ស្ពានជ្រោយចង្វារទី១ នឹងត្រូវបិទចរាចរទាំងស្រុងនៅថ្ងៃទី១តុលា ដើម្បីជួសជុល
ស្ពានជ្រោយចង្វារទី១ នឹងត្រូវបិទចរាចរទាំងស្រុងចាប់ពីថ្ងៃទី០១តុលាតទៅ ដើម្បីជួសជុលកែលម្អឡើងវិញ។ សាលារាជធានីភ្នំពេញ និងអង្គការ JICA បានស្នើសុំការយោគយល់ពីប្រជាពលរដ្ឋ ចំពោះការកកស្ទះចរាចរណ៍ដែលអាចកើតមាននៅក្នុងអំឡុងពេលជួសជុលស្ពានជ្រោយចង្វារទី១នេះ។
ចុះផ្សាយនៅថ្ងៃ៖
ស្តាប់ - ០២:១១
ដំណើរការជួសជុលស្ពានមិត្តភាពកម្ពុជា-ជប៉ុន ឬស្ពានជ្រោយចង្វារទី១ នឹងអូសបន្លាយចាប់ពីខែតុលាឆ្នាំ២០១៧ រហូតដល់ខែមិថុនាឆ្នាំ២០១៩។ ក្នុងអំឡុងពេលជួសជុលនេះ ស្ពានមិត្តភាពកម្ពុជា-ចិន ឬស្ពានជ្រោយចង្វារទី២ នឹងត្រូវដាក់ឲ្យដំណើរការសម្រាប់ចរាចរទាំងទិសចេញនិងទិសចូលរាជធានីភ្នំពេញ។ យ៉ាងណាក៏ដោយ ទាំងរដ្ឋបាលរាជធានីភ្នំពេញ និងទាំងអង្គការ JICA ដែលទទួលខុសត្រូវលើការងារជួសជុលនេះ រំពឹងទុករួចជាស្រេចហើយថា ការកកស្ទះចរាចរណ៍នឹងកើតមានដោយចៀសមិនផុត។
ដូច្នេះ ដើម្បីជៀសវាងការកកស្ទះចរាចរណ៍នៅលើស្ពានជ្រោយចង្វារទី២ ក៏ដូចជាចំណុចក្បាលស្ពានទាំងសងខាង រដ្ឋបាលរាជធានីភ្នំពេញ បានដាក់ចេញនូវការទិសដៅចរាចរណ៍បន្ថែម ដោយក្នុងនោះ រថយន្តធុនធំចូលក្នុងរាជធានីភ្នំពេញតាមផ្លូវជាតិលេខ៦ ត្រូវពង្វាងបត់ចូលតាមផ្លូវលីយ៉ុងផាត់។ ចំណែកយានយន្តគ្រប់ប្រភេទដែលចូលក្រុងភ្នំពេញតាមផ្លូវជាតិលេខ៦ មកដល់ចំណុចថ្នល់កែង ត្រូវបត់ស្ដាំ ធ្វើចរាចរតាមកំណាត់ផ្លូវជាតិលេខ៦ ឆ្ពោះទៅផ្សារព្រែកក្ដាម និងបន្តដំណើរចូលទីក្រុងភ្នំពេញតាមផ្លូវជាតិលេខ៥វិញ។ ក្នុងករណីមានការកកស្ទះចរាចរណ៍ក្នុងតំបន់ការដ្ឋានធ្ងន់ធ្ងរ រដ្ឋបាលរាជធានីភ្នំពេញបានតម្រូវឲ្យអ្នកបញ្ជាយានយន្តគ្រប់ប្រភេទអនុវត្តតាមការបង្វែរទិសចរាចរណ៍របស់សមត្ថកិច្ចជំនាញ។
ទន្ទឹមគ្នានេះ រដ្ឋបាលក្រុងភ្នំពេញកំពុងតែសាងសង់ស្ពានបាឡេ ឆ្លងទន្លេសាប ដើម្បីសម្រួលការកកស្ទះចរាចរណ៍ផងដែរ ដោយស្ពានបាឡេនោះ មានទីតាំងនៅត្រង់ចំណុចឃ្លាំងសាំងសូគីម៉ិច។ យ៉ាងណាក៏ដោយ គេត្រូវរង់ចាំរយៈពេល៦ខែ ទម្រាំតែការសាងសង់ស្ពានបាឡេនោះចប់សព្វគ្រប់។
សូមរំឭកជូនថា ស្ពានមិត្តភាពកម្ពុជា-ជប៉ុន ឬស្ពានជ្រោយចង្វារទី១ ត្រូវបានសាងសង់រួចរាល់នៅឆ្នាំ១៩៦៧។ នៅក្នុងសម័យសង្គ្រាម ស្ពាននេះរងការបំផ្លិចបំផ្លាញឲ្យខូចខាតស្ទើរតែទាំងស្រុង។ ប៉ុន្តែរដ្ឋាភិបាលជប៉ុនបានផ្ដល់ជំនួយជួសជុលនិងដាក់ឲ្យដំណើរការឡើងវិញនៅឆ្នាំ១៩៩៦។ អង្គការ JICA របស់ជប៉ុនបានសង្កត់ធ្ងន់ថា បច្ចុប្បន្ន ស្ពានដែលមានវ័យជាង៥០ឆ្នាំនេះ មានសភាពចាស់ទ្រុឌទ្រោម ពុំមានសុវត្ថិភាពសម្រាប់ការដឹកជញ្ជូននិងការធ្វើដំណើរឆ្លងកាត់ឡើយ។ ហើយចំពោះការជួសជុលស្ពានជ្រោយចង្វារទី១នាពេលនេះ រដ្ឋាភិបាលជប៉ុនបានផ្ដល់ហិរញ្ញប្បទានជាង៣០លានដុល្លារ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ