មហោស្រពភាពយន្តអន្ដរជាតិកម្ពុជាឆ្នាំនេះ មានកុនបញ្ចាំង១៣៨ចំណងជើង
មហោស្រពភាពយន្តអន្ដរជាតិកម្ពុជាលើកទី៧ ឆ្នាំ២០១៧ ចាប់ផ្ដើមហើយនៅថ្ងៃសៅរ៍នេះ ដោយមានបញ្ចាំងខ្សែភាពយន្តចំនួន១៣៨ចំណងជើង។ ការចាក់បញ្ចាំងធ្វើឡើងនៅទីតាំងចំនួន៩ផ្សេងគ្នា ទូទាំងរាជធានីភ្នំពេញ ចាប់ពីថ្ងៃទី៤ដល់ថ្ងៃទី៩មីនា។ សម្រាប់ក្រសួងវប្បធម៌ មហោស្រពភាពយន្តអន្ដរជាតិកម្ពុជា គឺជាព្រឹត្តិការណ៍ដ៏សំខាន់មួយ ក្នុងការលើកស្ទួយនិងគាំទ្រដល់ឧស្សាហកម្មភាពយន្តរបស់ខ្មែរ។
ចុះផ្សាយនៅថ្ងៃ៖
មហោស្រពភាពយន្តអន្ដរជាតិកម្ពុជា ដែលជាព្រឹត្តិការណ៍ភាពយន្តប្រចាំឆ្នាំធំជាងគេរបស់កម្ពុជា បានវិលត្រឡប់មកវិញហើយ បន្ទាប់ពីខកខានមិនបានរៀបចំកាលពីឆ្នាំ២០១៦។
ត្រឡប់មកវិញឆ្នាំនេះ មហោស្រពភាពយន្តអន្ដរជាតិកម្ពុជា ត្រូវបានរៀបចំឡើងធំជាងមុន និងសម្បូរបែបជាងមុន ដោយមានខ្សែភាពយន្តចំនួន១៣៨ចំណងជើង ចាក់បញ្ចាំងលើសពី១៦០លើក នៅទីតាំងចំនួន៩ផ្សេងគ្នា ទូទាំងរាជធានីភ្នំពេញ។ ក្នុងនោះ ខ្សែភាពយន្តអំពីប្រទេសកម្ពុជា មានជាអាថិ៍ ភាពយន្តឯកសារបទចម្រៀងចុងក្រោយរបស់ព្រះមហាក្សត្រ ជាការផ្ដិតទុកព្រះរាជពិធីបូជាព្រះសពព្រះបាទ នរោត្តម សីហនុ នៅឆ្នាំ២០១២។ រឿងសតិជាប់ទ្រុង និយាយពីការប្រឈមមុខគ្នារវាងវេជ្ជសាស្ត្រនិងការព្យាបាលបែបបុរាណ។ រឿងប៉ុបពីទៅហូលីវូដ ផ្ដោតលើការរត់គេចខ្លួនរបស់កម្លោះទីក្រុងទៅជនបទ ដែលពោរពេញដោយរឿងភ្ញាក់ផ្អើលនិងសំណើច។ រឿងការពារឧក្រិដ្ឋជន រឿងកោះពេជ្រ រឿងបត់ឆ្វេងបត់ស្ដាំ រឿងនារីវេទមន្ត រឿងវិកលចរិត និងរឿងស្នេហ៍ស្វ័យគុណ៤។
ចំណែកភាពយន្តអន្ដរជាតិវិញ មានតាំងពីរឿង Moonlight ជាភាពយន្តល្អជាងគេបង្អស់ប្រចាំឆ្នាំ ដោយបានឈ្នះពានរង្វាន់អូស្កាផ្នែក Best Picture។ រឿង La La Land ដែលស្រវាបានពានរង្វាន់អូស្កា៦ នៅឆ្នាំ២០១៧នេះ។ និងរឿង Jackie ស្ដ្រីទី១របស់អាមេរិក បន្ទាប់ពីហេតុការណ៍បាញ់សម្លាប់ប្រធានាធិបតី John F. Kennedy។ ក្រៅពីនោះក៏មានផងដែរ ភាពយន្តមកពីប្រទេសនានាទូទាំងពិភពលោក ដូចជាប្រទេសថៃ ឡាវ វៀតណាម ជប៉ុន កាណាដា អង់គ្លេស រ៉្វាន់ដា និងឆេកូស្លូវ៉ាគីជាដើម សរុបទាំងអស់៤០ប្រទេស។
ក្រៅពីការចាក់បញ្ចាំងខ្សែភាពយន្ត មហោស្រពភាពយន្តអន្ដរជាតិកម្ពុជានាឆ្នាំនេះ ក៏មានរួមបញ្ចូលផងដែរ ការតាំងពិព័រណ៍សិល្បៈ «ស្រមោលអន្ទោលតាមប្រាណ» ដោយ លាង ស៊ីកន ម៉ក់ រ៉េមីស្សា និង ស៊ូ សុភី, បទបង្ហាញពីការផលិតភាពយន្តដោយអ្នកជំនាញអន្ដរជាតិ និង កម្មវិធីជជែកពិភាក្សាអំពីយុត្តិធម៌ក្រោយអំពើប្រល័យពូជសាសន៍នៅកម្ពុជានិងរ្វ៉ាន់ដា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ