សង្គមស៊ីវិល៖ ករណីចោរឆក់កំពុងលេចធ្លោខ្លាំងនៅភ្នំពេញ
កាលពីថ្ងៃពុធទី២៨មិថុនា ប្ដីប្រពន្ធពីរនាក់បានស្លាប់ និងកូនប្រុសតូចម្នាក់បានរងរបួសធ្ងន់ដោយសារសកម្មភាពឆក់ទ្រព្យសម្បត្តិនៅតាមដងផ្លូវក្នុងរាជធានីភ្នំពេញ។ សមត្ថកិច្ចឲ្យដឹងថា ប្ដីប្រពន្ធមួយគូនេះ ស្លាប់ក្រោយពីជួបគ្រោះថ្នាក់ចរាចរណ៍បន្ទាប់ពីពួកគេបានដេញតាមចោរ។ ដោយឡែកកាលពីថ្ងៃទី២៥មិថុនា ស្ត្រីជាគ្រូបង្រៀនភាសាចិនម្នាក់បានស្លាប់ដោយបោកក្បាលទៅនឹងថ្នល់ពេលចោរឆក់កាបូបរបស់គាត់នៅខណ្ឌទួលគោក។ ទន្ទឹមនឹងនេះ អង្គការសង្គមស៊ីវិលបានកត់សម្គាល់ថា នៅរយៈពេលចុងក្រោយនេះ ករណីចោរឆក់កំពុងលេចធ្លោខ្លាំងនៅភ្នំពេញ។
ចុះផ្សាយនៅថ្ងៃ៖
ស្តាប់ - ០១:៤១
ស្ថានភាពនៃអំពើចោរឆក់តាមដងផ្លូវនេះវាហាក់ដូចជាលេចធ្លោខ្លាំងនៅក្នុងអំឡុងពេលបោះឆ្នោត និងក្រោយបោះឆ្នោតជ្រើសរើសក្រុមប្រឹក្សាឃុំសង្កាត់។ នេះគឺជាការកត់សម្គាល់របស់លោក សន ជ័យ ប្រធានអង្គការសម្ព័ន្ធគណនេយ្យភាពសង្គមកម្ពុជា។ ប្រឈមបញ្ហានេះ លោក សន ជ័យ បារម្ភពីកំហឹងប្រជាពលរដ្ឋឈានទៅដល់ការសម្លាប់ចោរ ក៏ថាបានប្រសិនបើការអន្តរាគមន៍របស់សមត្ថកិច្ចនៅមានកម្រិត។
លោក សន ជ័យ បានកត់សម្គាល់ទៀតថា ការអន្តរាគមន៍របស់សមត្ថកិច្ចក្នុងករណីចោរឆក់មិនបានធ្វើឡើងភ្លាមៗឬត្រៀមបង្កាទុកមុនទេ។
ចំណែក លោក យ៉ង គឹមអេង នាយកប្រតិបត្តិនៃមជ្ឈមណ្ឌលប្រជាពលរដ្ឋដើម្បីអភិវឌ្ឍន៍និងសន្តិភាព បានរិះគន់គោលនយោបាយភូមិឃុំមានសុវត្ថិភាព របស់រដ្ឋាភិបាល អនុវត្តមិនទាន់មានប្រសិទ្ធិភាព ។ មួយចំណុចក្នុងចំណោមគោលនយោបាយភូមិឃុំមានសុវត្ថិភាពទាំងប្រាំបីចំណុច គឺលុបបំបាត់ករណីចោរឆក់ឬប្លន់។ តែផ្ទុយទៅវិញកម្លាំងសមត្ថកិច្ចគ្មានការត្រៀមលក្ខណៈឲ្យបានគ្រប់គ្រាន់នៅក្នុងការឆ្លើយតបនៅពេលករណីឆក់នេះកើតឡើង។
ឆ្លើយតាមការលើកឡើងទាំងនេះ លោក អេង ហ៊ី អ្នកនាំពាក្យកងរាជអាវុធហត្ថអះអាងថា ចំពោះកម្លាំងកងរាជអាវុធហត្ថបានដុតដៃដុតជើងជារៀងរាល់ថ្ងៃនៅក្នុងការទប់ស្កាត់នៅតាមភូមិសាស្ត្រសំខាន់ៗរួចហើយ ក៏ប៉ុន្តែចន្លោះប្រហោងនៅតែកើតមានចំពោះតំបន់ដែលគ្មានកម្លាំងសមត្ថកិច្ចប្រចាំការទើបក្រុមចោរឆ្លៀតឱកាសពេលនោះតែម្ដង។
ដោយឡែកចំពោះករណីពីរនាក់ប្ដីប្រពន្ធបានស្លាប់ និងកូនប្រុសតូចម្នាក់បានរងរបួសដោយសារចោរឆក់កាបូប កាលពីថ្ងៃពុធទី២៨មិថុនានោះ លោក អេង ហ៊ី បានអះអាងថា កម្លាំងសមត្ថកិច្ចកំពុងស្រាវជ្រាវស្វែករកមុខសញ្ញាចោរដើម្បីពួកគេមកដាក់ទោស៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ