អ្នកសារព័ត៌មានប្រជាពលរដ្ឋផ្តល់ប្រយោជន៍ដល់សង្គមច្រើន ខណៈបញ្ហាប្រឈមនៅតែមាន
លោក អ៊ុក គឹមសេង អនុរដ្ឋាលេខាធិការក្រួសងព័ត៌មានបានបញ្ជាក់ថា បច្ចុប្បន្ននេះ ប្រជាពលរដ្ឋកម្ពុជាជាច្រើនបានចូលរួមផ្តល់ព័ត៌មានតាមរយៈការហៅទូរស័ព្ទចូលក្នុងកម្មវិធីវិទ្យុ និងចែករំលែកព័ត៌មានតាមបណ្តាញសង្គម ដែលពួកគាត់ទាំងនោះ គឺជាប្រជាពលអ្នករដ្ឋសារព័ត៌មាន ហើយបានចូលរួមចំណែកផ្តល់ផលប្រយោជន៍ដល់សង្គម។ តែយ៉ាងណាមិញ ការចូលរួមចែករំលែកព័ត៌មានរបស់ពួកគាត់នេះ នៅតែមានបញ្ហាប្រឈមមួយចំនួន។
ចុះផ្សាយនៅថ្ងៃ៖
ស្តាប់ - ០២:០៨
អ្នកស្រី នៅ ស្រីល័ក្ខ ជាតំណាងប្រជាពលរដ្ឋអ្នកសារព័ត៌មានបានបញ្ជាក់ថា បច្ចុប្បន្ននេះ ប្រជាពលរដ្ឋអ្នកសារព័ត៌មានដូចជាអ្នកស្រី ត្រូវបានអាជ្ញាធររដ្ឋាភិបាលហាមឃាត់មិនឲ្យចូលយកព័ត៌មានទេ ក្នងព្រឹត្តិការណ៍មួយចំនួន។ យ៉ាងណាមិញ អ្នកស្រីថាអត្ថបទ ដែលអ្នកស្រីយកមកចុះផ្សាយនោះ មិនមានបញ្ហានោះទេ។ បើទោះបីជាអ្នកស្រីជាប្រជាពលរដ្ឋសារព័ត៌មានមែន តែក៏មានការបង្ហាត់បង្រៀនមួយចំនួនដូចជារបៀបសរសេរអត្ថបទសារព័ត៌មាន របៀបថតរូបក្នុងស្ថានភាពផ្សេងៗ ដើម្បីអាចផលិតបានព័ត៌មានមួយ។
លោក អ៊ុក គឹមសេង តំណាងក្រសួងព័ត៌មានបានថ្លែងក្នុងវេទិកាប្រចាំឆ្នាំរបស់មជ្ឈមណ្ឌលកម្ពុជា ដើម្បីប្រព័ន្ធផ្សព្វផ្សាយឯករាជ្យ ថាប្រជាពលរដ្ឋអ្នកសារព៌ត័មានបានចែករំលែកព័ត៌មានរបស់ពួកគាត់តាមបណ្តាញសង្គម ហើយផ្តល់ផលប្រយោជន៍ជាច្រើន តែក៏មានការចែករំលែកព័ត៌មាន ដែលមានចរិតបែបឃោសនាអូសទាញផងដែរ។ ដូច្នេះលោកសុំឲ្យមានការចែករំលែកពីអ្នកសារព័ត៌មានអាជីពទៅប្រជាពលរដ្ឋសារព័ត៌មាន និងនិស្សិតសារព័ត៌មាន ឲ្យយល់ដឹងពីតម្លៃព័ត៌មាន ដើម្បីកុំឲ្យពួកគាត់ធ្លាក់ទៅក្នុងការបំផ្លាញសមិទ្ធផលរបស់សង្គម។
លោក ប៉ែន បូណា និពន្ធនាយកទូរទស្សន៍ភីអិនអិន ដែលជាអ្នកសារព័ត៌មានអាជីពមួយរូប បានឲ្យដឹងថាបច្ចុប្បន្ននេះ មានការបណ្តុះបណ្តាលប្រជាពលរដ្ឋអ្នកសារព័ត៌មានឲ្យពួកគាត់កាន់តែយល់ពីអាជីពនេះ ដោយសារតែអ្នកសារព័ត៌មានត្រូវតែទទួលបានការបណ្តុះបណ្តាលមួយ។ បើគាត់មិនបានទទួលការបណ្តុះបណ្តាលទេ គឺគាត់មិនអាចបំពេញតួនាទីនេះ ឲ្យចំទិសដៅបានទេ ពោលគឺគាត់មិនអាចរាយការណ៍ព័ត៌មានមួយដែលឆ្លុះបញ្ចាំងពីការពិតក្នុងសង្គមបានទេ។
សូមបញ្ជាក់ថានៅព្រឹកថ្ងៃទី៨ ខែវិច្ឆិកានេះ មជ្ឈមណ្ឌលកម្ពុជា ដើម្បីប្រព័ន្ធផ្សព្វផ្សាយឯករាជ្យ(CCIM)បានរៀបចំវេទិកាប្រចាំឆ្នាំស្តីពី ទំនាក់ទំនងរវាង អ្នកសារព័ត៌មានអាជីព ប្រជាពលរដ្ឋអ្នកសារព័ត៌មាន និង និស្សិតសារព័ត៌មាន នៅសណ្ឋាគារហ៊ីម៉ាវរី។ ជាវេទិកា ដែលរៀបចំឡើងនៅ ក្នុងគោលបំណង ពង្រីកទំនាក់ទំនង ការផ្សារភ្ជាប់គ្នា បញ្ហាប្រឈម និង ផ្លាស់ប្តូរបទពិសោធក្នុងវិស័យសារព័ត៌មាន នៅក្នុងចំណោមអ្នកសារព័ត៌មានប្រជាពលរដ្ឋ ស្ថាប័នសារព័ត៌មាន និង អ្នកសារព័ត៌មានអាជីព ដោយមានអ្នកចូលរួមប្រមាណ១៥០នាក់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ