សង្គ្រោះជាតិនឹងទៅជាយ៉ាងណានៅពេលគ្មានលោក សម រង្ស៊ី?
ចុះផ្សាយនៅថ្ងៃ៖
ស្តាប់ - ០៤:០០
នៅប៉ុន្មានថ្ងៃខាងមុខទៀតនេះ គណបក្សសង្គ្រោះជាតិ នឹងមានក្បាលម៉ាស៊ីនដឹកនាំថ្មី ជំនួសលោក សម រង្ស៊ី។ លោក សម រង្ស៊ី ជាសហស្ថាបនិកគណបក្សសង្គ្រោះជាតិ និងជាតួអង្គសំខាន់ដែលធ្វើឲ្យគណបក្សនេះ ទទួលការគាំទ្រយ៉ាងច្រើនលើសលប់នៅក្នុងការបោះឆ្នោតជាតិឆ្នាំ ២០១៣។ បន្ទាប់ពីលោកសម រង្ស៊ី ចាកចេញពីគណបក្ស និងស្របពេលដែលគណបក្សត្រៀមខ្លួនទទួលប្រធានបក្សថ្មី អនាគតគណបក្សសង្គ្រោះជាតិកំពុងស្ថិតក្នុងភាពស្រពេចស្រពិល។ តើសង្គ្រោះជាតិនឹងទៅជាយ៉ាងណានៅពេលគ្មានលោក សម រង្ស៊ី?
នៅថ្ងៃទី ១៧កក្កដាឆ្នាំ ២០១២ លោក សម រង្ស៊ី ប្រធានគណបក្សសមរង្ស៊ី និងលោក កឹម សុខា ប្រធានគណបក្សសិទ្ធិមនុស្ស បានចាប់ដៃគ្នានៅទីក្រុងម៉ានីល ប្រទេសហ្វីលីពីន។ គឺពេលនោះហើយដែលបក្សសមរង្ស៊ីនិងបក្សសិទ្ធិមនុស្ស ដែលធ្លាប់តែវាយប្រហារគ្នា ត្រូវច្របាច់បញ្ចូលគ្នាបង្កើតបានជាគណបក្សមួយថ្មី គឺគណបក្សសង្គ្រោះជាតិ។
ការរួបរួមគ្នារវាងបុគ្គលប្រឆាំងរដ្ឋាភិបាលដ៏ល្បីល្បាញទាំងពីររូប គឺលោក សម រង្ស៊ី និង លោក កឹម សុខា នេះហើយ ដែលជាចំណុចខ្លាំងរបស់គណបក្សសង្គ្រោះជាតិ ធ្វើឲ្យបក្សនេះទទួលបានការគាំទ្រភ្លូកទឹកភ្លូកដីពីសំណាក់ម្ចាស់ឆ្នោត នៅក្នុងការបោះឆ្នោតតំណាងរាស្ត្រអាណត្តិទី ៥ ឆ្នាំ ២០១៣។ សង្គ្រោះជាតិ បានក្លាយទៅជាដៃគូតែមួយគត់របស់គណបក្សប្រជាជនកម្ពុជានៅក្នុងសភា ដោយទទួលបានអាសនៈចំនួន ៥៥ ខណៈបក្សកាន់អំណាចមានអាសនៈចំនួន ៦៨។
ឥឡូវនេះ លោក សម រង្ស៊ី លាលែងចេញពីគណបក្ស។ ចំណែកសង្គ្រោះជាតិកំពុងត្រៀមខ្លួនជ្រើសរើសក្បាលម៉ាស៊ីនដឹកនាំថ្មី។ ចង់ឬមិនចង់ អនាគតនៃគណបក្សប្រឆាំងធំជាងគេនៅកម្ពុជានេះ កំពុងស្ថិតនៅក្នុងភាពស្រពិចស្រពិល។ តើប្រជាប្រិយភាពរបស់សង្គ្រោះជាតិពេលគ្មាន លោក សម រង្ស៊ី នឹងនៅឋិតឋេរឬយ៉ាងណា? ចុះបញ្ហាផ្ទៃក្នុងបក្សវិញ អាចជួបប្រទះភាពរង្គោះរង្គើដែរទេ?
មុននឹងឆ្លើយនឹងសំណួរទាំងនេះ គេត្រូវទទួលស្គាល់ការពិតមួយថា គណបក្សប្រឆាំង ខ្លាំងព្រោះការរួមបញ្ចូលគ្នារវាងលោក កឹម សុខា និង លោក សម រង្ស៊ី ក៏ពិតមែន។ ប៉ុន្តែនេះមិនមែនជាហេតុផលតែម្យ៉ាងគត់ដែលធ្វើឲ្យបក្សប្រឆាំងរឹងមាំទេ។ ក្រៅពីការរួបរួមគ្នារវាងលោក សម រង្ស៊ី និង លោក កឹម សុខា គណបក្សសង្គ្រោះជាតិដែលជាបក្សប្រឆាំង មានគោលនយោបាយដែលវាយចំចំណុចខ្សោយរបស់គណបក្សកាន់អំណាច។
នៅមុនពេលបោះឆ្នោត បក្សសង្គ្រោះជាតិបានឃោសនាគោលនយោបាយផ្ដោតលើការផ្លាស់ប្ដូរ ដែលមានជាអាថិ៍៖ ការតម្លើងប្រាក់ខែមន្ដ្រីរាជការនិងកម្មករ ការផ្ដល់ប្រាក់ឧបត្ថម្ភដល់ជនចាស់ជរា ការផ្ដល់ការព្យាបាលជំងឺដល់អ្នកក្រីក្រដោយឥតគិតថ្លៃ គោលនយោបាយដីធ្លី ការបញ្ចុះតម្លៃជីកសិកម្មនិងប្រេងសាំងជាដើម។ គោលនយោបាយទាំងនេះគឺជាអ្វីដែលប្រជាពលរដ្ឋខ្មែរជាច្រើន ទន្ទឹងរង់ចាំជាយូរមកហើយ។ ក្នុងន័យនេះ សម្រាប់ពលរដ្ឋដែលស្រឡាញ់គោលនយោបាយខាងដើម ភក្ដីភាពរបស់ពួកគេចំពោះបក្សប្រឆាំង នៅតែមានជានិច្ច បើទោះបីជាគ្មានវត្តមានលោក សម រង្ស៊ី ក៏ដោយ។ នេះបើនិយាយពីប្រជាប្រិយភាព។
នៅក្នុងសំណុំរឿងផ្ទៃក្នុងបក្ស។ គេដឹងរួចមកហើយថា គណបក្សសង្គ្រោះជាតិ ប្រសូត្រចេញពីការច្របាច់បញ្ចូលគ្នារវាងគណបក្សសមរង្ស៊ី និងគណបក្សសិទ្ធិមនុស្ស។ មនុស្សទាំងពីរក្រុមនេះ ចូលមកជ្រកនៅក្រោមដំបូលសង្គ្រោះជាតិរួមគ្នា ដោយមានការសម្របសម្រួល ផ្សះផ្សារពីលោក សម រង្ស៊ី និង លោក កឹម សុខា ដែលជាក្បាលម៉ាស៊ីនដឹកនាំ។ នៅពេលលោក សម រង្ស៊ី លែងមានវត្តមាន ទាំងរូបកាយនិងតួនាទី នៅក្នុងគណបក្សដូច្នេះ តិចឬច្រើន វានឹងធ្វើឲ្យផ្ទៃក្នុងគណបក្សប្រឆាំងនេះ រង្គោះរង្គើ។
ក្នុងបរិបទដូច្នេះ ប្រធាននិងអនុប្រធានបក្សថ្មីសម្រាប់សង្គ្រោះជាតិ ដែលនឹងត្រូវជ្រើសតាំងនាពេលខាងមុខ ទាមទារឲ្យឆ្លងកាត់ការពិនិត្យពិចារណាយ៉ាងប្រយ័ត្នប្រយែងជាទីបំផុត។ តួអង្គនយោបាយ ដែលចូលមកជំនួសកន្លែងលោក សម រង្ស៊ី ក្រៅតែពីជាបុគ្គលដែលមានប្រជាប្រិយភាពហើយ ថែមទាំងត្រូវដើរតួនាទីសំខាន់ ជាអ្នកឱបក្រសោបបក្សសង្គ្រោះជាតិកុំឲ្យបែកបាក់ថែមទៀត។
នេះគឺជាវិញ្ញាសាថ្មីមួយទៀត ដើម្បីវាស់ស្ទង់ពីភាពរឹងមាំរបស់គណបក្សសង្គ្រោះជាតិ។ តើគណបក្សនេះអាចឆ្លងកាត់ការសាកល្បងដ៏លំបាកមួយនេះបានដែរឬទេ? តើស្មារតីសង្គ្រោះជាតិរបស់បក្សប្រឆាំង ពិតជាធំធេងជាងផលប្រយោជន៍សួនតួ និងផលប្រយោជន៍បក្សពួកខ្លួនមែនឬយ៉ាងណា? មានតែគណបក្សប្រឆាំងទេ ទើបអាចឆ្លើយនឹងសំណួរនេះបាន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ