ក្រសួងការពារជាតិកម្ពុជា ទទួលឧទ្ធម្ភាគចក្រ១២ជាផ្លូវការពីប្រទេសចិន
ចិនបានប្រគល់ឧទ្ធម្ភាគចក្រសង្គ្រោះចំនួន១២គ្រឿងដល់រដ្ឋាភិបាលកម្ពុជានៅថ្ងៃចន្ទនេះ ក្រោមគម្រោងកម្ចីមួយដែលត្រូវបានចុះហត្ថលេខាកាលពីឆ្នាំ២០១១។ ពិធីទទួល និងប្រគល់ត្រូវបានធ្វើឡើងនៅព្រលានយន្តហោះយោធា រវាងលោកឧបនាយករដ្ឋមន្ត្រី ទៀ បាញ់ រដ្ឋមន្ត្រីក្រសួងការពារជាតិ និងលោកស្រី ប៉ូ ជៀនគួ ឯកអគ្គរដ្ឋទូតចិនប្រចាំប្រទេសកម្ពុជា។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០៧
ក្រោយពីបានត្រួតពិនិត្យការហោះហើរ និងបច្ចេកទេសរួចហើយនោះ នៅព្រឹកថ្ងៃច័ន្ទនេះ ពិធីទទួល និងប្រគល់ឧទ្ធម្ភាគចក្រចំនួន១២គ្រឿង ត្រូវបានរៀបចំធ្វើឡើងរវាងឯកអគ្គរដ្ឋទូតចិន តំណាងរដ្ឋាភិបាលចិន និងរដ្ឋមន្ត្រីក្រសួងការពារជាតិតំណាងរដ្ឋាភិបាលកម្ពុជា។
មិនមែនជាប្រភេទប្រយុទ្ធនោះឡើយ ប៉ុន្តែជាឧទ្ធម្ភាគចក្រប្រភេទសង្គ្រោះ។ ឧទ្ធម្ភាគចក្រដែលរដ្ឋាភិបាលចិនបានប្រគល់មកអោយកម្ពុជា នៅមូលដ្ឋានទ័ពអាកាសពោធិ៍ចិនតុងនៅព្រឹកថ្ងៃចន្ទនេះ គឺជាគម្រោងកម្ចីរបស់កម្ពុជា ដែលត្រូវបានចុះហត្ថលេខាកាលពីខែសីហាឆ្នាំ២០១១កន្លងទៅ។ គម្រោងកម្ចីដែលមានតម្លៃ១៩៥លានដុល្លារ។
លោកឧបនាយករដ្ឋមន្ត្រី ទៀ បាញ់ រដ្ឋមន្ត្រីក្រសួងការពារជាតិបានថ្លែងថា ពិធីប្រគល់ និងទទួលឧទ្ធាម្ភាគចក្រនោះគឺជាសមិទ្ធិផលប្រវត្តិសាស្ត្រថ្មីមួយទៀត ដែលរដ្ឋាភិបាលចិនបានផ្តល់មកអោយកម្ពុជា ដើម្បីពង្រឹងសមត្ថភាពកងយោធារបស់ខ្លួនក្នុងការងារការពារបូរណភាពទឹកដី ការជួយសង្គ្រោះក្នុងគ្រោះមហន្តរាយនានាជាដើម។ លោករដ្ឋមន្ត្រីការពារជាតិខ្មែរក៏បានកត់សម្គាល់អំពីចំណងមិត្តភាពដែលកាន់តែរឹងមាំរវាងរដ្ឋាភិបាលទាំងពីរ កម្ពុជា-ចិនផងដែរ។
គួររម្លឹកផងដែរថា សហប្រតិបត្តិការទ្វេភាគីកម្ពុជាចិន ក្នុងវិស័យយោធា កំពុងតែចាក់ឬសកាន់តែជ្រៅ ក្នុងចំណោមវិស័យជាច្រើន ដែលចិនបានជួយ។ កាលពីឆ្នាំ២០១០ គ្រាន់តែសហរដ្ឋអាមេរិកបានប្រកាសព្យួរជំនួយយោធាដល់កម្ពុជាភា្លម រដ្ឋាភិបាលចិនក៏បានប្រកាសផ្តល់រថយន្តដឹកជញ្ជូនផ្នែកយោធាជាង២០០គ្រឿងភា្លមដែរ។
ទំនាក់ទំនងរវាងរដ្ឋាភិបាលចិន និងកម្ពុជាបានឈានដល់កម្រិតកិច្ចសហប្រតិបត្តិការជាយុទ្ធសាស្ត្រគ្រប់ជ្រុយជ្រោយ ដែលរដ្ឋាភិបាលទាំងពីរបានផ្តល់តម្លៃយ៉ាងខ្លាំង។ ប្រសិនបើមានការអត្ថាធិប្បាយថា ចិនកំពុងបានបន្តចាប់យកកម្ពុជាជាទីតាំងភូមិសាស្ត្រនយោបាយក្នុងតំបន់ ដើម្បីទប់ទល់នឹងឥទ្ធិពលរបស់សហរដ្ឋអាមេរិកនោះ ប្រមុខរដ្ឋាភិបាលកម្ពុជាធ្លាប់បានពន្យល់យ៉ាងសាមញ្ញដែរហើយ ថាជំនួយរបស់ចិនជាជំនួយដែលមិនភ្ជាប់លក្ខខណ្ឌចំពោះកម្ពុជាឡើយ។ ចិនដែលបានសាងសង់ផ្លូវ ស្ពានវែងជាងគេនៅកម្ពុជា។
កាលពីខែមេសាក្នុងឆ្នាំ២០១៣នេះ ក្នុងដំណើរទស្សនកិច្ចរបស់លោកនាយករដ្ឋមន្ត្រី ហ៊ុន សែនទៅប្រទេសចិន កម្ពុជាបានទទួលជំនួយជាកម្ចីជាង៥០០លានដុល្លារពីប្រទេសចិនដើម្បីប្រើប្រាស់ក្នុងការកសាងប្រព័ន្ធផ្លូវថ្នល់ និងប្រព័ន្ធប្រឡាយទឹកនៅកម្ពុជា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ