សង្គមស៊ីវិលស្វាគមន៍ការបន្ធូរដៃរបស់ ក្រសួងមហាផ្ទៃករណីស៊ើបអង្កេតបដិវត្តន៍ពណ៌
មន្រ្តីអង្គការសង្គមស៊ីវិលមួយចំនួនបានសម្ដែងការធូរចិត្តបន្តិច នៅពេលដែលក្រសួងមហាផ្ទៃបង្ហើបពីគម្រោង នឹងរំសាយការស៊ើបអង្កេតលើក្រុមអង្គការសង្គមស៊ីវិលពាក់ព័ន្ធសំណុំរឿងបដិវត្តន៍ពណ៌។ បដិវត្តន៍ពណ៌ដែលអាជ្ញាធរតែងតែលើកឡើងថា ពួកគេគឺជាក្រុមតែមួយអតីតគណបក្សសង្គ្រោះជាតិ។
ចុះផ្សាយនៅថ្ងៃ៖
ស្តាប់ - ០១:៥០
«យើងស្វាគមន៍នៅពេលដែលរដ្ឋាភិបាល រំសាយការចោទប្រកាន់លើអង្គការសង្គមស៊ីវិលជាពិសេសអង្គការខុមហ្វ្រែលតែម្ដង ក្នុងរឿងបដិវត្តន៍ពណ៌» នេះគឺជាការលើកឡើងរបស់លោក យឿង សុធារ៉ា មន្ត្រីផ្នែកច្បាប់នៃអង្គការខុមហ្វ្រែល។ បើតាមលោក សុធារ៉ា ជំហររដ្ឋាភិបាលបែបនេះគឺជាអ្វីដែលលោកចង់បាន។ ជាថ្មីទៀតលោក យឿង សុធារ៉ា អះអាងថា ខុមហ្វ្រែលគ្រាន់តែធ្វើការតស៊ូមតិដើម្បីនាំមកនូវកំណែទម្រង់ការបោះឆ្នោតប៉ុណ្ណោះ។ ហើយអ្វីដែលខុមហ្វ្រែលបានធ្វើនាពេលកន្លងមកគឺតាមច្បាប់ទាំងស្រុង។
សូមបញ្ជាក់ថា អង្គការខុមហ្វ្រែលក៏ធ្លាប់ចេញសេចក្ដីថ្លែងការណ៍មួយកាលពីថ្ងៃទី២៧ ខែតុលា ឆ្នាំ២០១៧ ដោយសុំឲ្យអង្គភាពព័ត៌មាន និងប្រតិកម្មរហ័ស នៃទីស្ដីការគណៈរដ្ឋមន្ដ្រីបញ្ឈប់ការយក ស្ថាប័នរបស់ខ្លួនទៅចង់ភ្ជាប់ជាមួយគណបក្សនយោបាយ និងចេតនាធ្វើបដិវត្ដន៍ពណ៌នៅកម្ពុជាទៀតទៅ។
ចំណែកលោក សន ជ័យ ប្រធានអង្គការសម្ព័ន្ធគណនេយ្យភាពសង្គមមានយោបល់ថា ពាក្យបដិវត្តន៍ពណ៌ខ្លះគឺផ្ដើមចេញពីការលាបពណ៌ដែរ។ ដូច្នេះរដ្ឋាភិបាលគួរតែគិតលើបច្ចេកទេស ឬក៏របៀបធ្វើការរបស់អង្គការសង្គមស៊ីវិលមុននឹងធ្វើការសន្និដ្ឋាន។ នេះបើតាមលោក សន ជ័យ ។ លោកជឿជាក់ថា សង្គមស៊ីវិលមិនមានជាប់ពាក់ព័ន្ធនឹងបដិវត្តន៍ពណ៌អ្វីទេ។
សូមបញ្ជាក់ថា ក្រសួងមហាផ្ទៃតាមរយៈអ្នកនាំពាក្យលោក ខៀវ សុភ័គ បានថ្លែងប្រាប់ កាសែតក្នុងស្រុកថា ក្រសួងនឹងរំសាយចោលវិធានការដែលធ្លាប់កំណត់គោលដៅនៃការស៊ើបអង្កេតលើក្រុមអង្គការសង្គមស៊ីវិលមួយចំនួន។ ប៉ុន្តែសមត្ថកិច្ចនឹងឃ្លាំមើលសកម្មភាពរបស់ថ្នាក់ដឹកនាំ និងមន្ត្រីអង្គការសង្គមស៊ីវិលទាំងនោះជាបន្តទៀត។ បើតាមអ្នកវិភាគមើលឃើញថា អ្វីដែលក្រសួងធ្វើនាពេលនេះដោយសារតែអតីតគណបក្សសង្គ្រោះជាតិត្រូវបានរំលាយ ព្រោះ គណបក្សសង្គ្រោះជាតិដែលពីមុនត្រូវបានទាញភ្ជាប់ជាមួយអង្គការសង្គមស៊ីវិលថា ជាក្រុមតែមួយនាំមកនូវបដិវត្តន៍ពណ៌តាមរយៈការទទួលជំនួយពីសហរដ្ឋអាមេរិក៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ