ក្រុមការងារចរចា CPP និង CNRP នឹងបន្តជួបគ្នានៅរសៀលថ្ងៃចន្ទ ខណៈការចរចារនៅខ្វែងគំនិតគ្នា
ក្រុមការងារគណបក្សប្រជាជនកម្ពុជា និងគណបក្សសង្គ្រោះជាតិ គ្រោងនឹងជួបគ្នាបន្តទៀតនៅថ្ងៃចន្ទទី៥ខែមករាខាងមុខនេះ ដើម្បីទំលុះទំលាយភាពខ្វែងគំនិតគ្នាលើចំណុចមួយចំនួនក្នុងមាត្រា៥៣-៥៤ ក្នុងជំពូក៦ នៃ"សេចក្តីស្នើច្បាប់បោះឆ្នោតជ្រើសតាំងតំណាងរាស្ត្រ"។
ចុះផ្សាយនៅថ្ងៃ៖
ស្តាប់ - ០៣:០៥
កិច្ចប្រជុំក្រុមការងារគណបក្សប្រជាជនកម្ពុជា និងគណបក្សសង្គ្រោះជាតិ កាលពីរសៀលថ្ងៃទី២ ខែមករាម្សិលមិញនេះ បានបន្តពិភាក្សាគ្នាលើ "សេចក្តីស្នើច្បាប់បោះឆ្នោតជ្រើសតាំងតំណាងរាស្ត្រ"។ ក្រុមការងារគណបក្សទាំងពីរ បានបន្តពិភាក្សាលើជំពូកទី៦ ត្រង់មាត្រា ៥៣ ចាស់ ដែលនិយាយពីគណៈកម្មាធិការជាតិរៀបចំការបោះឆ្នោត ត្រូវធ្វើប្រតិភូកម្មអំណាច ដល់ក្រុមប្រឹក្សាឃុំសង្កាត់។ នៅត្រង់មាត្រានេះ ភាគីទាំងពីរបានខ្វែងគំនិតគ្នា៤ចំណុច ក្នុងនោះរួមមាន ទី១. ការដៅអត្តសញ្ញាណរបស់អ្នកបោះឆ្នោត, ទី២. ការកំណត់ពេលវេលាសម្រាប់ចុះឈ្នោះបោះឆ្នោត, ទី៣. មិនទាន់បានកំណត់ភាពច្បាស់លាស់សម្រាប់ឯកសារចុះឈ្មោះបោះឆ្នោត និងទី៤. ការកំណត់អាសនៈនៅក្នុងរដ្ឋសភារបស់អ្នកតំណាងរាស្ត្រ។
បំពេញតួនាទីតំណាង គជប ក្នុងការពិនិត្យបញ្ជីឈ្មោះបោះឆ្នោត មន្ត្រី គជប ធ្វើប្រធាន ហើយស្មៀនឃុំសង្កាត់ ជាអនុប្រធាន។ ការចុះឈ្មោះ និងពិនិត្យឈ្មោះអ្នកបោះឆ្នោត ត្រូវធ្វើនៅឃុំសង្កាត់ ហើយនៅពេលមានការតវ៉ា ឬវិវាទ ទាក់ទងនឹងការចុះឈ្មោះ ក្រុមប្រឹក្សាឃុំសង្កាត់ ត្រូវដោះស្រាយទំនាស់ដំបូង។
លោកប៊ិនឈិន បន្តថា មាត្រា ៥៤ បានកំណត់ថា ដើម្បីទៅចុះឈ្មោះបោះឆ្នោត ប្រជាពលរដ្ឋ ត្រូវបង្ហាញអត្តសញ្ញាណប័ណ្ណសញ្ជាតិខ្មែរ។ បើក្នុងករណីពុំទាន់មានអត្តសញ្ញាណប័ណ្ណ បាត់ ឬខូច គឺត្រូវមានលិខិតបញ្ជាក់អត្តសញ្ញាណ ដោយមានការធានាដោយប្រជាពលរដ្ឋ ២នាក់ ដែលបានចុះឈ្មោះបោះឆ្នោតរួចហើយ ទៅធានានៅពេលចុះឈ្មោះ។
លោក ប៊ិន ឈិន បានបញ្ជាក់បន្តថា "ជំហររបស់គណបក្សប្រជាជនកម្ពុជា ចង់ឲ្យប្រជាពលរដ្ឋ ប្រើអត្តសញ្ញាណប័ណ្ណសញ្ជាតិខ្មែរ ទៅចុះឈ្មោះបោះឆ្នោត និងសម្រាប់ប្រើពេលបោះឆ្នោត ដោយពុំចាំបាច់មានប័ណ្ណបោះឆ្នោតផ្សេងទេ ហើយរដ្ឋាភិបាល នឹងខិតខំចេញអត្តសញ្ញាណប័ណ្ណជូនប្រជាពលរដ្ឋឲ្យបានគ្រប់គ្នា។ ចំណែកកម្មករ ឬអ្នកដែលទៅធ្វើការនៅក្រុងភ្នំពេញ ឬខេត្តនានា ត្រូវចេញលិខិតបញ្ជាក់ដោយមេឃុំ ចៅសង្កាត់ ពីកន្លែងស្នាក់នៅ ដោយមានអ្នកធានា ២នាក់ ជាអ្នកមានឈ្មោះក្នុងបញ្ជីបោះឆ្នោត"។
ចំណែកលោក គួយ ប៊ុនរឿន តំណាងគណបក្សសង្គ្រោះជាតិ បានបញ្ជាក់ថា ក្រុមការងារបានពិភាក្សាលើសមត្ថកិច្ចពិនិត្យបញ្ជីឈ្មោះ និងការចុះឈ្មោះអ្នកបោះឆ្នោត ដែលចែងពីការធ្វើប្រតិភូកម្មអំណាច ក្នុងនាមតំណាង គជប ប៉ុន្តែការទទួលខុសត្រូវ គឺ គជប ជាអ្នកទទួលខុសត្រូវដដែល និងបន្តឲ្យក្រុមប្រឹក្សាឃុំសង្កាត់ បន្តការចុះឈ្មោះបោះឆ្នោត ដើម្បីចូលរួមដោះស្រាយវិវាទ ក្នុងមាត្រា ៥៣ចាស់។ ចំពោះមាត្រា ៥៤ចាស់ ទាក់ទងយន្តការ នៃការចុះឈ្មោះអ្នកបោះឆ្នោត ត្រូវធ្វើនៅសាលាឃុំសង្កាត់ ឬបំលាស់ទីចុះឈ្មោះ ទៅតាមតម្រូវការជាក់ស្តែងរបស់ប្រជាពលរដ្ឋនៅតាមមូលដ្ឋាន។
ក្នុងនោះ លោក គួយ ប៊ុនរឿន បានបញ្ជាក់ថា ឯកសារសម្រាប់ចុះឈ្មោះ គណបក្សសង្គ្រោះជាតិ ក៏បានយល់ស្របនឹងគណបក្សប្រជាជនកម្ពុជា ដោយយកអត្តសញ្ញាណប័ណ្ណសញ្ជាតិខ្មែរ ជាគោល៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ