គណបក្សទាំងពីរ៖ វប្បធម៌សន្ទនារអាក់រអួល ច្រើនជាងរលូន
វប្បធម៌សន្ទនារវាងគណបក្សប្រជាជនកម្ពុជា និងគណបក្សសង្គ្រោះជាតិមានអាយុជាង១ឆ្នាំហើយ ក្រោយរដ្ឋសភាសម្រេចបង្កើតក្រុមទាំងពីរនេះឡើង។ ក្រោយរដ្ឋសភាបង្កើតក្រុមនេះ កាលពីខែមករា ២០១៥ គណបក្សបានវាយតម្លៃខ្លួនឯងថា វប្បធម៌សន្ទនារអាក់រអួលច្រើនជាងរលូន។ មិនត្រឹមតែប៉ុណ្ណោះ គណបក្សទាំងពីរចុងក្រោយប្រឈមមុខដាក់គ្នាកាត់តែតឹងតែងថែមទៀតផង។
ចុះផ្សាយនៅថ្ងៃ៖
ស្តាប់ - ០២:១០
វប្បធម៌សន្ទនារវាងគណបក្សជាប់ឆ្នោតទាំងពីរ មានភាពរអាក់រអួលច្រើន ជាងរលូន ហើយចុងក្រោយគឺប្រឈមមុខគ្នាកាន់តែខ្លាំង។ លោក សុខ ឥសានអ្នកនាំពាក្យគណបក្សប្រជាជនកម្ពុជាបានលើកឡើងថា ក្រុមវប្បធម៌សន្ទនារវាងសម្លេងភាគច្រើន និងភាគតិចនេះ បានជួបភាពរអាក់រអួលច្រើន។
ការរអាក់រអួលនេះ គឺកើតឡើងក្រោយការចាប់ខ្លួនសកម្មជនគណបក្សសង្គ្រោះជាតិដែលរួមមានលោកមាជ សុវណ្ណរ៉ា និងការចាប់ខ្លួនលោក ហុង សុខហួរ ក្នុងសំណុំរឿងព្រំដែន។ បន្ទាប់មកទៀតគឺជម្លោះពាក្យសំដីរវាងលោក ហ៊ុន សែន ប្រធានគណបក្សប្រជាជន និងលោក សម រង្ស៊ី ប្រធានគណបក្សសង្គ្រោះជាតិដែលជាស្ថាបនិកវប្បធម៌សន្ទនា។ ការកាត់ទោសលោកសម រង្ស៊ីឱ្យជាប់ពន្ធនាគារនិងការធ្វើបាតុកម្មទម្លាក់លោក កឹម សុខាចេញពីដំណែងអនុប្រធានរដ្ឋសភា។ ទាំងនេះបានបង្អាក់ដំណើរវប្បធម៌សន្ទនាស្ទើស្មើសូន្យ ហើយគណបក្សទាំងពីរពេលនោះ ក៏បានលើកឡើងថាវប្បធម៌សន្ទានា គឺបានក្ស័យធនទៅហើយ។
គណបក្សសង្គ្រោះជាតិក៏ទទួលស្គាល់ចំណុចទាំងនេះថា ជាកត្តារុញឱ្យវប្បធម៌សន្ទនារបស់គណបក្ស មានភាពរអាក់រអួល។ សម្រាប់គណបក្សសង្គ្រោះជាតិ សំណុំរឿងទាំងអស់ត្រូវដោះស្រាយតាមវប្បធម៌សន្ទនា ប៉ុន្តែគណបក្សកាន់អំណាចថាសំណុំរឿងទាំងអស់ជាករណីតុលាការដែលត្រូវតែអនុវត្តច្បាប់។ គោលជំហរដែលមិនបន្ទន់ដាក់គ្នានេះ គឺទើបធ្វើឱ្យគណបក្សទាំងពីរសម្រេចបង្កើតក្រុមមួយផ្សេងទៀតដែលមានឈ្មោះថាក្រុមដំឡើងកម្រិតវប្បធម៌សន្ទនាផ្នែកនយោបាយ កាលពីខែធ្នូ២០១៥ កន្លងទៅនេះ។ ហើយក្រុមថ្មីនេះក៏មិនអាចបន្ធូបន្ថយស្ថានភាពនយោបាយដែលកំពុងឡើងកំដៅនេះបានផងដែរ។
ទន្ទឹមនឹងកំដៅនយោបាយនៅបន្តនេះ គណបក្សបក្សទាំងពីរនៅថ្ងៃទី១៩ កុម្ភៈស្អែកនេះ បានបើកឱ្យមានជំនួបកំពូលនៃក្រុមវប្បធម៌សន្ទនារវាងគណបក្សទាំងពីរសាឡើងវិញ ក្រោយផ្អាកមួយរយៈ។ ជាជំនួបដែលដឹកនាំដោយលោក ស ខេង អនុប្រធានគណបក្សប្រជាជនកម្ពុជា និងលោក កឹម សុខា ប្រធានស្តីទីគណបក្សសង្គ្រោះជាតិ។ យ៉ាងណាក៏ដោយ របៀបវារៈដែលគណបក្សទាំងពីរបញ្ជាក់មុនជំនួបនោះគឺ បញ្ហានយោបាយដែលនៅសេសសល់។ នៅក្នុងនោះគឺកញ្ចប់សំណុំរឿងសកម្មជនគណបក្សទាំង១៥ ករណីលោក សម រង្ស៊ី និងលោក ហុង សុខហួរ។ យ៉ាងណាក៏ដោយសំណុំរឿងនេះ នឹងអាចនៅតែតឹងតែងព្រោះថាគណបក្សកាន់អំណាចថាជារឿងតុលាការ ដោយឡែកបក្សប្រឆាំងថា ជារឿងនយោបាយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ