សង្គមស៊ីវិលចំនួន២៧ ទទូចឲ្យសាលាឧទ្ធរណ៍ទាត់ចោលការកាត់ទោសអ្នកស្រីទេព វន្នី
នៅរសៀលនេះ សាលាឧទ្ធរណ៍នឹងបើកសវនាការលើសំណុំរឿងអ្នកស្រីទេព វន្នី តំណាងសហគមន៍បឹងកក់ដែលត្រូវបានសាលាដំបូងរាជធានីភ្នំពេញកាត់ទោសឲ្យជាប់ពន្ធនាគារ២ឆ្នាំកន្លះក្រោមបទល្មើសប្រើអំពើហិង្សានៅក្បែរផ្ទះលោកនាយករដ្ឋមន្ត្រីហ៊ុន សែន។ មុនសវនាការចាប់ផ្តើមនៅប៉ុន្មានម៉ោងទៀតខាងមុខនេះ ក្រុមអង្គការសង្គមស៊ីវិលចំនួន២៧ បានចេញសេចក្តីថ្លែងការណ៍រួមមួយដោយទទូចឲ្យសាលាឧទ្ធរណ៍បដិសេធចោលនូវការកាត់ទោសនេះ។
ចុះផ្សាយនៅថ្ងៃ៖ កែប្រែថ្ងៃទី៖
![អ្នកស្រីទេព វន្នី ដែលត្រូវបានសាលាដំបូងកាត់ទោសឲ្យជាប់ពន្ធនាគាររយៈពេល២ឆ្នាំកន្លះ។](https://s.rfi.fr/media/display/8304d686-1083-11ea-ac79-005056a99247/w:980/p:16x9/tep_vanny.jpg)
ក្រុមអង្គការសង្គមស៊ីវិលទាំងនេះដែលរូមមានជាអាទិ៍ អង្គការលើកលែងទោសអន្តរជាតិ មជ្ឈមណ្ឌលសិទ្ធិមនុស្សកម្ពុជា សមាគមអាដហុក អង្គការលីកាដូក៏ដូចជាអង្គការឃ្លាំមើលសិទ្ធិមនុស្សជាដើមបានចាត់ទុកការផ្តន្ទាទោសរបស់សាលាដំបូងរាជធានីភ្នំពេញលើអ្នកស្រីទេព វន្នីថាជារឿងអយុត្តិធម៌។ ដូច្នេះពួកគេបានសំណូមពរដោយទទូចឲ្យសាលាឧទ្ធរណ៍ទាត់ចោលសាលក្រមនោះ ដើម្បីបញ្ចប់ការធ្វើទុក្ខបុកម្នេញតាមផ្លូវច្បាប់មកលើអ្នកស្រីទេព វន្នី និងដោះលែងអ្នកស្រីឲ្យមានសេរីភាពឡើងវិញ។
អ្នកស្រីទេព វន្នី កាលពីថ្ងៃទី២៣ ខែកុម្ភៈ ឆ្នាំ២០១៧ កន្លងទៅ ត្រូវបានសាលាដំបូងរាជធានីភ្នំពេញផ្តន្ទាទោសដាក់ពន្ធនាគាររយៈពេល២ឆ្នាំ៦ខែពីបទហិង្សាដោយចេតនាមានស្ថានទម្ងន់ទោសដែលប្រព្រឹត្តទៅនៅក្បែរផ្ទះលោកនាយករដ្ឋមន្ត្រីហ៊ុន សែន កាលពីឆ្នាំ២០១។ កាលណោះ គឺជាប៉ះទង្គិចគ្នារវាងក្រុមអ្នកស្រីទេព វន្នី និង សន្តិសុខសាលាខណ្ឌដូនពេញ។ ក្រុមអង្គការសង្គមស៊ីវិលបានចាត់ទុកថា សវនាការនេះមិនបានអនុលោមតាមបទដ្ឋានអន្តរជាតិពាក់ព័ន្ធនឹងសិទ្ធិទទួលបានការជំនុំជម្រះដោយស្មើភាពទេ ដោយសារតែពុំមានភស្តតាងជាក់លាក់សម្រាប់បញ្ជាក់ពីបទចោទ ហើយពុំឃើញមានដើមបណ្តឹងឫសាក្សីដាក់បន្ទុកណាម្នាក់បានផ្តល់សក្ខីកម្មផ្ទាល់មាត់ក្នុងពេលសវនាការដែរគឺមានតែសក្ខីកម្មជាសេចក្តីថ្លែងការណ៍ប៉ុណ្ណោះ។
ក្រុមអង្គការសង្គមស៊ីវិលក៏បានកត់សម្គាល់ទៀតថា ករណីនេះ គឺជាករណីមួយក្នុងចំណោមករណីបីផ្សេងទៀតដែលអសកម្មអស់ជាច្រើនឆ្នាំទៅហើយ តែបែរជាត្រូវសើរើមកវិញ។ ដូច្នេះពួកគេគិតថា ការដាក់ពន្ធនាគារអ្នកស្រីទេព វន្នីនេះទំនងក្រោមហេតុផលនយោបាយ និងជាការប៉ុនប៉ងក្នុងការបំបិទសំឡេងអ្នកការពារសិទ្ធិមនុស្សដែលហ៊ាននិយាយរិះគន់ឥតសំចៃមាត់នៅកម្ពុជា មុនការបោះឆ្នោតថ្នាក់ជាតិខែកក្កដា ឆ្នាំ២០១៨ មកដល់។
សូមបញ្ជាក់ថា អ្នកស្រីទេព វន្នី ក្រៅពីបទចោទមួយនេះ អ្នកស្រីក៏ធ្លាប់ត្រូវបានសាលាដំបូងរាជធានីភ្នំពេញផ្តន្ទាទោសដាក់ពន្ធនាគារ៦ថ្ងៃពីបទប្រមាថអ្នករាជការសាធារណៈកាលពីខែសីហាឆ្នាំ២០១៦ ។ ចំណែកកាលពីខែកញ្ញាឆ្នាំដដែល តុលាការក៏បានផ្តន្ទាទោសដាក់ពន្ធនាគាររយៈពេល៦ខែទៀតពីបទ«ប្រមាថនិងប្រឆាំងអ្នករាជការសាធារណៈមានស្ថានទម្ងន់ទោស»ប្រព្រឹត្តនៅមុខសាលារាជធានីភ្នំពេញកាលពីឆ្នាំ២០១។
សម្រាប់អង្គការសង្គមស៊ីវិល ការតវ៉ាដោយសន្តិវិធីនិងសេរីភាពបញ្ចេញមតិមិនមែនជាបទល្មើសនោះទេ។ ដោយចាត់ទុកអ្នកស្រីទេព វន្នីជាអ្នកការពារសិទ្ធិមនុស្សមួយរូបដែរ ក្រុមអង្គការសង្គមស៊ីវិលទាំងនេះក៏បានអះអាងថា អ្នកការពារសិទ្ធិមនុស្សមិនគួរត្រូវបានដាក់ទោសដោយសារតែការអនុវត្តសិទ្ធិសេរីភាពជាមូលដ្ឋានដោយសន្តិវិធីនោះឡើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ