លោក កឹម សុខា នឹងក្លាយជាប្រធាន ខណៈមានអនុប្រធានបីរូប
គណៈកម្មាធិការអចិន្ត្រៃយ៍ និងគណៈកម្មាធិការនាយក បានសម្រេចជ្រើសរើសបេក្ខភាពក្បាលម៉ាស៊ីនដឹកនាំគណបក្សថ្មីនោះ គឺលោក កឹម សុខា លោកអេង ឆៃអ៊ាង លោកស្រីមួរ សុខហួរ និងលោកប៉ុល ហំម។ បេក្ខភាពទាំងនេះ នឹងត្រូវសមាជគណបក្សសង្គ្រោះជាតិសម្រេចជាផ្លូវការ។ ក្រុមអ្នកតាមដានអះអាងថាបេក្ខភាពនេះ នឹងគ្មានការផ្លាស់ប្តូរនោះទេ។
ចុះផ្សាយនៅថ្ងៃ៖
ស្តាប់ - ០២:៤៧
គណបក្សសង្គ្រោះជាតិរើសបានបេក្ខជនប្រធាន និងអនុប្រធានគណបក្សថ្មីហើយ។ លោកកឹម សុខា នឹងត្រូវឡើងជាប្រធានបក្ស ដោយឡែកសមាសភាពអនុប្រធានមានចំនួនបី គឺលោកអេង ឆៃអ៊ាង លោកស្រីមួរ សុខហួរ និងលោកប៉ុល ហំម។ ទាំងនេះគឺជាបេក្ខភាព ដែលនឹងត្រូវដាក់ជូនសមាជបោះឆ្នោតលើកដៃសម្រេចនៅថ្ងៃទី២ មីនាស្អែក ដែលជាការសម្រេចផ្លូវការណ៍ និងស្ថាពរ។ បេក្ខភាពនេះ គឺជាការសម្រេចរបស់គណៈអចិន្ត្រៃយ៍ និងគណៈកម្មការនាយករបស់គណបក្សទាំងមូល។
លោកអេង ឆៃអ៊ាង អ្នកនាំពាក្យគណបក្សបានប្រាប់វិទ្យុបារាំងអន្តរជាតិថា តំណែងអនុប្រធានគណបក្សនេះ គឺមិនបានបែងចែកជាអនុប្រធានទី១ ទី២ និងទី៣នោះទេ ពោលគឺអនុប្រធានទាំងបីមានឋានៈស្មើគ្នា មិនមានអនុប្រធានរូបណាធំជាងរូបណានោះទេ។
គណបក្សសង្គ្រោះជាតិនឹងធ្វើសមាជបក្ស ដែលមានអ្នកចូលរួមប្រមាណ ១០០០នាក់ មកពីគ្រប់ខេត្តក្រុង ដើម្បីបោះឆ្នោតជ្រើសរើសក្បាលម៉ាស៊ីនថ្មីបន្ទាប់ពីលោក សម រង្ស៊ី ដែលជាបុគ្គលល្បី និងប្រជាប្រិយភាពក្នុងបក្សបានលាលែងចេញពីតំណែង។ លោកអេង ឆៃអ៊ាង បានបន្ថែមទៀតថា ដើម្បីឱ្យគណបក្សមានអនុប្រធានចំនួន ៣នាក់នោះ គណបក្សនឹងត្រូវធ្វើវិសោធនកម្មលក្ខ័ខ័ណ្ឌតិកៈបទបញ្ជាផ្ទៃក្នុងគណបក្ស។ លក្ខ័ខ័ណ្ឌតិកៈចាស់ ដែលបានចែងថា គណបក្សសង្គ្រោះជាតិ មានប្រធាន ១រូប និងអនុប្រធានមួយរូប។
ក្រុមអ្នកវិភាគនៅកម្ពុជា បានមើលឃើញថា បេក្ខភាព ដែលបានសម្រេចដោយគណៈអចិន្ត្រៃយ៍ និងគណៈកម្មាធិការនាយកនេះ គឺនឹងមិនផ្លាស់ប្តូរនោះទេ។ សមាសភាពដឹកនាំនេះ គឺនឹងមិនបានជួយអ្វីច្រើនដល់ប្រជាប្រិយភាពរបស់គណបក្សសង្គ្រោះជាតិនោះទេ ព្រោះថាសមាភាពក្បាលម៉ាស៊ីននេះ គឺគ្រាន់តែជាការតម្រូវទៅតាមច្បាប់បោះឆ្នោត។ ច្បាប់ដែលតម្រូវឱ្យសង្គ្រោះជាតិត្រូវតែមានប្រធានគណបក្សច្បាស់លាស់ បន្ទាប់ពីតំណែងប្រធានគណបក្សបានទំនេរអស់រយៈពេលជិតកន្លះមកហើយក្រោយការលាលែងពីលោក សម រង្ស៊ី។
យ៉ាងណាក៏ដោយអ្នកវិភាគនយោបាយ លោកបណ្ឌិតសុខ ទូចបានមើលឃើញថា ការរៀបចំសមាសភាពថ្មីនេះ ក្រុមគណបក្សសិទ្ធិមនុស្សរបស់លោកកឹម សុខា មានប្រៀបជាងដោយសារលោកកឹម សុខា ជាប្រធានបក្ស ហើយមានអនុប្រធាន ១បន្ថែមទៀត ដោយឡែកក្រុមគណបក្សសម រង្ស៊ី ចាស់ គឺបានចាញ់ប្រៀបដោយសារតែទទួលបានតែអនុប្រធាន ២នាក់ នោះអំណាចក្នុងបក្សនឹងធ្លាក់លើលោកកឹម សុខា ដែលជាប្រធាន តាមធម្មានុរូប៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ