ប្រធានម្នាក់ អនុប្រធាន ៣នាក់ ជារូបមន្តរៀបតាមសភាពការជាក់ស្តែងច្រើនជាងកិច្ចព្រមព្រៀងកូតា
ចុះផ្សាយនៅថ្ងៃ៖
ស្តាប់ - ០៩:៤៩
បន្ទាប់ពីអត់ប្រធានដឹកនាំមួយរយៈពេលខ្លី ដោយសារលោក សម រង្ស៊ី បានលាឈប់ពីតួនាទីប្រធាន គណបក្សសង្គ្រោះជាតិ បានរៀបចំ និងត្រៀមបេក្ខភាពរួចរាល់ហើយ នូវរចនាសម្ព័ន្ធដឹកនាំកំពូល ដោយផ្លាស់ប្តូរពីរូបមន្តប្រធានម្នាក់ អនុប្រធានម្នាក់ មករូបមន្តប្រធានម្នាក់ អនុប្រធាន ៣នាក់វិញ។ បេក្ខភាពប្រធានគណបក្សត្រូវគេប្រកាស ១ថ្ងៃ មុនសមាជវិសាមញ្ញ របស់គណបក្សនៅថ្ងៃនេះ គឺលោក កឹម សុខា និងអនុប្រធាន ៣រូបទៀត គឺលោកស្រី មួ សុខហួរ លោក ប៉ុល ហំម និងលោក អេង ឆៃអ៊ាង។ មេដឹកនាំបក្សប្រឆាំងថ្មីទាំង ៤រូប ត្រូវបានសម្រេចនៅថ្ងៃព្រហស្បតិ៍នេះ។ អ្នកតាមដាននយោបាយ មើលឃើញផ្សេងៗគ្នា លើការរៀបចំថ្នាក់ដឹកនាំថ្មីរបស់គណបក្សសង្គ្រោះជាតិនាពេលនេះ។