គណបក្សសង្គ្រោះជាតិធ្វើតាមសំណើររបស់លោកហ៊ុន សែន?
ដូចជាលោកអ្នកនាងបានដឹងរួចហើយថា គណបក្សសង្គ្រោះជាតិកាលពីថ្ងៃទី៣០មេសា ម្សិលមិញ បានចេញសេចក្តីថ្លែងការណ៍រួមណែនាំដល់ថ្នាក់មូលដ្ឋានរបស់ខ្លួនឱ្យអនុវត្តវប្បធម៌សន្ទនាជាមួយបក្សកាន់អំណាច។ សេចក្តីថ្លែងការណ៍រួមនេះ គឺធ្វើឡើងក្រោយការទាមទារយ៉ាងខ្លាំងរបស់លោកនាយករដ្ឋមន្ត្រីហ៊ុន សែន។ ប៉ុន្តែបក្សប្រឆាំងអះអាងមិនបានធ្វើតាមសំណើរនោះទេ។
ចុះផ្សាយនៅថ្ងៃ៖
ស្តាប់ - ០២:២៤
មួយថ្ងៃក្រោយប្រតិកម្មខ្លាំងរបស់លោកនាយករដ្ឋមន្ត្រីហ៊ុន សែន និងការស្នើឱ្យបក្សប្រឆាំងដែលជាដៃគូរ ណែនាំដល់ថ្នាក់មូលដ្ឋាននូវវប្បធម៌សន្ទនា គណបក្សសង្គ្រោះជាតិបានប្រកាសជាទូទៅនៅថ្ងៃសុក្រម្សិលមិញ ឱ្យមូលដ្ឋានរបស់ខ្លួនអនុវត្តវប្បធម៌សន្ទនា មិនជេរប្រមាថគ្នា មិនគម្រាមកំហែង រាល់បញ្ហាសង្គម និងប្រទេសជាតិសំខាន់ៗ។ លោកយ៉ែម ប៉ុញ្ញឫទ្ធិ អ្នកនាំពាក្យគណបក្សសង្គ្រោះជាតិ បានបដិសេធថា ការចេញសេចក្តីថ្លែងការណ៍រួមនេះ គឺមិនមែនធ្វើតាមការទាមទាររបស់លោកនាយករដ្ឋមន្ត្រីនោះទេ ប៉ុន្តែជាគោលជំហររបស់គណបក្សប្រឆាំង។
គណបក្សប្រឆាំងដែលអះអាងថាខ្លួនមិនបោះបង់ចោលឡើយការរិះគន់ទៅលើចំណុចអវិជ្ជមានរបស់សង្គម និងរបស់បក្សកាន់អំណាច។ អ្នកនាំពាក្យបក្សប្រឆាំងដដែលរូបនេះ បានសង្កត់ធ្ងន់ថា ទាំងលោក សម រង្ស៊ី និងលោក កឹម សុខា គឺនៅតែបន្តរិះគន់លើចំណុចអវិជ្ជមានដើម្បីស្ថាបនាដដែលព្រោះថាបក្សសង្គ្រោះជាតិគឺជាដៃគូរប្រជែងដណ្តើមប្រជាប្រិយភាព ឡើងកាន់អំណាច។ បើតាមការគូសបញ្ជាក់ពីលោកយ៉ែម បុញ្ញឫទ្ធិ សេចក្តីថ្លែងការណ៍ពីវប្បធម៌សន្ទនានេះ គឺមិនមែនមានន័យថា វប្បធម៌សន្ទនាតម្រូវឱ្យបក្សប្រឆាំងឈប់រិះគន់នោះទេ។
ក្រោយការចេញសេចក្តីថ្លែងការណ៍នេះ សមាជិកគណបក្សសង្គ្រោះជាតិនៅថ្នាក់ខេត្ត ក្រុង ស្រុកខណ្ឌ និងឃុំ នឹងចូលរួមពិភាក្សាជាមួយបក្សកាន់អំណាចដោយលើកយកដំណោះស្រាយសន្តិវិធី ចំពោះរាល់បញ្ហាសង្គម និងបញ្ហាប្រទេសជាតិ មិនថាតែបញ្ហាបូរណៈភាពទឹកដី អធិបតេយ្យភាព បញ្ហាព្រំដែន ជនអន្តោប្រវេសន៍ខុសច្បាប់ និងបញ្ហាធនធានធម្មជាតិ រួមទាំងអំពើពុករលួយជាដើម។ សម្រាប់គណបក្សសង្គ្រោះជាតិ វប្បធម៌សន្ទនាដែលកើតឡើងចេញពីបក្សកាន់អំណាច និងបក្សប្រឆាំងដែលធ្លាប់តែជាគូសត្រូវរិះគន់គ្នាមិនថ្នមសំដីនោះ បានសម្រូវឱ្យគ្រប់គូរភាគីបោះបង់ចោលនូវទម្លាប់ចាត់ទុកគ្នាជាសត្រូវ វាយប្រហារគ្នា ហើយប៉ុនប៉ងសងសឹកគ្នាដូចសម័យអតីតកាល។ បើតាមសេចក្តីប្រកាសរបស់បក្សប្រឆាំងដដែល លោក សម រង្ស៊ី និងលោក កឹម សុខាដែលជាក្បាលម៉ាស៊ីនបក្ស ចង់ឃើញនូវវប្បធម៌សន្ទនានេះ ជ្រួតជ្រាបដល់មូលដ្ឋាន និងបន្តការប្រើប្រាស់វប្បធម៌សន្ទនានេះ ដើម្បីជាប្រយោជន៍ជាតិ និងប្រជាពលរដ្ឋឥតងាករេ។
យ៉ាងណាក៏ដោយ បើទោះបីជាគណបក្សសង្គ្រោះជាតិបានថា ការចេញសេចក្តីថ្លែងការណ៍នេះមិនតាមសំណើររបស់លោកនាយករដ្ឋមន្ត្រី ប៉ុន្តែសេចក្តីថ្លែងការដែលប្រើប្រាស់ឈ្មោះទាំងលោក សម រង្ស៊ី និងលោកកឹម សុខានោះ គឺធ្វើឡើងមួយថ្ងៃក្រោយប្រតិកម្មខ្លាំងរបស់លោកនាយករដ្ឋមន្ត្រី៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ