គណបក្សសង្គ្រោះជាតិ៖ គ្មានការផ្លាស់ប្តូរសមាសភាពអនុប្រធានទាំង ៣ទេ
គណបក្សសង្រ្គោះជាតិ នឹងរៀបចំធ្វើសមាជវិសាមញ្ញជាថ្មី នៅថ្ងៃអង្គារទី ២៥ មេសា សប្តាហ៍ក្រោយនេះ ដើម្បីកែសម្រួលលក្ខន្តិកៈប្រការ ៤៧ថ្មីរបស់គណបក្សឡើងវិញ។ ការធ្វើសមាជវិសាមញ្ញនេះបន្ទាប់ពីក្រសួងមហាផ្ទៃមិនទទួលស្គាល់។ បើទោះបីជាសមាជគណបក្សត្រូវធ្វើសារជាថ្មី ប៉ុន្តែគណបក្សនៅតែរក្សាបេក្ខភាពអនុប្រធានគណបក្សទាំងបីរូបដដែល។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥២
គ្មានការផ្លាស់ប្តូរបេក្ខភាពអនុប្រធានគណបក្សសង្គ្រោះជាតិទាំងបីរូបទេ បើទោះបីជាគណបក្សត្រូវធ្វើសមាជវិសាមញ្ញសារជាថ្មីម្តងទៀតក៏ដោយ។ លោកអេង ឆៃអ៊ាង អ្នកនាំពាក្យគណបក្សសង្គ្រោះជាតិ បានបញ្ជាក់ថាស្មារតីរបស់គណៈកម្មាធិការនាយកគណបក្ស មិនមានការផ្លាស់ប្តូរនោះទេ គឺគណបក្សនៅតែផ្តល់ការជឿទុកចិត្តដល់បេក្ខភាពទាំងបី លោកអេង ឆៃអ៊ាង លោកប៉ុល ហំម និងលោកស្រីមួ សុខហួរ ជាអនុប្រធានគណបក្សដដែល។ ប៉ុន្តែគណបក្សនឹងមិនទាន់ជ្រើសរើសភ្លាមៗនោះទេដោយទុកឱ្យក្រសួងមហាផ្ទៃដែលអាណាព្យាបាលរបស់គណបក្សនយោបាយ ទទួលស្គាល់លទ្ធផលសមាជវិសាមញ្ញរបស់គណបក្សថ្ងៃទី ២៥ មេសាជាមុនសិន។
សមាជនេះ ធ្វើឡើងក្នុងគោលដៅ បើកផ្លូវជ្រើសរើសអនុប្រធានគណបក្ស ៣រូប ដែលក្រសួងមហាផ្ទៃមិនទទួលស្គាល់ពីក្រសួងមហាផ្ទៃ។ មន្រ្តីជាន់ខ្ពស់គណបក្សប្រឆាំងរំពឹងទុកថា សមាជជាថ្មីនេះ នឹងបញ្ចប់ការខ្វែងគំនិតគ្នាជាច្រើនខែ ជាមួយនឹងក្រសួងមហាផ្ទៃ។ សមាជវិសាមញ្ញរបស់គណបក្សសង្រ្គោះជាតិនៅថ្ងៃអង្គារសប្តាហ៍ក្រោយនេះ នឹងសម្រេចលើ របៀបវារៈតែមួយប៉ុណ្ណោះ គឺការធ្វើវិសោធនកម្មលក្ខន្តិកៈគណបក្ស ត្រង់ប្រការ ៤៧ថ្មី។ សូមរំលឹកថាគណបក្សសង្គ្រោះជាតិធ្លាប់ធ្វើសមាជវិសាមញ្ញម្តងរួចមកហើយកាលពីថ្ងៃទី ២ មិនា បន្ទាប់ពីលោក សម រង្ស៊ីប្រធានគណបក្ស បានលាឈប់។
ចំពោះការធ្វើសមាជថ្ងៃទី ២៥ មេសានេះ គណបក្សសង្គ្រោះជាតិនឹងរៀបចំឡើងនៅទីស្នាក់ការកណ្តាលគណបក្សនៅសង្កាត់ចាក់អង្រែលើ ដោយមានសមាជិកចូលរួមប្រមាណ ១ពាន់នាក់ដែលសុទ្ធសឹងតែជាថ្នាក់ដឹកនាំខេត្តក្រុងតែប៉ុណ្ណោះ។ សាលារាជធានីភ្នំពេញ បានអនុញ្ញាតចំពោះការរៀបចំនេះ ហើយនឹងដាក់កម្លាំងការពារសណ្តាប់ធ្នាប់នៅបរិវេណសមាជវិសាមញ្ញផងដែរ។ សមាជវិសាមញ្ញនេះ គឺមានការចូលរួមពីលោកកឹម សុខា ដែលជាប្រធានគណបក្ស និងភរិយាលោក សម រង្ស៊ី លោកស្រី ជួឡុង ស៊ូមូរ៉ាផងដែរ។
លោក ខៀវ សុភ័គ អ្នកនាំពាក្យក្រសួងមហាផ្ទៃ បានស្វាគមន៍ចំពោះសេចក្តីសម្រេចរបស់គណបក្សសង្រ្គោះជាតិ ប៉ុន្តែលោកបានផ្តាំទៅកាន់គណបក្សសង្រ្គោះជាតិថា សូមកុំឲ្យធ្វើខុសជាលើកទី ២៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ