តើលទ្ធផលឆ្នោតឃុំសង្កាត់បញ្ជាក់កាន់តែច្បាស់ពីដំណើរទៅរកការផ្លាស់ប្តូរ?
ចុះផ្សាយនៅថ្ងៃ៖
ស្តាប់ - ០៥:១៧
កាលពីពេលបោះឆ្នោតជាតិឆ្នាំ២០១៣ អ្នកគាំទ្របក្សសង្គ្រោះជាតិ បានធ្វើឲ្យបក្សប្រជាជនកម្ពុជា ភ្លឺភ្នែករួចម្តងហើយ និងជាហេតុបង្ខំឲ្យបក្សកាន់អំណាច ត្រូវតែធ្វើកំណែទម្រង់យ៉ាងខ្លាំង។ នៅពេលនេះ បក្សសង្គ្រោះជាតិ បានមេឃុំចៅសង្កាត់ដល់ទៅជិត៥០០ គឺរឹតតែធ្វើឲ្យបក្សកាន់អំណាចមិនអាចនៅស្ងៀមបានឡើយ។ ដូច្នេះ តើនេះគឺអាចជាសញ្ញាណដៅទៅការផ្លាស់ប្តូរនៅទីបំផុត មែនដែរឬទេ?
បើទោះបី លទ្ធផលបោះឆ្នោតផ្លូវការ ពីគ.ជ.ប. គឺមិនទាន់បង្ហាញពិតមែន តែគណបក្សប្រជាជនកម្ពុជា និងគណបបក្សសង្គ្រោះជាតិ ដែលបានដាក់ភ្នាក់ងារគណបក្សនយោបាយរបស់ខ្លួន នៅគ្រប់ការិយាល័យទាំងអស់នោះ គឺសុទ្ធតែមានលទ្ធផលរបស់ខ្លួនរៀងៗខ្លួន។
ទិន្នន័យរបស់បក្សធំៗទាំងពីរនេះ គឺមិនសូវជាខុសគ្នា ឬមានគម្លាតគ្នាឆ្ងាយប៉ុន្មានទេ។ ពោលគឺក្នុងចំណោម ចំនួនមេឃុំចៅសង្កាត់ ១ ៦៤៦ បក្សប្រជាជនកម្ពុជា អះអាងថា ខ្លួនទទួលបានមេឃុំ ប្រមាណជាង ១ ១៦៣ ឃុំ ហើយនិងថា បក្សប្រឆាំងបានមេឃុំ ប្រហែល ៤៨០។ ចំណែកបក្សសង្គ្រោះជាតិវិញ បានគណនាទូទាត់ខ្លួនឯងដែរ និងចេញលទ្ធផលថា បក្សខ្លួន បានមេឃុំចៅសង្កាត់ ដល់ជិត៥០០ ព្រមទាំងបានសមាជិកក្រុមប្រឹក្សាឃុំសង្កាត់ ជិតពាក់កណ្តាលនៃផ្ទៃប្រទេស។
ប្រសិនបើលទ្ធផលសម្រេចផ្លូវការចុងក្រោយរបស់គ.ជ.ប. ចេញមកដូចនឹងទិន្នន័យដែលបក្សធំៗទាំងពីរមានរៀងៗខ្លួនមែននោះ គឺបញ្ជាក់ច្បាស់ណាស់ថា បក្សទាំងពីរបានទទួលជ័យជម្នះរៀងៗខ្លួន។
ចំពោះគណបក្សជាជនកម្ពុជា ដែលបក្សឈ្នះឆ្នោតជាប់រហូត! ជ័យជម្នះរបស់បក្សនេះ គឺនៅតែបន្តឈ្នះឆ្នោត ភាគច្រើនទៀត ក្នុងការបោះឆ្នោតឃុំសង្កាត់នេះ ហើយថែមទាំងបានកើនឡើងសំឡេងដល់ទៅជាង៣០ម៉ឺនសំឡេងទៀតផង។ នេះបើតាមការបូកគន់គូររបស់ ប្រធានបក្សប្រជាជនកម្ពុជា លោក ហ៊ុន សែន តែម្តងផង ដែលយកទៅធៀបនឹងសំឡេងកាលពីឆ្នាំ ២០១៣។ កំណើនសំឡេងនេះ គឺជាសមិទ្ធផលមិនអាចប្រកែកបាន ពីកំណែទម្រង់ស៊ីជម្រៅ រយៈពេលប៉ុន្មានឆ្នាំចុងក្រោយនេះ បូករួមទាំងកេរដំណែល ដែលបក្សប្រជាជនកម្ពុជា ខំកសាងនិងរក្សាបានសន្តិភាព ប៉ុន្មានទសវត្សរ៍មកនេះ។
ចំពោះបក្សសង្គ្រោះជាតិវិញ! ប្រសិនបើគេបូកចំនួនមេឃុំរបស់បក្សសម រង្ស៊ី និងបក្សសិទ្ធិមនុស្ស រួមបញ្ជូលគ្នាជាបក្សសង្គ្រោះជាតិ គឺមានមេឃុំត្រឹមតែចំនួន៤០តែប៉ុណ្ណោះ កាលពីឆ្នាំ២០១២។ ក៏ប៉ុន្តែ នៅឆ្នាំ២០១៧នេះ គឺវាបានកើតឡើងដល់ទៅ១២ដងច្រើនជាងមុន កើនពី៤០ ដល់ទៅជិត ៥០០ មេឃុំចៅសង្កាត់។ នេះជាចំនួនដែលកើនឡើងយ៉ាងគំហុក ក្នុងរយៈពេល៥ឆ្នាំ និងប្រៀបធៀបរវាងការបោះឆ្នោតឃុំសង្កាត់ដូចគ្នា។ទាំងនេះ ផ្អែកលើទិន្នន័យរបស់ប្រមុខបក្សសង្គ្រោះជាតិ លោក កឹម សុខា។
ជោគជ័យរបស់បក្សសង្គ្រោះជាតិ បើគេយល់ថា ដោយសារតែផ្អែកទៅលើកម្មវិធីនយោបាយ សារខ្លីៗ សាមញ្ញ ទាក់ទងនឹងលុយកាក់ ទាក់ចិត្តម្ចាស់ឆ្នោនោះ គឺជារឿងសមហេតុផលមួយដែរ តែរឿងធំមួយទៀត គឺដោយសារតែពលរដ្ឋអ្នកគាំទ្របក្សនេះ ចង់ឃើញដំណើរការផ្លាស់ប្តូរនៅមូលដ្ឋានរបស់ពួកគេ។ ផ្លាស់ប្តូរនៅលើទិដ្ឋភាព សន្តិសុខ សុវត្ថិភាព បញ្ហាគ្រឿងញៀន និងប្រព័ន្ធរដ្ឋបាលដែលស្មុគស្មាញ ទៅកាន់របៀបធ្វើការថ្មីដែលងាយស្រួល ឆាប់រហ័ស និងគ្មានអំពើពុករលួយ។ និយាយបែបផ្សេង គឺពួកគេចង់ឃើញ និងចង់សាកភ្លក្សរសជាតិរចនាសម្ព័ន្ធមូលដ្ឋានថ្មី ជៀសវាងនៅទ្រាំត្រែងនៅប្រព័ន្ធរដ្ឋបាលថ្នាក់ក្រោមជាតិដដែលៗ ឬនិយាយបែបសាមញ្ញ គឺចង់ប្តូរមេឃុំចៅសង្កាត់ថ្មី។
ចរន្តនៃការចង់ផ្លាស់ប្តូរនេះ គឺប្រភពធំបំផុត អាចមកពីក្រុមយុវជនដែលមានចំនួនភាគច្រើននៅផ្ទៃប្រទេស។ យុវជនជាន់ថ្មី អាយុក្រោម៣៥ឆ្នាំ គឺតាំងតែពីកើតមក ធ្លាប់តែឃើញមេឃុំ និងថ្នាក់ដឹកនាំមូលដ្ឋាន មុខដដែលៗ។ ធម្មតាទេ របស់ថ្មី ប្លែក គឺទាក់ទាញចិត្តយុវជន។ ជាមួយគ្នានេះ ពួកយុវជន គឺជាពលរដ្ឋសកម្ម ដែលជាអ្នកធ្វើការងារ ទ្រទ្រង់សេដ្ឋកិច្ចគ្រួសារ។ ដូច្នេះ តិចឬច្រើន ពួកគេច្បាស់ជាមានឥទ្ធិពលផ្នែករកចំណូលក្នុងគ្រួសារ តួយ៉ាងមាន ក្រុមកម្មករ ក្រុមពលករ នៅក្នុងនិងក្រៅស្រុក ។
ក៏ប៉ុន្តែ យ៉ាងណាក៏ដោយ ចំពោះការបោះឆ្នោតជាតិនៅឆ្នាំក្រោយវិញ ចរន្តដៅទៅរកការផ្លាស់ប្តូរ អាចនឹងមានការប្រែប្រួល។ ប្រែប្រួល ដ្បិតថា ចិត្តសាវារបស់ម្ចាស់ឆ្នោត ដែលអាចនឹងគ្រប់វិនាទី។ ធំដុំៗជាងនេះ គឺសកម្មភាពសាច់ការជាក់ស្តែង ដែលជាសមិទ្ធផលពិតរបស់មេឃុំចៅសង្កាត់ សមាជិកក្រុមប្រឹក្សាឃុំសង្កាត់ ទាំងអស់របស់បក្សធំៗទាំងពីរនេះ ដែលគឺជាអ្នកដើរតួតំណាងមុខមាត់របស់បក្សពួកគេទាំងពីរ។ ផ្ទុយទៅវិញ ប្រសិនបើពួកគេទាំងនោះ គ្មានគោរពការសន្យា ឬមិនអាចធ្វើបាន នូវកម្មវិធីនយោបាយ បម្រើប្រយោជន៍ពលរដ្ឋពិតប្រាកដនោះទេ ម្ចាស់ឆ្នោត ក៏អាចនឹងប្រែប្រួលជាបន្តទៀត នៅឆ្នាំ២០១៨។
ម្យ៉ាងទៀត ការបោះឆ្នោតឆ្នាំជាតិ នៅឆ្នាំក្រោយនេះ គឺវាមានតម្លៃខុសគ្នាពីការបោះឆ្នោតថ្នាក់ឃុំសង្កាត់។ ពោលគឺជាការបោះឆ្នោតជ្រើសរើសក្បាលម៉ាស៊ីនដឹកនាំប្រទេសជាតិទាំងមូល តែម្តង។ ដូច្នេះ ចំនួនអ្នកទៅចុះឈ្មោះបោះឆ្នោត និងអ្នកទៅបោះឆ្នោត គឺក៏អាចនឹងខុសគ្នាពីចំនួនអ្នកទៅបោះឆ្នោតឃុំសង្កាត់ នៅឆ្នាំនេះ ហើយវាក៏អាចនឹងធ្វើឲ្យលទ្ធផលប្រួលប្រែផងដែរ។
សម្រាប់បក្សប្រជាជនកម្ពុជា ក្នុងគ្រាបច្ចុប្បន្ន បើទោះបីជាកើនសំឡេងគាំទ្រ ជាង៣០ម៉ឺននាក់ក៏ដោយ ប៉ុន្តែបក្សនេះ បានបាត់បង់អាសនៈមេឃុំចៅសង្កាត់ច្រើនសន្ធឹកសន្ធាប់ ដល់ទៅរាប់រយកន្លែង។ ហេតុនេះ គឺជាសញ្ញាណដែលបង្ខំឲ្យបក្សកាន់អំណាច រឹតតែត្រូវប្រឹងប្រែងទ្វេឡើងថែមទៀត ដើម្បីរក្សាមុខមាត់នៅឆ្នាំ២០១៨ តាមរយៈកំណែទម្រង់ស៊ីជម្រៅ គឺត្រូវងូតទឹក ឆ្លុះកញ្ចក់ ដុសក្អែល និងព្យាបាលជំងឺ។ បើពុំដូច្នោះទេ អ្នកគាំទ្ររបស់បណ្តាគណបក្សប្រឆាំងទាំងឡាយ អាចនឹងធ្វើឲ្យបក្សកាន់អំណាច រឹងរឹតភ្លឺភ្នែកជាថ្មីម្តងទៀត ជាមិនខាន នៅឆ្នាំក្រោយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ