លោក សម រង្ស៊ីថ្កោលទោសវៀតណាមរឿងអំពើហិង្សានៅព្រំដែន
រដ្ឋសភាជាតិនៅព្រឹកថ្ងៃចន្ទ ទី២៩ មិថុនានេះ បើកសម័យប្រជុំបន្តលើច្បាប់ហិរញ្ញវត្ថុគ្រប់គ្រងថវិកាឆ្នាំ២០១៣ ដោយមានតំណាងរាស្ត្រចំនួ១១០រូបបានចូលរួមនៅក្នុងនោះ ក៏មានដែរលោកនាយករដ្ឋមន្ត្រីហ៊ុន សែនប្រធានគណបក្សប្រជាជនកម្ពុជា និងលោក សម រង្ស៊ី ប្រធានគណបក្សសង្គ្រោះជាតិ។ ក្រោយកិច្ចប្រជុំលោក សម រង្ស៊ី បានបញ្ជាក់ថា អំពើហិង្សានៅព្រំដែនគឺជារឿងដែលមិនអាចទទួលយកបាននោះទេ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១៨
“យើងថ្កោលទោសយ៉ាងខ្លាំងក្លាជាទីបំផុតចំពោះអំពើហិង្សា ប្រព្រឹត្តដោយជនបរទេសដែលមកប៉ះទង្គិចវាយដំប្រជាពលរដ្ឋខ្មែរ ដែលបានទៅពិនិត្យនៅព្រំដែនផងដែរ។ នេះគឺជាការលើកឡើងរបស់លោក សម រង្ស៊ី ប្រធានគណបក្សសង្គ្រោះជាតិនៅថ្ងៃទី២៩ មិថុនានេះ។ លោក សម រង្ស៊ីបានបញ្ជាក់ថា លោកនឹងត្រៀមជជែកជាមួយលោកនាយករដ្ឋមន្ត្រីហ៊ុន សែន ព្រោះថាទាំងគណបក្សកាន់អំណាច និងគណបក្សប្រឆាំង បានព្រួយបារម្ភចំពោះអំពើហិង្សាដែលបានកើតឡើងនៅខេត្តស្វាយរៀងនោះ។
លោក សម រង្ស៊ី ប្រធានគណបក្សសង្គ្រោះជាតិ មិនបានបញ្ជាក់ថាពីពេលវេលាច្បាស់លាស់នៃជំនួបនោះទេ ប៉ុន្តែប្រធានគណបក្សសង្គ្រោះជាតិរូបនេះ បានប្រាប់ថា ជំនួបកំពូលនោះនឹងអាចធ្វើឡើងជាដំណាក់កាលជាបន្តបន្ទាប់ក្នុងសំណុំរឿងព្រំដែនរវាងប្រទេសកម្ពុជា និងប្រទេសវៀតណាម ព្រោះថារឿងព្រំដែននោះមានរឿងច្រើនដែលមេដឹកនាំបក្សទាំងពីរត្រូវពិភាក្សា។
សូមបញ្ជាក់ថា កាលពីរសៀលថ្ងៃអាទិត្យម្សិលមិញតំណាងរាស្ត្រគណបក្សសង្គ្រោះជាតិរួមទាំងប្រជាពលរដ្ឋដែលមានទាំងព្រះសង្ឃ បានបះទង្គិចជាមួយប្រជាពលរដ្ឋវៀតណាមនៅតាមព្រំដែនក្នុងខេត្តស្វាយរៀង។ ការប៉ះទង្គិច ដែលបណ្តាលឱ្យមានមនុស្សរបួសមនុស្សជិត២០នាក់ដែលមានទាំងខ្មែរ និងវៀតណាម។ លោករៀល ខេមរិន្ទ្រ តំណាងរាស្ត្ររបស់គណបក្សសង្គ្រោះជាតិទទួលរងការវាយដំផងដែរ។
លោក សម រង្ស៊ីក៏បានស្នើឱ្យអាជ្ញាធរកម្ពុជា ការពារសុវត្ថិភាពប្រជាពលរដ្ឋកម្ពុជាដែលបានទៅមើលព្រំដែនរបស់ខ្លួន។ ដោយឡែកអាជ្ញាធរ ខេត្តស្វាយរៀង បានញ្ជាក់ថា ខ្លួនមិនទទួលខុសត្រូវចំពោះករណីអំពើហិង្សាដែលបណ្តាលឱ្យមនុស្សជិត២០នាក់រួមទាំងខ្មែរនិងវៀតណាមនោះព្រោះថា តំណាងរាស្ត្រគណបក្សសង្គ្រោះជាតិ មិនបានជូនដំណឹងដល់អាជ្ញាធរវៀតណាមដើម្បីឱ្យអាជ្ញាធរ ផ្តល់ដំណឹងដល់ភាគីវៀតណាមនោះដែរ។
សូមកត់សំគាល់ថាការប៉ះទងិ្គចដែលបណ្តាលឱ្យមានពលរដ្ឋប្រទេសទាំងសងខាងរបួស បូករួមជាមួយតំណាងរាស្ត្រគណបក្សសង្គ្រោះជាតិនេះ គឺជាលើកទី១ហើយខណៈដែលបញ្ហាព្រំដែនកម្ពុជាវៀតណាម កើនឡើងកំដៅក្នុងរយៈពេលចុងក្រោយនេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ