មេដឹកនាំអង្គការសង្គមស៊ីវិលមួយចំនួននៅក្រៅប្រទេសនិងមួយចំនួនទៀតបិទទូរស័ព្ទបន្ទាប់ពីការព្រមាន
យ៉ាងហោចក៏មានថ្នាក់ដឹកនាំអង្គការក្រៅរដ្ឋាភិបាល ដែលបានស្ថិតនៅក្នុងបន្ទប់ស្ថានការណ៍បោះឆ្នោតចំនួន៣រូបដែរ ដែលបានស្ថិតនៅក្រៅប្រទេស ខណៈកាលពី ថ្ងៃពុធមានការបញ្ជាពីប្រមុខរដ្ឋាភិបាលកម្ពុជាឲ្យក្រសួងមហាផ្ទៃធ្វើការស៊ើបអង្កេតភាពស្របច្បាប់របស់បន្ទប់ស្ថានការណ៍ឃ្លាំមើលការបោះឆ្នោតមួយនេះ។ តែសមាជិកនៃបន្ទប់ស្ថានការណ៍បោះឆ្នោត បញ្ជាក់ថាការស្ថិតនៅក្រៅប្រទេសរបស់មេដឹកនាំអង្គការទាំងនោះ មិនទាក់ទងទៅនឹងការព្រមានរបស់រដ្ឋាភិបាលទេ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១១
តាមការរៀបរាប់ត្រួសៗរបស់ លោក សំ គន្ធាម៉ី នាយកប្រតិបត្តិគណៈកម្មាធិការអព្យាក្រឹតនិងយុត្តិធម៌ ដើម្បីការបោះឆ្នោតដោយសេរី និងត្រឹមត្រូវនៅកម្ពុជា(Nicfec) មានមេដឹកនាំអង្គការសង្គមស៊ីវិល ដែលជាសមាជិកនៃបន្ទប់ស្ថានការណ៍ចំនួន៣រូប បានចាកចេញទៅក្រៅប្រទេស។ អ្នកទាំង៣ នោះគឺលោក គល់ បញ្ញា នាយកប្រតិបត្តិគណៈកម្មាធិការ ដើម្បីការបោះឆ្នោតដោយសេរី និងយុត្តិធម៌នៅកម្ពុជា(Comfrel) លោក ប៉ា ងួនទៀង នាយកប្រតិបត្តិមជ្ឈមណ្ឌលកម្ពុជាដើម្បីប្រព័ន្ធផ្សព្វផ្សាយឯករាជ្យ និងលោក មឿន តុលា នាយកប្រតិបត្តិនៃមជ្ឈមណ្ឌលសម្ព័ន្ធភាពការងារ និងសិទ្ធិមនុស្ស។
វត្តមានរបស់អ្នកទាំងបី នៅក្រៅប្រទេសចំពេលដែល មានការព្រមានចាត់វិធានការពីសំណាក់លោកនាយករដ្ឋមន្ត្រី ហ៊ុន សែន កាលពីថ្ងៃពុធ ទៅលើបន្ទប់ស្ថានការណ៍បោះឆ្នោត ចំពោះភាពស្របច្បាប់ ខណៈដែលបន្ទប់ស្ថានការណ៍ដែលជាបណ្តុំនៃអង្គការសង្គមស៊ីវិលប្រមាណ៤០ ឃ្លាំមើលនិងសង្កេតការណ៍ជុំវិញការបោះឆ្នោតជ្រើសរើសក្រុមប្រឹក្សាឃុំ-សង្កាត់កាលពីពេលថ្មីៗនេះ។
ក៏ប៉ុន្តែលោក សំ គន្ធាម៉ី បានបញ្ជាក់ថា មេដឹកនាំអង្គការទាំងនោះ បានចេញទៅក្រៅប្រទេសចាប់តាំងពីមុនថ្ងៃទី២៥មិថុនា ដែលជាថ្ងៃប្រកាសលទ្ធផលឆ្នោតផ្លូវការដោយគណៈកម្មាធិការជាតិរៀបចំការបោះឆ្នោត(គ.ជ.ប)ទៅទៀត។
សូមរំលឹកថា នៅក្នុងឱកាសខួបលើកទី៦៦ ថ្ងៃកំណើតគណបក្សប្រជាជនកម្ពុជាកាលពីម្សិលមិញ លោកនាយករដ្ឋមន្ត្រីហ៊ុន សែន បានបញ្ជាទៅលោក ស ខេង រដ្ឋមន្ត្រីក្រសួងមហាផ្ទៃ ឲ្យធ្វើការស៊ើបអង្កេតទៅលើបន្ទប់ស្ថានការណ៍បោះឆ្នោត ដែលបានចេញសេចក្តីថ្លែងការណ៍ខោកក្បាល គ.ជ.ប ផ្ទុយគ្នាពីការលើកឡើងរបស់អ្នកសង្កេតការណ៍ជាតិនិងអន្តរជាតិដទៃទៀត តែដូចគ្នាទៅនឹងសេចក្តីថ្លែងការណ៍គណបក្សប្រឆាំង ជាហេតុធ្វើឲ្យមានការសង្ស័យលើភាពស្របច្បាប់នៃបន្ទប់ស្ថានការណ៍មួយនេះ។
ក៏ប៉ុន្តែភ្លាម បន្ទប់ស្ថានការណ៍បោះឆ្នោតក៏បានចេញសេចក្តីបញ្ជាក់ដែរថា បន្ទប់ស្ថាន ការណ៍គឺជាការប្រមូលផ្តុំមតិពីអង្គការក្រៅរដ្ឋាភិបាលនានា ដើម្បីចូលរួមឃ្លាំមើលការបោះឆ្នោតតែប៉ុណ្ណោះ ហើយបន្ទប់ស្ថានការណ៍នេះ ត្រូវរំសាយក្រោយពីការបោះឆ្នោតត្រូវបានបញ្ចប់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ