់សាធារណៈ និងរបៀបរៀបរយសង្គម៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ