អាជ្ញាធរបញ្ជូនមេបក្សប្រឆាំងខេត្តពោធិ៍សាត់ទៅតុលាការ ខណៈដែលសកម្មជន ៥នាក់ទៀតចូលតុលាការនៅថ្ងៃស្អែក
អាជ្ញាធរខេត្តពោធិ៍សាត់ នៅព្រឹកថ្ងៃទី២៩ ឧសភានេះ បានបញ្ជូនប្រធានគណបក្សសង្គ្រោះជាតិប្រចាំខេត្តពោធិសាត់ទៅកាន់តុលាការបន្ទាប់ពីបានបង្កគ្រោះថ្នាក់ចរាចរណ៍។ ទន្ទឹមនឹងនេះ សកម្មជនគណបក្សសង្គ្រោះជាតិចំនួន៥រូបប្រចាំខេត្តតាកែវក៏ត្រូវតុលាការកោះហៅឱ្យចូលខ្លួននៅថ្ងៃទី៣១ឧសភាផងដែរ។ លោក អេង ឆៃអ៊ាង អនុប្រធានគណបក្សសង្គ្រោះជាតិ បានអះអាងថានេះគឺជារឿងនយោបាយសុទ្ធសាធ។
ចុះផ្សាយនៅថ្ងៃ៖
ស្តាប់ - ០១:៥៩
នៅទីបំផុតប្រធានគណបក្សសង្គ្រោះជាតិខេត្តពោធិ៍សាត់ លោក យ៉ាន សេងហ៊តត្រូវបានអាជ្ញាធរបញ្ជូនទៅកាន់តុលាការពីបទបង្កគ្រោះថ្នាក់ចរាចរណ៍តាមមាត្រា៨៣ ស្តីពីច្បាប់ចរារចរណ៍។ ប៉ុន្តែលោក អេង ឆៃអ៊ាង អនុប្រធានគណបក្សសង្គ្រោះជាតិបានហៅការបញ្ជូនក្តីនេះថា ជារឿងនយោបាយដែលមិនបានផ្អែកលើច្បាប់នោះទេ។ លោកបញ្ជាក់ថា សមាជិកបក្សមិនបានបើកឡានទៅបុកកុមារដែលរងគ្រោះនោះទេ គឺកុមារនោះជាអ្នករត់មកចូលឡានដោយខ្លួនឯង។ លោកអេង ឆៃអ៊ាងហៅទង្វើនេះថា ការភាពអយុត្តិធម៌។ សូមរំលឹកថាកាលពីរសៀលថ្ងៃទី ២៧ ឧសភាកន្លងទៅគ្រោះថ្នាក់ចរាចរណ៍មួយបានកើតឡើងក្នុងស្រុកវាលវែង ខេត្តពោធិ៍សាត់ដែលបានបណ្តាលឱ្យកុមារាម្នាក់អាយុ ៦ឆ្នាំ បានរងរបួសធ្ងន់បញ្ជូនទៅកាន់មន្ទីរពេទ្យជាបន្ទាន់។ ក្រៅពីសំណុំរឿងនៅខេត្តពោធិ៍សាត់ សមាជិកគណបក្សសង្គ្រោះជាតិចំនួន៥រូបនៅខេត្តតាកែវដែលជាបេក្ខភាពឃុំ ព្រៃខ្លា និងសមាជិកក៏នឹងត្រូវចូលខ្លួនទៅបំភ្លឺនៅតុលាការខេត្តតាកែវនៅថ្ងៃទី៣១ ឧសភាក្នុងបណ្តឹងបរិហារកេរ្តិ៍ជាសាធារណៈជេរប្រមាថ ជាសាធារណៈនឹងញុះញង់ឱ្យប្រព្រឹត្តបទឧក្រិដ្ឋ ក្នុងរឿងទាស់សម្តីគ្នាជាមួយសកម្មជនគណបក្សប្រជាជនកម្ពុជានៅថ្ងៃឃោសនាទី២០ឧសភា។ លោក យ៉ង់ គឹមអេង អ្នកនាំពាក្យបន្ទប់ស្ថានការណ៍នៃការបោះឆ្នោត បានញែកករណីនេះជាពីរ។ តាមលោក ករណីខេត្តពោធិ៍សាត់គឺជារឿងអនុវត្តច្បាប់ប្រសិនបើអ្នកជនបង្កបានបើករថយន្តរត់គេចមែន។ ប៉ុន្តែករណីខេត្តតាកែវ ការបញ្ជូនបណ្តឹងទៅកាន់តុលាការ គឺជារឿងនយោបាយតែម្តងព្រោះថា វាបានរំលោភលើកិច្ចការងាររបស់គណៈកម្មាធិការជាតិរៀបចំការបោះឆ្នោតដែលគួរតែជាអ្នកដោះស្រាយបញ្ហាទាំងនេះ។
សូមបញ្ជាក់ថា ការប្តឹងផ្តល់របស់គណបក្សនយោបាយក្នុងអំឡុងពេលនៃការឃោសនាបោះឆ្នោតនេះមានប្រមាណ ៥៦បណ្តឹង។ ហើយជាបណ្តឹងតូចតាចដែលត្រូវបានដោះស្រាយអស់មួយភាគធំទៅហើយ។ ទន្ទឹមនឹងនេះ លោកយ៉ង់ គឹមអេង អ្នកនាំពាក្យបន្ទប់ស្ថានការណ៍ បានវាយតម្លៃថា ស្ថានការណ៍នៃការឃោសនាបោះឆ្នោត គឺជាមានសភាពស្ងប់ស្ងាត់ និងវិជ្ជមាន ដោយឡែកវិន័យក្នុងពេលហែក្បួនក៏ល្អអាចទទួលយកបានដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ