ចូលឆ្នាំចិន៖ ប្រជាជនចំណាយច្រើន ជាងឆ្នាំមុនខណៈទំនិញឡើងថ្លៃ
នៅថ្ងៃសុក្រទី២៧ មករានេះ គឺជាថ្ងៃនៃពិធីបុណ្យចូលឆ្នាំប្រពៃណីជនជាតិចិន និងវៀតណាម។ សម្រាប់ពិធីបុណ្យចូលឆ្នាំនេះ ក្រុមអាជីវករ និងប្រជាពលរដ្ឋ បានឱ្យដឹងថាពួកគាត់បានចំណាយច្រើនជាងឆ្នាំមុន ខណៈដែលតម្លៃទំនិញក៏បានឡើងផងដែរ។ អ្នកជំនាញសេដ្ឋកិច្ច បានបញ្ជាក់ថា ការចំណាយសាច់ប្រាក់ក្នុងសេដ្ឋកិច្ចគឺជារឿងល្អ ប៉ុន្តែអ្វីដែលសំខាន់នោះគឺជាកំណើនក្នុងស្រុក ឬជាកំណើនដែលប៉ះពាល់ដល់ថ្ងៃមុខ។
ចុះផ្សាយនៅថ្ងៃ៖
ស្តាប់ - ០២:៣១
ការចំណាយរបស់ប្រជាពលរដ្ឋសម្រាប់អ្នកគោរពប្រពៃណីចិន-វៀតណាម គឺប្រមាណពី៤០ម៉ឺនរៀល រហូតដល់ ២លានរៀល។ ទំហំទឹកប្រាក់ដែលបានកើនឡើងលើសពីឆ្នាំមុនប្រមាណ១០ ទៅ២០ភាគរយ។ ទឹកប្រាក់ទាំងនេះ គឺត្រូវចំណាយទៅលើរបស់របរ សែន គ្រឿងតុបតែងរៀបចំផ្ទះ និងម្ហូបអាហារដូចជាជ្រូកខ្វៃ មាន់ និងនំនែកជាច្រើនមុខផ្សេងទៀតដែលរៀបចំទៅតាមលទ្ធភាពនៃគ្រួសារនីមួយៗ។ អ្នកជំនាញសេដ្ឋកិច្ចអបអរសាទរប្រសិនបើកំណើនសេដ្ឋកិច្ចនេះ ជាកំណើនក្នុងស្រុក។
អាជីវករក្នុងផ្សារធំៗដូចជាអូរឬស្សី និងផ្សារអូឡាំពិក និងផ្សារធំថ្មីជាដើម បានបញ្ជាក់ថា កំណើននៃតម្រូវការម្ហូបអាហារ និងគ្រឿងសែនមានការកើន ទាំងក្រដាសសែន គោមពណ៌ក្រហម និងផ្កាជាដើម។ ចំណែកឯជ្រូកខ្វៃមាន់ ទា វិញក៏បានកើនឡើងផងដែរ ដោយជាមធ្យមអាជីវករជ្រូកខ្វៃម្នាក់លក់បានប្រមាណ២០០ជ្រូក ដែលមានតម្លៃជាមធ្យម២០ម៉ឺនរៀល។ តម្លៃនេះក៏បានកើនឡើងប្រមាណចន្លោះពី១០ ទៅ២០ភាគរយផងដែរ។ អ្នកលក់ដូរទាំងអស់បានលើកឡើងថា អ្នកទិញ បានចំណាយច្រើនជាងឆ្នាំមុន ដោយពួកគាត់បានលើកឡើងថា ពលរដ្ឋបច្ចុប្បន្នអាចមានចំណូលប្រចាំគ្រួសារកើនឡើង។ អ្នកលក់ខ្លះថែមទាំងហ៊ានអះអាងថា ពិធីបុណ្យចូលឆ្នាំចិន គឺលក់ដាច់ និងកាក់កបជាបុណ្យផ្សេងទៀត។
ប្រជាពលរដ្ឋដែលបានផ្តល់បទសម្ភាសន៍ទាំងអស់ បានបញ្ជាក់ថា សម្រាប់គ្រួសារដែលបានសែនដាក់ជ្រូកខ្វៃ បន្ថែមលើការសែនមាន់ និងនំចំណីផ្លែឈើ បានចំណាយប្រមាណក្នុងរង្វង់មួយលានរៀលដោយមិនទាន់គិតពីការទិញសំភារៈសម្រាប់គ្រួសារ និងចំណាយបន្តិចបន្តួចផ្សេងៗទៀត។ អ្នកទាំងនោះក៏បានអះអាងថា ថ្លៃទំនិញបានកើនឡើងផងដែរ។ ឧទាហរណ៍ឆ្នាំមុនមានទឹកប្រាក់៣៥ដុល្លារអាចទិញជ្រូកខ្វៃទំងន់៥-៦គីឡូបាន ប៉ុន្តែឆ្នាំនេះ តម្លៃបានឡើងដល់៤០ដុល្លារជាដើម។
អ្នកជំនាញសេដ្ឋកិច្ច បានអះអាងថា ការកើនការចំណាយនោះគឺជាបច្ច័យល្អសម្រាប់ដំណើរការសេដ្ឋកិច្ចទាំងមូល។ ប៉ុន្តែលោកចាន់ សុផល អ្នកជំនាញសេដ្ឋកិច្ច បានប្រយ័ត្នប្រយែងក្នុងការវាយតម្លៃថា ចំណូលគ្រួសារកម្ពុជានីមួយៗបានកើនឡើងខណៈកំណើនសេដ្ឋកិច្ចបានកើនឡើងក្នុងរង្វង់៧ភាគរយដដែល។
យ៉ាងណាក៏ដោយ លោកបានលើកឡើងថា កំណើននៃចំណាយនេះ គឺសម្រាប់កំណើនក្នុងស្រុកនោះ វាជាកំណើនល្អ ប៉ុន្តែប្រសិនបើទំនិញនោះជារបស់នាំចូលពីក្រៅប្រទេសនោះទេ វាមិនមែនជាកំណើនពិតរបស់កម្ពុជាឡើយ ព្រោះវាជាកំណើនដែលហុចផលទៅក្រៅប្រទេស ហើយកម្ពុជាទទួលបានផលតិចតួច៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ