មន្រ្តីសង្គមស៊ីវិលស្នើឲ្យដោះលែង លោក គឹម សុខ ត្រឹមសំណុំរឿងទី១
សំណុំរឿង លោក គឹម សុខ ជាអ្នកវិភាគនយោបាយ គ្រោងបិទបញ្ចប់នៅថ្ងៃទី១៧សីហា ដែលទាក់ទងនឹងការចោទប្រកាន់គណបក្សប្រជាជន នៅពីក្រោយការសម្លាប់លោក កែម ឡី កាលពីថ្ងៃទី១០កក្កដាឆ្នាំ២០១៦។ ប៉ុន្តែទោះជាបែបនេះក្ដី តុលាការក្រុងភ្នំពេញបានចាប់ផ្ដើមសួរ លោក គឹម សុខ លើសំណុំរឿងបន្ទាប់មួយទៀត ខណៈមន្រ្តីសង្គមស៊ីវិលនៅថ្ងៃព្រហស្បតិ៍នេះស្នើឲ្យដោះលែង លោក គឹម សុខ ត្រឹមសំណុំរឿងទី១។
ចុះផ្សាយនៅថ្ងៃ៖
ស្តាប់ - ០១:៥១
សំណុំរឿងទី២ដែលតុលាការក្រុងភ្នំពេញផ្ដើមធ្វើការសួរនាំលើលោក គឹម សុខ គឺមានជាប់ពាក់ព័ន្ធនឹងការលើកឡើងរបស់គាត់ដែលថា រដ្ឋាភិបាលបានបង្កើតប្រព័ន្ធមួយសម្លាប់មនុស្ស ហើយរកឃាតករអ្នកប្រព្រឹត្តមិនឃើញ។ ក្រោយការលើកឡើងនេះលោកមេធាវី គី តិច ដែលជាមេធាវីតំណាងឲ្យរដ្ឋាភិបាលបានដាក់ពាក្យបណ្ដឹង ប្ដឹងលោក គឹម សុខ នៅថ្ងៃទី១៦កុម្ភៈឆ្នាំ២០១៧។
លោកមេធាវី គី តិច បានថ្លែងប្រាប់វិទ្យុបារាំងអន្តរជាតិនៅថ្ងៃព្រហស្បតិ៍ទី១៥សីហានេះថា លោកស្វាគមន៍ចំពោះសំណុំរឿងទី១ដែលនឹងបិទបញ្ចប់ឆាប់ៗនេះ។ ហើយចំពោះសំណុំរឿងទី១នេះនឹងមិនប្ដឹងតវ៉ាទៀតដែរ។ ប៉ុន្តែលោកកំពុងតាមសំណុំរឿងទី២ព្រោះកាលពីអំឡុងពេលនៃការដាក់ពាក្យបណ្ដឹង លោកធ្លាប់ ទាមទារសំណងពី លោក គឹម សុខ ១០លានរៀល និងស្នើឲ្យតុលាការផ្ដន្ទាទោសទៅតាមច្បាប់។ ចំណែក លោក គឹម សុខ វិញកាលពីថ្ងៃទី១៤សីហាម្សិលមិញ បានថ្លែងដោយខ្លីថា លោកក៏មិនទាន់ដឹងអំពីការសម្រេចរបស់តុលាការថាកាត់សេចក្ដីបែបណានៅឡើយ។
លោក អំ សំអាត មន្ត្រីផ្នែកស៊ើបអង្កេតនៃអង្គការលីកាដូលើកឡើងថា សំណុំរឿងលោក គឹម សុខ ទាំង២ករណី គឺស្ថិតនៅក្នុងរូបភាពមួយប្រហាក់ប្រហែលគ្នា។ ដូច្នេះតុលាការគួរដោះលែង លោក គឹម សុខ ខណៈការអនុវត្តទោសជាប់ពន្ធនាគាររបស់លោក គឹម សុខ ក្នុងសំណុំរឿងទី១នឹងត្រូវគ្រប់តាមការកំណត់នៅថ្ងៃទី១៧សីហាខាងមុខនេះ។ ប្រសិនបើតុលាការបន្តឃុំខ្លួន លោក គឹម សុខ ស្ថាប័នមួយនេះ នឹងទទួលរងការរិះគន់ជាថ្មីទៀតពីមតិជាតិ និងអន្តរជាតិ។ នេះបើតាមលោក អំ សំអាត។
គួររំឭកថា ករណីទាំងពីររបស់ លោក គឹម សុខ ត្រូវបានតុលាការសាលាដំបូងរាជធានីភ្នំពេញចោទប្រកាន់រួមគ្នារួចហើយ កាលពីខែសីហាឆ្នាំ២០១៧ ពីបទញុះញង់ឲ្យប្រព្រឹត្តបទល្មើសជាអាទិ៍និងបទបរិហាកេរ្តិ៍ដោយដាក់ពន្ធនាគារ១៨ខែ ពិន័យ៨លានរៀលនិងត្រូវសងជំងឺចិត្តដល់លោក ហ៊ុន សែន ៨០០លានរៀល៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ