តំណាងរាស្ត្របក្សប្រឆាំងទាត់ចោលការពន្យល់តាមខ្សែរវីដេអូ
តំណាងរាស្ត្រគណបក្សប្រឆាំងបានច្រានចោលការបកស្រាយរបស់មន្ត្រីរដ្ឋាភិបាលដែលបានពន្យល់ បកស្រាយ ដល់សាធារណៈជនបន្ថែមទៀតទាក់ទងទៅនឹងការចោទប្រកាន់ពីបញ្ហាព្រំដែនកម្ពុជាវៀតណាមនៅចំណុចខេត្តត្បូងឃ្មុំ។តាមរយៈខ្សែរវីដេអូជិត១ម៉ោង មន្ត្រីរដ្ឋាភិបាលបានលើកឡើងពីភាពច្បាស់លាស់នៃការការពារព្រំដែនកម្ពុជានិងការកំណត់ព្រំដែនជាក់លាក់ជាមួយប្រទេសជិតខាង។ក៏ប៉ុន្តែតំណាងរាស្ត្របក្សប្រឆាំងនៅតែត្រូវការវត្តមានតំណាងរដ្ឋាភិបាលចូលទៅក្នុងរដ្ឋសភាដដែល។
ចុះផ្សាយនៅថ្ងៃ៖
ស្តាប់ - ០២:១៨
តំណាងរាស្ត្រគណបក្សសង្គ្រោះជាតិមណ្ឌលសៀមរាប លោក អ៊ុំ សំអាន បានមើលឃើញថាខ្សែវីដេអូរបស់រដ្ឋាភិបាលដែលបង្ហាញពីការបកស្រាយជុំវិញបញ្ហាព្រំដែនដែលបានកើតឡើងនៅខេត្តត្បូងឃ្មុំថាមិនអាចទទួលយកបានទេ។ លោក អ៊ុំ សំអាន បានហៅការពន្យល់របស់ មន្ត្រីរដ្ឋាភិបាលតាមរយៈខ្សែរវីដេអូនេះថាបំផ្លើសការពិតច្រើន ដូចជាករណីផែនទីជាដើម។
អត្ថាធិប្បាយរបស់អ្នកតំណាងរាស្ត្រគណបក្សប្រឆាំងរូបនេះបានធ្វើឡើងបន្ទាប់ពីការ បកស្រាយ ពន្យល់របស់មន្ត្រីជាន់ខ្ពស់រដ្ឋាភិបាល អំពីបញ្ហាព្រំដែនកម្ពុជា-វៀតណាម នៅស្រុកមេមត់ ខេត្តត្បូងឃ្មុំ តាមរយៈការបង្ហាញវីដេអូវេទិកាតុមូលមួយ មានរយៈពេលជាង៤០នាទី។
វីដេអូវេទិកាតុមូលនោះ មានវាគ្មិនបីរូបគឺលោកឧបនាយករដ្ឋមន្ត្រី ហោ ណាំហុង រដ្ឋមន្ត្រីក្រសួងការបរទេស លោក វ៉ា គឹមហុង ប្រធានគណៈកម្មការព្រំដែនកម្ពុជា និង លោកកែវ រ៉េមី សម្របសម្រួលដោយ លោក ផៃ ស៊ីផាន ដែលមន្ត្រីទាំងពីររូបនេះតំណាងឲ្យទីស្តីការគណរដ្ឋមន្ត្រី។ ខ្សែវីដេអូ ដែលបានថតទុក និងសំរិតសំរាំងរួចហើយនោះ ត្រូវបានផ្សព្វផ្សាយដល់កាសែត និងចាក់ផ្សាយតាមទូរទស្សន៍ក្នុងស្រុកកាលពីថ្ងៃទី២១ ខែឧសភា ឆ្នាំ២០១៥ ម្សិលមិញ។
ជាមួយគ្នានេះ លោកតំណាងរាស្ត្រគណបក្សប្រឆាំងអ៊ំ សំអាន អះអាងថា នឹងនៅតែប្រកាន់ជំហរកោះហៅលោក ហោ ណាំហុង និងលោក វ៉ា គឹមហុង ទៅឆ្លើយបំផ្លឺនៅក្នុងសភាពេញអង្គដដែល បើទោះណាជាមានការបកស្រាយតាមរយៈខ្សែរវីដេអូនាពេលនេះទៅហើយ ក៏ដោយ។ លោកថាក្នុងតំណាក់កាលនេះកំពុងតែស្វែងរកហត្ថលេខាពីសមាជិកសភាបន្ថែម ដើម្បីស្នើឲ្យមានការកោះហៅ។
ម្យ៉ាងទៀត លោកបញ្ជាក់ថាលោកគាំទ្រនិងរង់ចាំមើលមេដឹកនាំគណបក្សសង្គ្រោះជាតិលោក សម រង្សី លើករឿងនេះទៅជជែកជាមួយលោកនាយករដ្ឋមន្ត្រី ហ៊ុន សែន តាមរយៈវប្បធម៌សន្ទនា។
ទោះយ៉ាងនេះក្តី តាមរយៈខ្សែរវីដេអូ មន្ត្រីរដ្ឋាភិបាលបានអះអាងថា ការការពារបូរណភាពទឹកដីកម្ពុជា មិនមែនជាសិទ្ធិផ្តាច់មុខរបស់គណបក្សណាឬបុគ្គលណាទេ។ រដ្ឋាភិបាលកម្ពុជា តាំងពីឆ្នាំ១៩៧៩ ក្រោយផ្តួលរំលំរបបខ្មែរក្រហម រដ្ឋាភិបាលតែងធ្វើការដោយយកចិត្តទុកដាក់បំផុត ដើម្បីការពារអធិបតេយ្យបូរណភាពទឹកដីកម្ពុជា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ