រដ្ឋសភាពិចារណាចាត់វិធានការដាក់ពិន័យលើសមាជិកសភាគណបក្សសង្រ្គោះជាតិ ដែលមិនចូលប្រជុំ
គណៈកម្មាធិការអចិន្ត្រៃយ៍នៃរដ្ឋសភា បានបើកកិច្ចប្រជុំមួយនៅថ្ងៃទី ២៧ មិថុនានេះ ដោយបានសម្រេចពិចារណាចាត់វិធានការពិន័យ ទៅលើសមាជិកសភាគណបក្សសង្រ្គោះជាតិ ដែលធ្វើពហិការមិនចូលរួមប្រជុំសភា។ វិធានការពិន័យ អាចជាការកាត់ប្រាក់ខែ រួមទាំងការដកហូតរថយន្តពីក្រុមអ្នកតំណាងរាស្រ្តគណបក្សប្រឆាំងផងដែរ។ សម្រាប់គណបក្សសង្រ្គោះជាតិ វិធានការបែបនេះ មិនមែនជាដំណោះស្រាយនោះទេ។
ចុះផ្សាយនៅថ្ងៃ៖
ស្តាប់ - ០២:០៧
សេចក្តីសម្រេចនៃការដាក់វិធានការពិន័យ នឹងចេញក្នុងពេលឆាប់ៗនេះ បន្ទាប់ពីកិច្ចប្រជុំគណៈកម្មាធិការអចិន្រ្តៃយ៍នៃរដ្ឋសភា បានប្រគល់ភារកិច្ចនេះទៅឲ្យគណៈកម្មការទី២នៃរដ្ឋសភា និងអគ្គលេខាធិការដ្ឋាននៃរដ្ឋសភាពិចារណាសម្រេច។ នេះបើតាមការឲ្យដឹងរបស់លោក ឈាង វុន អ្នកនាំពាក្យរដ្ឋសភាមកពីគណបក្សប្រជាជនកម្ពុជា។ លោក ឈាង វុន បានប្រាប់ក្រុមអ្នកកាសែតនៅថ្ងៃនេះថា ពេលនេះរដ្ឋសភា កំពុងតែពិភាក្សាអំពីការដាក់ពិន័យ ទៅលើសមាជិកសភាមកពីគណបក្សសង្រ្គោះជាតិ ដែលមិនចូលធ្វើការបំពេញតួនាទី របស់ខ្លួនឱ្យបានត្រឹមត្រូវ។
លោក ឈាង វុន បានអះអាងថា បើសមាជិកសភា មកពីគណបក្សប្រឆាំង នៅតែបន្តធ្វើបែបនេះ រដ្ឋសភាអាចនឹងពិចារណាផាកពិន័យ ដូចជា មិនឱ្យចូលរួមប្រជុំសភា, ការកាត់ប្រាក់ខែ និងការដកហូតរថយន្តត្រឡប់មកវិញជាដើម។
ការអះអាងរបស់ លោក ឈាង វុន នេះ បានធ្វើឡើងស្របពេលដែលសមាជិកសភាមកពីគណបក្សសង្រ្គោះជាតិ ទាំង៥៥រូប បានប្រកាសមិនចូលប្រជុំសភាបន្តបន្ទាប់ ដោយអះអាងថា ស្ថានភាពនយោបាយនាពេលបច្ចុប្បន្ននេះ មិនអាចឲ្យសមាជិកសភាគណបក្សប្រឆាំង មិនអាចបំពេញការងាររបស់ខ្លួន បានត្រឹមត្រូវនោះទេ។
ណាក៏ដោយ លោក សុន ឆ័យ ប្រធានក្រុមអ្នកតំណាងរាស្រ្តគណបក្សសង្រ្គោះជាតិ បានចាត់ទុកវិធានការនេះថា មិនមែនជាដំណោះស្រាយនោះទេ។ លោកថា អ្វីដែលរដ្ឋសភាជាតិ ត្រូវធ្វើនៅពេលនេះ គឺធានាការគោរពអភ័យឯកសិទ្ធិរបស់សមាជិកសភាគ្រប់ៗរូប។
គួរជម្រាបជូនថា ការត្រៀមដាក់ពិន័យលើសមាជិកសភាគណបក្សសង្រ្គោះជាតិនៅពេលនេះ ដោយយោងតាមប្រតិកម្មរបស់សមាជិករដ្ឋសភា សមាជិករដ្ឋាភិបាល និងប្រជាពលរដ្ឋមួយចំនួន ទៅនឹងសមាជិកសភាគណបក្សសង្រ្គោះជាតិ ដែលមិនបានបំពេញកាតព្វកិច្ចជាអ្នកតំណាងរាស្រ្ត និងមិនចូលរួមកិច្ចប្រជុំ ដោយគ្មានមូលហេតុច្បាស់លាស់។ ប៉ុន្តែលោក សុន ឆ័យ បានអះអាងថា គណបក្សរបស់លោកបានដាក់លិខិតដែលមានបញ្ជាក់ពីមូលហេតុច្បាស់លាស់ ទៅកាន់រដ្ឋសភារួចហើយ ប៉ុន្តែមិនទទួលបានការឆ្លើយតបនោះទេ។
សូមបញ្ជាក់ថា រដ្ឋសភាជាតិ នឹងបើកសម័យប្រជុំលើកទី៦ នីតិកាលទី៥ នៅថ្ងៃទី ៣០ ខែ មិថុនា ខាងមុខនេះ ដើម្បីពិភាក្សាទៅលើសេចក្តីព្រាងច្បាប់ចំនួន៤ តែមិនមានរបៀបវារៈ ស្តីពីសមាជិកសភាគណបក្សសង្រ្គោះជាតិនោះទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ